ଅଁଳା ପଞ୍ଚାୟତ ସରପଞ୍ଚଙ୍କୁ ଅଟକ ରଖିଲେ ଗ୍ରାମବାସୀ
7:14 amMay 18, 2020 / 21

ବେତନଟୀ/ବୈଶିଙ୍ଗା,୧୮ା୫(ଡି.ଏନ୍‌.ଏ.)- ପ୍ରବାସୀଙ୍କୁ ବାଇକ୍‌ରେ ବସାଇ ଆଣିଥିବା ଜଣେ ଯୁବକ ହୋମ୍‌ କ୍ୱାରାଣ୍ଟାଇନ୍‌ରେ ନ ରହିବାରୁ ମୟୂରଭଞ୍ଜ ଜିଲା ବେତନଟୀ ବ୍ଲକ ଅଧୀନ ଅଁଳା ପଞ୍ଚାୟତରେ ଉତ୍ତେଜନା ଦେଖା ଦେଇଛି। ଏନେଇ ସ୍ଥାନୀୟ ସରପଞ୍ଚ କୃଷ୍ଣଚନ୍ଦ୍ର ହେମ୍ବ୍ରମଙ୍କୁ ସେହି ପଞ୍ଚାୟତ ଅନ୍ତର୍ଗତ ରାଇକମା ଗ୍ରାମର କୁମ୍ଭାରସାହିଠାରେ ରବିବାର ଶତାଧିକ ଲୋକ ଦୀର୍ଘ ସମୟ ଅଟକ ରଖିଥିଲେ। ଖବରପାଇ ବୈଶିଙ୍ଗା ଥାନା ଅଧିକାରୀ ଲକ୍ଷ୍ମୀଧର ସ୍ବାଇଁ ଓ ବଡ଼ସାହି ବିଧାୟକ ସନାତନ ବିଜୁଳି ଘଟଣାସ୍ଥଳକୁ ଯାଇ ବୁଝାସୁଝା କରିବା ପରେ ଲୋକେ ସରପଞ୍ଚଙ୍କୁ ଛାଡ଼ିଥିଲେ।
ସୂଚନା ଅନୁଯାୟୀ, ଗୁଜରାଟରୁ ଫେରିଥିବା ଜଣେ ପ୍ରବାସୀଙ୍କୁ ବାଲେଶ୍ୱର ଜିଲା ରେମୁଣାଠାରୁ ତାଙ୍କ ସମ୍ପର୍କୀୟ ବାଇକ୍‌ରେ ବସାଇ ଆଣି ବେତନଟୀ ଆଦର୍ଶବିଦ୍ୟାଳୟ ସ୍ଥିତ କ୍ୱାରାଣ୍ଟାଇନ୍‌ ସେଣ୍ଟରକୁ ଛାଡ଼ିବାକୁ ଯାଇଥିଲେ। ତେବେ ସମ୍ପୃକ୍ତ ସମ୍ପର୍କୀୟ ଜଣକ ହୋମ୍‌ କ୍ୱାରାଣ୍ଟାଇନରେ ନ ରହି ଗାଁରେ ବୁଲୁଥିଲେ। ଏନେଇ ଗ୍ରାମବାସୀ ସ୍ଥାନୀୟ ସରପଞ୍ଚଙ୍କୁ ଜଣାଇଥିଲେ ମଧ୍ୟ ସେ କିଛି ପଦକ୍ଷେପ ଗ୍ରହଣ କରି ନ ଥିଲେ। ଏହାର ପ୍ରତିବାଦରେ ଉତ୍ତ୍ୟକ୍ତ ଲୋକେ ସରପଞ୍ଚଙ୍କୁ ଅଟକ ରଖିଥିଲେ ବୋଲି କହିଛନ୍ତି। ଉଲ୍ଲେଖଯୋଗ୍ୟ ଯେ, ଏହି ପଞ୍ଚାୟତର କ୍ୱାରାଣ୍ଟାଇନ୍‌ ସେଣ୍ଟରରେ ରହୁଥିବା ଜଣେ ପ୍ରବାସୀ ଶନିବାର ଆତ୍ମହତ୍ୟା କରିବା ଘଟଣା ଆଲୋଡନ ସୃଷ୍ଟି କରିଥିଲା। ଏସମ୍ପର୍କରେ ସରପଞ୍ଚ ହେମ୍ବ୍ରମଙ୍କୁ ପଚାରିବାରୁ ଲୋକେ ତାଙ୍କୁ ଅଟକ ରଖିବା ଘଟଣାକୁ ସ୍ବୀକାର କରିଥିବା ବେଳେ ଲୋକଙ୍କ ଅଭିଯୋଗରେ ସମ୍ପୂର୍ଣ୍ଣ ସତ୍ୟତା ନ ଥିବା କହିଛନ୍ତି।