ନୂଆଦିଲ୍ଲୀ,୨୩-୬: ବଜେଟ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଦେଶର ପ୍ରମୁଖ ଅର୍ଥନୀତିଜ୍ଞ ଏବଂ ବିଶେଷଜ୍ଞଙ୍କ ସହିତ ଦେଶର ଆର୍ଥିକ ପରିସ୍ଥିତି ଉପରେ ମାନସ ମନ୍ଥନ କରିଥିଲେ। ଏହା ଏଥିପାଇଁ ଗୁରୁତ୍ୱପୂର୍ଣ୍ଣ ଥିଲା ଯେ, ମୋଦି ସରକାରଙ୍କ ପ୍ରଥମ କାର୍ଯ୍ୟକାଳରେ ଅର୍ଥନୀତି ହ୍ରାସ ପାଇବା ସହ ନିଯୁକ୍ତି ୪୫ ବର୍ଷର ସର୍ବନିମ୍ନ ସ୍ତରରେ ଆସି ପହଞ୍ଚତ୍ଛି। ଦେଶର ବିକାଶକୁ ଗତିଶୀଳ କରିବା ଏବଂ ଅଧିକ ନିଯୁକ୍ତି ସୃଷ୍ଟି ଲାଗି ଆର୍ଥିକ ନୀତିର ରୂପରେଖ ପ୍ରସ୍ତୁତ କରିବା ଏହି ବୈଠକର ଉଦ୍ଦେଶ୍ୟ ଥିଲା। ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରୀ ପୀୟୂଷ ଗୋୟଲ ଏହି ବୈଠକରେ ଉପସ୍ଥିତ ଥିଲେ। ନୀତି ଆୟୋଗ ପକ୍ଷରୁ ‘ଆର୍ଥିକ ନୀତି-ଆଗକୁ ରାସ୍ତା’ ଶୀର୍ଷକରେ ଏହି ବୈଠକ ଆୟୋଜନ କରାଯାଇଥିଲା।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମ୍ଓ) ପକ୍ଷରୁ ଜାରି ବିବୃତି ଅନୁଯାୟୀ, ବିଶେଷଜ୍ଞମାନେ ଅର୍ଥନୀତି, ରୋଜଗାର, କୃଷି, ଜଳସେଚନ, ରପ୍ତାନି,ଶିକ୍ଷା ଏବଂ ସ୍ବାସ୍ଥ୍ୟ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନିଜ ନିଜର ପରାମର୍ଶମାନ ଦେଇଥିଲେ। ନିକଟରେ ଜାରି ଜିଡିପି ତଥ୍ୟ ପ୍ରକାଶ ପାଇବା ପରେ ଦେଶକୁ ଆର୍ଥିକ ମାନ୍ଦାବସ୍ଥାରୁ ରକ୍ଷା କରିବାର ବଡ଼ ଆହ୍ବାନ ରହିଛି। ପ୍ରକାଶିତ ଜିଡିପି ତଥ୍ୟ ଅନୁଯାୟୀ, ୨୦୧୮-୧୯ର ଚତୁର୍ଥ ତ୍ରୈମାସରେ ଦେଶର ବିକାଶ ହାର ମାତ୍ର ୫.୮% ରହିଛି, ଯାହା କି, ୫ ବର୍ଷର ସର୍ବନିମ୍ନ ସ୍ତର। ଅନ୍ୟପକ୍ଷରେ ୨୦୧୭-୧୮ରେ ବେକାରୀ ୪୫ ବର୍ଷର ସର୍ବନିମ୍ନ ସ୍ତର ୬.୧%ରେ ପହଞ୍ଚତ୍ୟାଇଛି। ସରକାରଙ୍କ ପ୍ରଥମ କାର୍ଯ୍ୟକାଳରେ ପ୍ରଧାନମନ୍ତ୍ରୀ ମୋଦିଙ୍କୁ ବେକାରୀ ସମସ୍ୟାକୁ ନେଇ ସମାଲୋଚନାର ସରବ୍ୟ ହେବାକୁ ପଡ଼ିଥିଲା। ବିରୋଧୀ ଦଳଗୁଡ଼ିକ ନିର୍ବାଚନରେ ଏହାକୁ ଏକ ବଡ଼ ପ୍ରସଙ୍ଗ କରିଥିଲେ। ଅର୍ଥମନ୍ତ୍ରୀ ସୀତାରାମନ୍ ଜୁଲାଇ ୫ରେ ମୋଦି ସରକାରଙ୍କ ଦ୍ୱିତୀୟ କାର୍ଯ୍ୟକାଳର ପ୍ରଥମ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିବାକୁ ଯାଉଛନ୍ତି। ଏହାପୂର୍ବରୁ ନୀତି ଆୟୋଗ ଦ୍ୱାରା ଆୟୋଜିତ ଉକ୍ତ ବୈଠକର ବେଶ୍ ଗୁରୁତ୍ୱ ରହିଛି। ଦେଶର ଆର୍ଥିକ ବିକାଶକୁ ଗତି ଦେବା ଲାଗି ଅର୍ଥନୀତିଜ୍ଞଙ୍କ ସହିତ ମନ୍ଥନରେ ସାମିଲ ହେବା ପରେ ସେ କିଛି ବଡ଼ ପଦକ୍ଷେପ ଗ୍ରହଣ କରିପାରନ୍ତି ବୋଲି ମନେ କରାଯାଉଛି। ଏହି ବୈଠକରେ ପରିସଂଖ୍ୟାନ ଏବଂ କାର୍ଯ୍ୟକ୍ରମ କ୍ରିୟାନ୍ବୟନ ରାଷ୍ଟ୍ରମନ୍ତ୍ରୀ(ସ୍ବାଧୀନ) ରାଓ ଇନ୍ଦ୍ରଜିତ ସିଂ, ନୀତି ଆୟୋଗ ଉପାଧ୍ୟକ୍ଷ ରାଜୀବ କୁମାର ଏବଂ ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହି ଅବସରରେ ପ୍ରଧାନମନ୍ତ୍ରୀ ଉପସ୍ଥିତ ସମସ୍ତ ଅର୍ଥନୀତିଜ୍ଞ ଏବଂ ବିଶେଷଜ୍ଞଙ୍କୁ ସେମାନଙ୍କ ପରାମର୍ଶ ପାଇଁ ଧନ୍ୟବାଦ ଦେଇଥିଲେ ଏବଂ ସରକାର ସେମାନଙ୍କ ପରାମର୍ଶକୁ କାର୍ଯ୍ୟକାରୀ କରିବା ଲାଗି ପ୍ରୟାସ କରିବେ ବୋଲି ପ୍ରତିଶ୍ରୁତି ଦେଇଥିଲେ।
