ନୂଆଦିଲ୍ଲୀ, ୧୦ା୫ (ପି.ଟି.): ଲକ୍ଡାଉନ୍ ଯୋଗୁ ଭାରତର ଜୁନିୟର ବ୍ୟାଡ୍ମିଣ୍ଟନ ଖେଳାଳିମାନଙ୍କୁ ଘରେ ରହିବାକୁ ପଡ଼ୁଛି। ଏହି କାରଣରୁ ସେମାନଙ୍କ ମନରେ ବିରକ୍ତି ଓ ନୈରାଶ୍ୟ ଭାବ ପ୍ରକାଶ ପାଉଛି। ଏକଥା କହିଛନ୍ତି ଜାତୀୟ ଜୁନିୟର ବ୍ୟାଡ୍ମିଣ୍ଟନ ମୁଖ୍ୟ କୋଚ୍ ସଞ୍ଜୟ ମିଶ୍ର। କୋଭିଡ୍-୧୯ ମହାମାରୀ ଯୋଗୁ ଯୁବ ଖେଳାଳିମାନେ ପାଖାପାଖି ଦୁଇମାସ ଧରି ଘରେ ରହିଲେଣି। ବର୍ତ୍ତମାନ କୋଚ୍ ନୁହେଁ ବରଂ ସେମାନଙ୍କର ଜଣେ ପରାମର୍ଶଦାତା ଭାବେ କାର୍ଯ୍ୟ କରିବାକୁ ହେଉଛି। କରୋନା ମହାମାରୀ କେବଳ ଆମ ଦେଶ ନୁହେଁ ସମଗ୍ର ବିଶ୍ୱରେ ସମସ୍ୟା ସୃଷ୍ଟି କରିଛି। ଆମ ମାନସିକସ୍ଥିତିକୁ ଦୃଢ଼ କରିବାକୁ ପଡ଼ିବ। ନିଜର ନକାରାତ୍ମକ ଚିନ୍ତାଧାରା ଉପରେ ନିୟନ୍ତ୍ରଣ ରଖିବାକୁ ପଡ଼ିବ, ଯାହାକି ଏକ ମ୍ୟାଚ୍ର କଠିନ ପରିସ୍ଥିତିରେ ସେମାନଙ୍କୁ ସହାୟକ ହୋଇଥାଏ ବୋଲି ମୋତେ ଖେଳାଳିମାନଙ୍କୁ ବୁଝାଇବାକୁ ପଡ଼ୁଛି। ମ୍ୟାଚ୍ ସମୟରେ ଏକ ଗୁରୁତ୍ୱପୂର୍ଣ୍ଣ ପଏଣ୍ଟ ହରାଇବା ସମୟରେ କେତେଜଣ ଖେଳାଳିଙ୍କ ମନରେ ବିରକ୍ତି ଓ ଚିଡ଼ିଚିଡ଼ା ଭାବ ସୃଷ୍ଟି ହୋଇଥାଏ। ମାନସିକ ଦୁର୍ବଳତା ଓ ନକାରାତ୍ମକ ଚିନ୍ତାଧାରା ଯୋଗୁ ଏହା ଦେଖା ଦେଇଥାଏ ବୋଲି ମିଶ୍ର କହିଛନ୍ତି। ଏହି ଗୁଣକୁ କିପରି ଦୂର କରିହେବ ସେ ଦିଗରେ ଧ୍ୟାନଦେବାକୁ ମୁଁ ଖେଳାଳିମାନଙ୍କୁ ପରାମର୍ଶ ଦେଉଛି। ଲକ୍ଡାଉନ୍ ପାଇଁ ନୁହେଁ ଏହି ଦୁଇଟି ବିଷୟକୁ ଜଣେ ଖେଳାଳି ଯେତେପରିମାଣରେ ନିୟନ୍ତ୍ରଣ କରିପାରିବ ମ୍ୟାଚରେ ତାହାର ପ୍ରଦର୍ଶନ ସେତେ ଭଲ ରହିବ। ଘରେ ଯେତିକି ଜାଗା ମିଳୁଛି ସେଥିରେ ହୋମ୍ଓ୍ବାର୍କ କରିବାକୁ ପଡ଼ିବ। ଘରେ ଅଭ୍ୟାସ ପାଇଁ ୬ରୁ ୭ ଫୁଟ୍ ସ୍ଥାନ ମିଳିବ। ବହୁ ଦିନ ବ୍ୟବଧାନରେ ଯେତେବେଳେ ୨୦ଫୁଟ୍ ଲମ୍ବ ବିଶିଷ୍ଟ କୋର୍ଟକୁ ଫେରିବ ସେତେବେଳେ ଏହା ଖୁବ୍ ବଡ଼ ଲାଗିବ। ଏଥିସହିତ ଖାପ ଖୁଆଇବା ଲାଗି ଅବଶ୍ୟ କିଛି ସମୟ ଲାଗିବ। ମିଶ୍ର କହିଛନ୍ତି, ବର୍ତ୍ତମାନ ପିଲାମାନଙ୍କୁ ପ୍ରେରଣା ଦେବା ମୋ ପାଇଁ ଏକ ଚ୍ୟାଲେଞ୍ଜ ହୋଇଛି। କୋର୍ ଏକ୍ସରସାଇଜ୍, ଆଗିଲିଟି ଟ୍ରେନିଂ ଏବଂ ଓ୍ବାଲ୍୍ ପ୍ରାକ୍ଟିସ୍ ଭଳି ନିୟମିତ ଫିଟ୍ନେସ୍ ଡ୍ରିଲ୍ ବ୍ୟତୀତ ଅନ୍ଲାଇନ୍ରେ କେତେକ ପୁସ୍ତକ ପଠନ କରିବା ଲାଗି ଲିଙ୍କ୍ ମଧ୍ୟ ସେମାନଙ୍କୁ ଦେଉଛି। ଯେଉଁମାନଙ୍କର ପେଣ୍ଟିଂ, ଗାର୍ଡନିଂ ଅବା କୁକିଂ ଭଳି କିଛି ହବି ରହିଛି, ସେଦିଗରେ କିଛି ସମୟ ଦେବା ସହ ଭିଡିଓ ଶେୟାର କରିବା ଲାଗି ପରାମର୍ଶ ଦେଉଛି। ଏହା ସେମାନଙ୍କ ପାଇଁ ପ୍ରେରଣାଦାୟକ ସାବ୍ୟସ୍ତ ହେବ ବୋଲି ମୋର ଆଶା। ବ୍ୟାଡ୍ମିଣ୍ଟନ କେବେ ଆରମ୍ଭ ହେବ ବୋଲି ତାଙ୍କୁ ପଚରାଯିବାରେ ମିଶ୍ର କହିଥିଲେ, ଏହି ପ୍ରଶ୍ନର କେହି ଦେଇପାରିବେ ନାହିଁ। ବର୍ତ୍ତମାନ ପରିସ୍ଥିତିରେ ସରକାର ଖେଳ ନୁହେଁ ଜୀବନ ରକ୍ଷାକୁ ଅଗ୍ରାଧିକାର ଦେବା ସ୍ବାଭାବିକ। ଏହି ଆଭିମୁଖ୍ୟକୁ ଆମେ ସମସ୍ତେ ଗ୍ରହଣ କରିବା ଉଚିତ୍। ଆମେ ସକାରାତ୍ମକ ମନୋଭାବ ନେଇ ସମୟକୁ ଅପେକ୍ଷା କରିବା।
