ନୂଆଦିଲ୍ଲୀ,୨୫।୫: ବଲବୀର ସିଂଙ୍କ ପରଲୋକରେ ସାରା କ୍ରୀଡ଼ା ଜଗତରେ ଶୋକର ଛାୟା ଖେଳିଯାଇଛି। ଭାରତୀୟ କ୍ରିକେଟ ଅଧିନାୟକ ବିରାଟ କୋହଲିଙ୍କ ଠାରୁ ଆରମ୍ଭ କରି ମହିଳା ସ୍ପ୍ରିଣ୍ଟର ଦୂତୀ ଚାନ୍ଦ, ରେସଲର ବଜରଙ୍ଗ ପୁନିଆ, ତାରକା ବକ୍ସା ବଜେନ୍ଦର ସିଂ, ପୂର୍ବତନ କ୍ରିକେଟର ଅନିଲ କୁମ୍ବଲେ, ଶୁଟିଂ ଲିଜେଣ୍ଡ ଅଭିନବ ବିନ୍ଦ୍ରା ପ୍ରମୁଖ କ୍ରୀଡ଼ାବିତ୍ମାନେ ଶୋକ ଜାହିର କରିଛନ୍ତି। ହକି ଇଣ୍ଡିଆ ତରଫରୁ ମଧ୍ୟ ଶୋକବାର୍ତ୍ତା ପ୍ରଦାନ କରାଯାଇଛି। ସେହିପରି କେନ୍ଦ୍ର କ୍ରୀଡ଼ାମନ୍ତ୍ରୀ କରେଣ ରିଜିଜୁ, ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ନରିନ୍ଦର ବାତ୍ରା ମଧ୍ୟ ଶୋକ ବ୍ୟକ୍ତ କରିଛନ୍ତି।
କ୍ରୀଡ଼ାମନ୍ତ୍ରୀ ରିଜିଜୁ ମଧ୍ୟ ତାଙ୍କ ଦେହାନ୍ତରେ ବହୁତ ଦୁଃଖିତ ବୋଲି କହିଛନ୍ତି। ହୃଦୟରୁ ତାଙ୍କୁ ଶ୍ରଦ୍ଧାଞ୍ଜଳି ଜଣାଉଛି ଓ ତାଙ୍କ ଆତ୍ମାର ସଦ୍ଗତି ହେଉ ବୋଲି ରିଜିଜୁ କହିଛନ୍ତି। ବଲ୍ବୀର ସିଂଙ୍କ ଦେହାନ୍ତରେ ବେଶ୍ ଦୁଃଖିତ ବୋଲି କୋହଲି କହିଛନ୍ତି। ତାଙ୍କ ଆତ୍ମାର ସଦ୍ଗତି ହେଉ। ତାଙ୍କ ପରିବାର ଓ ଶୁଭଚିନ୍ତକଙ୍କୁ ସମବେଦନା ଜଣାଉଛି ବୋଲି କୋହଲି ଟୁଇଟ୍ କରି ଉଲ୍ଲେଖ କରିଛନ୍ତି। ବଲବୀର ଜଣେ କିମ୍ବଦନ୍ତୀ ହକି ଖେଳାଳି ଥିଲେ ବୋଲି ହକି ଇଣ୍ଡିଆ ଟୁଇଟ୍ କରି ଜଣାଇଛି। ଏଥିସହିତ ୧୯୮୪ ଅଲିମ୍ପିକ୍ସ ଖେଳିବା ନେଇ ବଲବୀରଙ୍କ ଏକ ବାର୍ତ୍ତାକୁ ମଧ୍ୟ ହକି ଇଣ୍ଡିଆ ଟୁଇଟ୍ କରିଛି। ଦେଶର ଦ୍ରୁତତମ ଧାବିକା ତଥା ମହିଳା ତାରକା ସ୍ପ୍ରିଣ୍ଟର ଦୂତୀ ‘ଏକ ଯୁଗର ଅନ୍ତ ଘଟିଲା’ ବୋଲି ଟୁଇଟ୍ କରି ଶ୍ରଦ୍ଧାଞ୍ଜଳି ଜଣାଇଛନ୍ତି। ସେ ଜଣେ କିମ୍ବଦନ୍ତୀ ଖେଳାଳି ଥିଲେ ଓ ଏହି ଦୁଃଖ ସମୟରେ ତାଙ୍କ ପରିବାରକୁ ସମବେଦନା ଜଣାଉଛି ବୋଲି ସେ ଉଲ୍ଲେଖ କରିଛନ୍ତି। ସେହିପରି ବଲବୀର ସବୁଦିନେ ପ୍ରେରଣାର ଉତ୍ସ ହୋଇ ରହିବେ ବୋଲି ଅଲିମ୍ପିକ ପଦକ ବିଜେତା ବକ୍ସର ବିଜେନ୍ଦର ସିଂ ଟୁଇଟ୍ କରି ଜଣାଇଛନ୍ତି। ଆତ୍ମାର ସଦ୍ଗତି ହେଉ ଓ ତାଙ୍କ ପରିବାରକୁ ସମବେଦନା ଜଣାଉଛି ବୋଲି ସେ ଟୁଇଟ କରି ଉଲ୍ଲେଖ କରିଛନ୍ତି। ତାଙ୍କ ପରିବାରକୁ ସମବେଦନା ଜଣାଉଛି ବୋଲି କୁମ୍ବଲେ ଟୁଇଟ୍ କରିଛନ୍ତି। ତାଙ୍କ ମୃତ୍ୟୁ ଖବର ବହୁତ ଦୁଃଖ ଦେଇଛି। ତାଙ୍କ ଆତ୍ମାର ସଦ୍ଗତି ହେଉ ବୋଲି ବଜରଙ୍ଗ ପୁନିଆ ଟୁଇଟ୍ କରି ଉଲ୍ଲେଖ କରିଛନ୍ତି। ଭାରତର ଏକମାତ୍ର ବ୍ୟକ୍ତିଗତ ଅଲିମ୍ପିକ ସ୍ବର୍ଣ୍ଣ ପଦକ ବିଜେତା ଅଭିନବ ବିନ୍ଦ୍ରା ମଧ୍ୟ ଶ୍ରଦ୍ଧାଞ୍ଜଳି ଜଣାଇଛନ୍ତି। ବଲବୀର ଜଣେ ବିରଳ ରୋଲ ମଡେଲ। ସେ ସମସ୍ତଙ୍କ ପାଇଁ ପ୍ରେରଣାର ଉତ୍ସ ହୋଇ ରହିବେ। ତାଙ୍କ ଦେହାନ୍ତ ଖବର ମୋ ପାଇଁ ବହୁତ ଦୁଃଖ ଆଣିଦେଇଛି ବୋଲି ବିନ୍ଦ୍ରା ଟୁଇଟ୍ କରିଛନ୍ତି। ସେ ଜଣେ ମହାନ୍ ଖେଳାଳି ଥିଲେ ଓ ବିଶ୍ୱର ବିଭିନ୍ନ ଦେଶର ଲୋକ ତାଙ୍କୁ ଭଲ ପାଉଥିଲେ। କ୍ରୀଡ଼ାଜଗତରେ ସେ ବଳିଷ୍ଠ ପରମ୍ପରା ଛାଡିଯାଇଛନ୍ତି ବୋଲି ନରିନ୍ଦର ବାତ୍ରା କହିଛନ୍ତି। ପୂର୍ବତନ ହକି ଅଧିନାୟକ ବୀରେନ ରାସକ୍ୱନା ଓ ସର୍ଦ୍ଦାର ସିଂ ମଧ୍ୟ ଶ୍ରଦ୍ଧାଞ୍ଜଳି ଜଣାଇଛନ୍ତି। ସେହିପରି ତାରକା ହକି ଗୋଲ କିପର ପି.ଆର. ଶ୍ରୀଜେସ ଓ ଭାରତୀୟ ହକି ଅଧିନାୟିକା ରାନୀ ରାମପାଲ ମଧ୍ୟ ଦୁଃଖ ପ୍ରକାଶ କରିଛନ୍ତି। ସ୍ପ୍ରିଣ୍ଟ ଲିଜେଣ୍ଡ ପି.ଟି. ଉଷା ମଧ୍ୟ ଶୋକ ଜାହିର କରିଛନ୍ତି। ଶୁଟର ହୀନା ସିଦ୍ଧୁ ସିପିଆଇ ନେତା ସୀତାରାମ ୟେଚୁରୀ ମଧ୍ୟ ଶୋକ ଜାହିର କରିଛନ୍ତି।
