ଜୟପୁର,୨୫।୩ (ନି.ପ୍ର./ଡି.ଏନ୍.ଏ.): କୋରାପୁଟ ଜିଲାକୁ ସଂଯୋଗ କରୁଥିବା ପୋଡଶୀ ଛତିଶଗଡ ଏବଂ ଆନ୍ଧ୍ରପ୍ରଦେଶର ସମସ୍ତ ରାସ୍ତାକୁ ପୋଲିସ ସିଲ କରଛି। ମଙ୍ଗଳବାର ମଧ୍ୟରାତ୍ରି ୧୨ଟାରୁ ସରକାର ଲକ୍ଡାଉନ୍ ଘୋଷଣା କରିଥିଲେ। ଏହାପରେ କୋରାପୁଟ ଏସ୍ପି ମୁକେଶ କୁମାର ଭାମୋଙ୍କ ନିର୍ଦ୍ଦେଶକ୍ରମେ ଛତିଶଗଡକୁ ସଂଯୋଗ କରୁଥିବା ୨୬ ନମ୍ବର ଜାତୀୟ ରାଜପଥକୁ କୋଟପାଡ ଥାନା ଚାନ୍ଦିଲିଠାରେ ସିଲ୍ କରାଯାଇଛି। ସେହିପରି ଆନ୍ଧପ୍ରଦେଶକୁ ସଂଯୋଗ କରୁଥିବା ୨୬ ନମ୍ବର ଜାତୀୟ ରାଜପଥକୁ ପଟାଙ୍ଗୀ ଥାନା ସୁଙ୍କି, ପାଡୁଆ ଥାନା ସଦର ଏବଂ ବନ୍ଧୁଗାଁ ଥାନା ନିକଟରେ ସିଲ କରାଯାଇଛି। କେବଳ ଅତ୍ୟାବଶ୍ୟକ ସାମଗ୍ରୀ ଏବଂ ଅନ୍ୟ ଜରୁରୀକାଳିନସ୍ଥିତିରେ ଯାତାୟାତକୁ ଅନୁମତି ଦିଆଯାଉଛି। ଜିଲାର ବୋରିଗୁମ୍ମାରେ ଏସ୍ପି ଭାମୋଙ୍କ ଉପସ୍ଥିତିରେ ରାସ୍ତା ସିଲ୍ କରାଯାଇଥିଲା। ସେହିପରି କୁନ୍ଦୁରା, ବୈପାରୀଗୁଡା, ଜୟପୁର ଆଦି ସ୍ଥାନରେ ପୋଲିସ ଉପସ୍ଥିତିରେ ଲକ୍ଡାଉନ କରାଯାଇଛି। କେବଳ କାଁ ଭାଁ ଗାଡି ଚଳାଚଳ କରୁଛି। ଅନ୍ୟପକ୍ଷରେ ଜରୁରୀ ସାମଗ୍ରୀ, ପନିପରିବା, ଔଷଧ ଦୋକାନରେ ନିୟମାନୁଯାୟୀ ଦୂରତା ରଖିବାକୁ ଗ୍ରାହକଙ୍କୁ ପୋଲିସ ସଚେତନ କରିଛି।
