ନୂଆଦିଲ୍ଲୀ,୧ ।୫: କୋଭିଡ୍-୧୯ ଯୋଗୁ ସାରା ଦେଶରେ ମେ ୩ ଯାଏ ଲକ୍ଡାଉନ ଜାରି ରହିବ। ଏହି ସମୟରେ ଦେଶର ଶିଳ୍ପ କ୍ଷେତ୍ର କାର୍ଯ୍ୟକଳାପ ସମ୍ପୂର୍ଣ୍ଣ ଭାବେ ଠପ୍ ରହିଛି। ଏଥିଲାଗି ପ୍ରମୁଖ ଶିଳ୍ପ କ୍ଷେତ୍ର ବା କୋର ସେକ୍ଟର ଅଭିବୃଦ୍ଧି ମାର୍ଚ୍ଚ ମାସରେ ୬.୫% ଖସିଛି। ଗତବର୍ଷ ସମାନ ସମୟରେ ଏହି କ୍ଷେତ୍ରରେ ୫.୮% ଅଭିବୃଦ୍ଧି ଦେଖାଯାଇଥିଲା। ଭାରତ ମାନ୍ଦାବସ୍ଥା ଦେଇ ଗତି କରୁଥିବା ବେଳେ କୋଭିଡ୍-୧୯ ଯୋଗୁ ବଜାର ଉପରେ ଗଭୀର ଭାବେ ଚାପ ପଡିଛି। ଚଳିତ ବର୍ଷ ଅଭିବୃଦ୍ଧି ଆଖିଦୃଶିଆ ହେବ ନାହିଁ ବୋଲି ବିଶ୍ୱର ପ୍ରମୁଖ ରେଟିଂ ଏଜେନ୍ସିଗୁଡିକ ପୂର୍ବାନୁମାନ କରିଛନ୍ତି।
କରୋନାର ପ୍ରଭାବ ଶିଳ୍ପ ଉପରେ କେମିତି ରହିଛି ତାହା ସରକାରଙ୍କ ଏହି ଡାଟାରୁ ସ୍ପଷ୍ଟ ହେଉଛି। ଏହି ସ୍ଥିତିକୁ ବିଚାର କଲେ ଆଗାମୀ ଦିନରେ କୋର ସେକ୍ଟର ଅଭିବୃଦ୍ଧି ନିମ୍ନଗାମୀ ରହିବ ବୋଲି ବଜାର ବିଶେଷଜ୍ଞ କହିଛନ୍ତି। ମାର୍ଚ୍ଚରେ ଇସ୍ପାତ, ସାର ଏବଂ ସିମେଣ୍ଟ ଉତ୍ପାଦନ କମିବା ଯୋଗୁ ଏହା ଦ୍ୱାରା କୋର୍ ସେକ୍ଟର କ୍ଷତିଗ୍ରସ୍ତ ହୋଇଛି। ପ୍ରମୁଖ ଶିଳ୍ପ କ୍ଷେତ୍ରରେ ଚାପ ରହିବା ଯୋଗୁ ଔଦ୍ୟୋଗିକ ଉତ୍ପାଦନ ସୂଚକାଙ୍କ (ଆଇଆଇପି) ଉପରେ ପ୍ରଭାବ ନକାରାତ୍ମକ ରହିଛି। ଆଇଆଇପିରେ କୋର୍ ସେକ୍ଟର ୪୦.୨% ଯୋଗଦାନ ରଖୁଛି। ମାତ୍ର ମାର୍ଚ୍ଚରେ କରୋନା ଏହି ଧାରାକୁ ବିଗିଡାଇ ଦେଇଛି। ଅଶୋଧିତ ତୈଳ, ପ୍ରାକୃତିକ ବାଷ୍ପ, ସାର, ଇସ୍ପାତ, ସିମେଣ୍ଟ ଏବଂ ବିଦ୍ୟୁତ୍ ଉତ୍ପାଦନ ଯଥାକ୍ରମେ ୫.୫%, ୦.୫%, ୧୧.୯%, ୧୩%, ୨୪.୭% ଏବଂ ୭.୨% ଖସିଥିବା ସରକାର ଜାରି କରିଥିବା ଡାଟାରୁ ସାମ୍ନାକୁ ଆସିଛି। ଏହାବାଦ କୋଇଲା ଉତ୍ପାଦନ ୪.୧% ଖସିଛି। ଏହା ଗତ ବର୍ଷ ମାର୍ଚ୍ଚରେ ୯.୧% ରହିଥିଲା। ୨୦୧୯-୨୦ଏପ୍ରିଲ-ମାର୍ଚ୍ଚ ସମୟ ଅବଧିରେ କୋର ସେକ୍ଟର ଇଣ୍ଡଷ୍ଟ୍ରିଜ ୦.୬% ରହିଛି। ୨୦୧୮-୧୯ର ସମାନ ସମୟରେ ଏହା ୪.୪% ରହିଥିଲା।
