ବଇଣ୍ଡା,୨।୩(ଡି.ଏନ.ଏ.) କଟକ-ସମ୍ବଲପୁର ୫୫ନଂ. ଜାତୀୟ ରାଜପଥର ସମ୍ପ୍ରସାରଣ କାର୍ଯ୍ୟ ଶେଷ ହେଉ ନ ଥିବା ବେଳେ ଏବେ ଅସ୍ଥାୟୀ ରାସ୍ତାରେ ବଢ଼ୁଛି ଦୁର୍ଘଟଣା। ଅନେକ ସ୍ଥାନରେ ବଡ଼ ବଡ଼ ଖାଲଖମା ସୃଷ୍ଟି ହୋଇଥିବାରୁ ସେଠାରେ ପଡ଼ି ସାଇକେଲ ଓ ବାଇକ୍ ଆରୋହୀମାନେ ଆହତ ହେଉଛନ୍ତି। ବିଶେଷ କରି କିଶୋରନଗର ବ୍ଲକ ଜାମ୍ବୁନାଳୀଠାରୁ ବାମୁର ପର୍ଯ୍ୟନ୍ତ ଅସ୍ଥାୟୀ ରାସ୍ତାରେ ପଡ଼ି ଆହତ ହେଉଥିବା ଲୋକଙ୍କ ସଂଖ୍ୟା ବୃଦ୍ଧି ପାଉଛି। ସମ୍ପ୍ରସାରଣ କାର୍ଯ୍ୟ କିପରି ଶୀଘ୍ର ଶେଷ କରାଯିବ ଓ ଅସ୍ଥାୟୀ ରାସ୍ତା ମରାମତି ହେବ ସେ ଦିଗରେ ଜିଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
ପ୍ରକାଶ ଯେ, ୫୫ ନଂ. ଜାତୀୟ ରାଜପଥ ୪ ଲେନ୍ କରାଯାଉଛି। ଏକ ଠିକାସଂସ୍ଥା ଏହି କାର୍ଯ୍ୟ କରୁଥିବାବେଳେ ବହୁ ବିଳମ୍ବ ହେଉଛି। ସମ୍ପ୍ରସାରଣ ପାଇଁ ଏପ୍ରିଲ ୨୦୧୮ରେ ବାମୁରରୁ ବଇଣ୍ଡା ପର୍ଯ୍ୟନ୍ତ ରାସ୍ତା ପାର୍ଶ୍ୱରେ ଥିବା ଦୋକାନ ଓ ଘର ଉଚ୍ଛେଦ ଆରମ୍ଭ କରାଯାଇଥିଲା। ତେବେ କଦଳୀମୁଣ୍ଡାଠାରେ ୨ ଜଣ କ୍ଷତିଗ୍ରସ୍ତ ପ୍ରଜାଙ୍କୁ କ୍ଷତିପୂରଣ ମିଳୁ ନ ଥିବାରୁ ଉଚ୍ଛେଦ କାର୍ଯ୍ୟ ସେଠାରେ ଅଟକି ଯାଇଛି। ସେହିପରି ବାମୁରରୁ ଜାମ୍ବୁନାଳୀ ୩୫ କିମିରୁ ମାତ୍ର ୧୦ କିମି ଗୋଟିଏ ପାର୍ଶ୍ୱ ରାସ୍ତା ସରିଥିବା ବେଳେ ବଳକା ୨୫ କିମି ନିର୍ମାଣରେ ବହୁ ବିଳମ୍ବ ହେଉଛି। ମୁଖ୍ୟରାସ୍ତା ଖୋଳାହୋଇଥିବାରୁ ଅସ୍ଥାୟୀ ରାସ୍ତାରେ ଗାଡ଼ି ଚଳାଚଳ କରୁଛି। କିନ୍ତୁ ଉକ୍ତ ଅସ୍ଥାୟୀ ରାସ୍ତାଗୁଡ଼ିକର ଅବସ୍ଥା ଅତ୍ୟନ୍ତ ଖରାପ ହୋଇଯାଇଛି। ଫଳରେ ପ୍ରତିଦିନ ଦୁର୍ଘଟଣା ଘଟୁଛି। ବଇଣ୍ଡା ଜନତା କଲେଜ ନିକଟରେ ନିର୍ମାଣ ହୋଇଥିବା ଅସ୍ଥାୟୀ ରାସ୍ତାରେ ୨ ଜଣ କଲେଜ ଛାତ୍ରୀ ସାଇକେଲରୁ ଖସିପଡ଼ି ଆହତ ହୋଇଛନ୍ତି। ସେହିପରି ଲୁହାମୁଣ୍ଡାଠାରେ ଅସ୍ଥାୟୀ ରାସ୍ତାରେ ଶନିବାର ଏକ ବାଇକ୍ ଦୁର୍ଘଟଣାରେ କଟରଙ୍ଗା ଅଞ୍ଚଳର ୨ ଜଣ ଆହତ ହୋଇଛନ୍ତି। ପ୍ରଶାସନିକ ଅଧିକାରୀମାନେ ରାସ୍ତା କାର୍ଯ୍ୟ ତଦାରଖ କରୁ ନ ଥିବାରୁ ଏଭଳି ସମସ୍ୟା ହେଉଥିବା ଅଭିଯୋଗ ହୋଇଛି। ତୁରନ୍ତ ଏଥିପ୍ରତି ଅନୁଗୋଳ ଜିଲାପାଳ ଦୃଷ୍ଟି ଦେବାକୁ ବଇଣ୍ଡା ଗ୍ରାମବାସୀ ଦାବି କରିଛନ୍ତି।
