ପାଟଣା,୨।୨(ସ୍ବ.ପ୍ର.): କେନ୍ଦୁଝର ଜିଲା ପାଟଣା ରେଞ୍ଜ ସାହାରପଡା ସେକ୍ସନ ଫୁଲପାହାଡ଼ି ଗ୍ରାମ୍ୟ ଜଙ୍ଗଲରୁ ଶନିବାର ପୂର୍ବାହ୍ନରେ ଏକ ଆହତ ଭାଲୁ ଛୁଆକୁ ବନବିଭାଗ ଉଦ୍ଧାର କରି ପ୍ରାଥମିକ ଚିକିତ୍ସା କରି ଜଙ୍ଗଲର ଛାଡିଦେଇଥିଲା। ହେଲେ ରବିବାର ସକାଳୁ ଭାଲୁ ଛୁଆଟିକୁ ତାର ମା’ ନେଇ ନ ଥିବା ବନବିଭାଗ କର୍ମଚାରୀ ଦେଖିବାକୁ ପାଇଥିଲେ। ଛୁଆଭାଲୁର ଅବସ୍ଥା ଗୁରୁତର ଥିବାରୁ ତାକୁ ପୁଣି ବଡ଼ବିଲ ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ଭାଲୁଟିର ପେଟରେ ପଥର ବାଜି ଗଭୀର କ୍ଷତ ହୋଇଥିବା ବନବିଭାଗ ଅନୁମାନ କରୁଛି। ଭାଲୁ ଛୁଆଟିର ବୟସ ଦୁଇରୁ ତିନି ମାସର ହେବ ବୋଲି ବନପାଳ ସୁକୁମାର ଜେନା କହିଛନ୍ତି। ସମ୍ପୂର୍ଣ୍ଣ ସୁସ୍ଥ ହେବା ପରେ ଭାଲୁଛୁଆକୁ ସଂରକ୍ଷିତ ଜଙ୍ଗଲରେ ଛାଡି ଦିଆଯିବ ବୋଲି ପାଟଣା ରେଞ୍ଜର ପବିତ୍ର ମୋହନ ନାୟକ କହିଛନ୍ତି।
