ନୂଆଦିଲ୍ଲୀ, ୨।୧୦: ଭାରତର ଦିଗ୍ଗଜ ସ୍ପିନର ଯୁଜବେନ୍ଦ୍ର ଚହଲ ଫର୍ଷ୍ଟ-କ୍ଲାସ କ୍ରିକେଟରୁ ଅବସର ଘୋଷଣା କରିଛନ୍ତି। ଅର୍ଥାତ୍ ଏଣିକି କ୍ରିକେଟପ୍ରେମୀମାନେ ତାଙ୍କୁ ରେଡ-ବଲ କ୍ରିକେଟରେ ଖେଳୁଥିବା ଦେଖିପାରିବେ ନାହିଁ। ଚହଲ କେବେ ବି ଭାରତ ପାଇଁ ଟେଷ୍ଟ ମ୍ୟାଚ ଖେଳିନାହାନ୍ତି। ତେବେ ଦିନିକିଆ ଏବଂ ଟି-୨୦ ଦଳକୁ ତାଙ୍କର ପୁଣିଥରେ ଫେରିବା ଆଶା ଏବେ ବି ରହିଛି।
ଯୁଜବେନ୍ଦ୍ର ଚହଲ ଇନଷ୍ଟାଗ୍ରାମରେ ଏକ ପୋଷ୍ଟ ମାଧ୍ୟମରେ ନିଜର ଫର୍ଷ୍ଟ-କ୍ଲାସ କ୍ରିକେଟରୁ ଅବସର ଘୋଷଣା କରିଛନ୍ତି। ସେ କହିଛନ୍ତି ଯେ, ରେଡ-ବଲ କ୍ରିକେଟ ତାଙ୍କ ପାଇଁ କେବଳ ଏକ ସାଧାରଣ ଫର୍ମାଟ ନଥିଲା। ଫର୍ଷ୍ଟ-କ୍ଲାସ କ୍ରିକେଟ ତାଙ୍କୁ ଧୈର୍ଯ୍ୟ ଏବଂ କଠିନ ପରିସ୍ଥିତିରୁ ଉପରକୁ ଉଠିବାର କ୍ଷମତା ଶିଖାଇଛି।
ଚହଲ କହିଛନ୍ତି ଯେ, ଟେଷ୍ଟ ମ୍ୟାଚରେ ଘଣ୍ଟା ଘଣ୍ଟା ଧରି ପଡ଼ିଆରେ ସଂଘର୍ଷ କରିବାର ଆନନ୍ଦ ହିଁ ଅଲଗା। ତେବେ ଟେଷ୍ଟ କ୍ରିକେଟରେ ଡେବ୍ୟୁ କରିପାରିନଥିବାର ଅନୁତାପ ତାଙ୍କ ମନରେ ସବୁବେଳେ ରହିବ ବୋଲି ସେ କହିଛନ୍ତି। ନିଜର ଭାବପ୍ରବଣ ଇନଷ୍ଟାଗ୍ରାମ ପୋଷ୍ଟରେ ସେ ଲେଖିଛନ୍ତି, ଅବସର ଘୋଷଣା କରିବା ବହୁତ କଷ୍ଟକର ଲାଗୁଛି, କାରଣ ଟେଷ୍ଟ କ୍ରିକେଟ ଖେଳିବା ସବୁବେଳେ ମୋର ଏକ ସ୍ବପ୍ନ ଥିଲା। ସେ ଆହୁରି କହିଛନ୍ତି, ଟେଷ୍ଟ ଖେଳିବାର ସ୍ବପ୍ନ ପୂରଣ ହୋଇପାରିଲା ନାହିଁ ସତ, କିନ୍ତୁ ମୋର ଏହି ସ୍ମରଣୀୟ ଯାତ୍ରାକୁ ନେଇ ମୁଁ ଖୁସି। ଏହି ଫର୍ମାଟରେ ମିଳିଥିବା ପ୍ରତ୍ୟେକ ସୁଯୋଗ ପାଇଁ ମୁଁ କୃତଜ୍ଞ।
ଯୁଜବେନ୍ଦ୍ର ଚହଲ କେବଳ ଫର୍ଷ୍ଟ-କ୍ଲାସ କ୍ରିକେଟକୁ ବିଦାୟ ଦେଇଛନ୍ତି। ସେ ଏବେ ବି ଦିନିକିଆ ଏବଂ ଟି-୨୦ କ୍ରିକେଟରେ ସକ୍ରିୟ ରହିବେ। ଭାରତୀୟ ଦଳ ପାଇଁ ଦିନିକିଆ ଏବଂ ଟି-୨୦ ଫର୍ମାଟରେ ଖେଳିବାର ସ୍ବପ୍ନ ଏବେ ବି ଜୀବନ୍ତ ରହିଛି ବୋଲି ଚହଲ ସ୍ପଷ୍ଟ କରିଛନ୍ତି।
ନିଜ ପୋଷ୍ଟରେ ସେ ଲେଖିଛନ୍ତି, ଟିମ ଇଣ୍ଡିଆ ପାଇଁ ଖେଳିବାର ଭୋକ ଏବେ ବି ମୋ ଭିତରେ ରହିଛି। ମୋତେ ଲାଗୁଛି ଯେ, ମୋ ଭିତରେ ଏବେ ବି ବହୁତ କ୍ରିକେଟ ବାକି ଅଛି। ଦିନିକିଆ ଏବଂ ଟି-୨୦ରେ ଦେଶର ପ୍ରତିନିଧିତ୍ୱ କରିବାର ସୁଯୋଗ ପାଇଁ ମୁଁ ମୋର ସମସ୍ତ ପ୍ରୟାସ ଜାରି ରଖିବି।
ଯୁଜବେନ୍ଦ୍ର ଚହଲ ନିଜର ୪୯ଟି ଫର୍ଷ୍ଟ-କ୍ଲାସ ମ୍ୟାଚରେ ମୋଟ ୧୪୮ଟି ଉଇକେଟ୍ ନେଇଛନ୍ତି। ତେବେ ସେ କେବେ ବି ଭାରତୀୟ ଦଳ ପାଇଁ ଟେଷ୍ଟ ମ୍ୟାଚ ଖେଳିପାରିନାହାନ୍ତି। ଅନ୍ତର୍ଜାତୀୟ ସ୍ତରରେ ଭାରତ ପାଇଁ ସେ ୭୨ଟି ଦିନିକିଆ ମ୍ୟାଚରେ ୧୨୧ଟି ଉଇକେଟ୍ ଏବଂ ୮୦ଟି ଟି-୨୦ ମ୍ୟାଚ୍ରେ ୯୬ଟି ଉଇକେଟ୍ ହାସଲ କରିଛନ୍ତି।
