ବ୍ରହ୍ମପୁର ଅଫିସ୍,୨୮ା୫-କେ.ସି. ପବ୍ଲିକ ସ୍କୁଲ ବିରୋଧରେ ପୁଣି ଥରେ ଆନ୍ଦୋଳନ ଆରମ୍ଭ ହୋଇଛି। ମାନବ ଅଧିକାର ସୁରକ୍ଷା ମଞ୍ଚର ସୋମବାର ୯୦ତମ ଘଣ୍ଟଯାତ୍ରା ଅବସରରେ ଏହି ପ୍ରସଙ୍ଗକୁ ନେଇ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ସଂଗଠନ ଅଭିଯୋଗ ଅନୁଯାୟୀ, ଛାତ୍ରୀଛାତ୍ରଙ୍କ ଅଭାବକୁ ଦେଖାଇ ସରକାର ଅନେକ ସରକାରୀ ସ୍କୁଲକୁ ବନ୍ଦ କରିଦେଉଛନ୍ତି। ଫଳରେ ଗରିବ ମେଧାବୀ ପିଲାମାନେ ପାଠ ପଢ଼ାରୁ ବଞ୍ଚିତ ହେଉଛନ୍ତି । ବ୍ରହ୍ମପୁର କେ.ସି.ହାଇସ୍କୁଲ, କେ.ସି. ବାଳିକା ଉଚ୍ଚ ବିଦ୍ୟାଳୟ ଏବଂ କେ.ସି. ଟାଉନ୍ ଉଚ୍ଚ ବିଦ୍ୟାଳୟ ବହୁ ପୁରୁଣା ସ୍କୁଲ। କିନ୍ତୁ ଏହି ତିନୋଟି ପୁରାତନ ସ୍କୁଲ ଏବେ ସରକାରୀ ଅବହେଳାର ଶିକାର ହେଉଛି। ସରକାର ଏହାକୁ ଧ୍ୟାନ ଦେଉନାହାନ୍ତି। ଅନ୍ୟପଟେ କେ.ସି. ହାଇସ୍କୁଲ ପରିସରରେ କେ.ସି. ପବ୍ଲିକ ସ୍କୁଲ ନାମକ ଏକ ଘରୋଇ ସ୍କୁଲ ଖୋଲିଛି। ତିନୋଟି ସରକାରୀ ସ୍କୁଲକୁ ବନ୍ଦ କରିଦେଇ ସେଠାରେ ଘରୋଇ ସ୍କୁଲ ଚଳାଇବା ପାଇଁ ଏକ ଷଡଯନ୍ତ୍ର ଚାଲିଛି। ଫଳରେ ଏହି ତିନୋଟି ସ୍କୁଲରେ ପଢ଼ୁଥିବା ପିଲାମାନେ ହଇରାଣ ହେବେ। କାରଣ ମୁଖ୍ୟତଃ ଗରିବ ଘରର ପିଲାମାନେ ଏହି ସବୁ ସ୍କୁଲରେ ପଢ଼ୁଥିବା ବେଳେ ସେମାନେ ଅଧିକ ଟଙ୍କା ଦେଇ ଘରୋଇ ସ୍କୁଲରେ ପଢ଼ିପାରିବେ ନାହିଁ। ଏଣୁ ତିନଟି ସ୍କୁଲକୁ ସରକାର ନିଜ ଅଧୀନକୁ ନେଇ ପୂର୍ଣ୍ଣ ସରକାରୀ ଶିକ୍ଷାନୁଷ୍ଠାନର ମାନ୍ୟତା ଦେବା ଏବଂ ଘରୋଇ କେ.ସି. ପବ୍ଲିକ ସ୍କୁଲକୁ ସେଠାରୁ ସ୍ଥାନାନ୍ତର ପାଇଁ ଦାବି କରାଯାଇଛି । ବିକ୍ଷୋଭ ପରେ ଉପଜିଲାପାଳ ଦିଗନ୍ତ ରାଉତରାୟଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା । ସେ ଅଭିଯୋଗର ଯାଞ୍ଚ କରିବେ ବୋଲି କହିଥିଲେ । ମାନବ ଅଧିକାର ସୁରକ୍ଷା ମଞ୍ଚ ଆବାହକ ଅବନୀ କୁମାର ଗୟା, ଆର୍. ସତ୍ୟନାରାୟଣ ରାଓ, ମହେଶ୍ୱର ବାଡ଼ତ୍ୟା, ଶ୍ୟାମ ସୁନ୍ଦର ଖାଡ଼ଙ୍ଗା, ମାଗୁଣି ନାହାକ, ପୂର୍ଣ୍ଣଚନ୍ଦ୍ର ମହାରଣା, ସଂସ୍କାରବାଦୀ ସଭାପତି ତ୍ରିନାଥ ମହାରଣା ଓ ରାଜେନ୍ଦ୍ର ପଣ୍ଡା ପ୍ରମୁଖ ଏହି ବିକ୍ଷୋଭରେ ଭାଗ ନେଇଥିଲେ।
