ନୂଆଦିଲ୍ଲୀ, ୧୯ା୧୦: ଦୁର୍ବଳ ରୋଗ ପ୍ରତିରୋଧକ ଶକ୍ତି, ଥକ୍କାପଣ ବା କ୍ଲାନ୍ତି, ଶକ୍ତିହୀନତା ଆଦି ପାଇଁ ଭାରତରେ ୨୬ରୁ ୪୦ ବର୍ଷ ବୟସ ବର୍ଗ (ମିଲେନିଆଲ୍ସ)ର ୪୬% ନିଜକୁ ଅପେକ୍ଷାକୃତ ବୟସ୍କ ବିବେଚନା କରୁଛନ୍ତି। ସେହିପରି ୧୮ରୁ ୨୫ ବର୍ଷ ବୟସ ବର୍ଗ (ଜେନ୍ ଜେଡ୍)ର ୪୦% ଅନୁରୂପ ଅନୁଭବ କରୁଥିବା ସଦ୍ୟ ଏକ ରିପୋର୍ଟରୁ ଜଣାପଡ଼ିଛି। କିନ୍ତୁ ଏହାର ବିପରୀତରେ ୪୧ ବର୍ଷ ଏବଂ ତଦୁର୍ଦ୍ଦ ବୟସ ବର୍ଗ (ଜେନ୍ ଏକ୍ସ)ର ୮୨% ନିଜକୁ ଅଧିକ ଯୁବକ ଭାବୁଥିବାବେଳେ ସେମାନଙ୍କ ଏନର୍ଜି ଲେଭଲ ନିଜ ବୟସର ଲୋକଙ୍କ ତୁଳନାରେ ଅଧିକ ଥିବା ମନେ କରୁଛନ୍ତି। ‘ଲାଇଫ୍ଷ୍ଟାଇଲ୍ ଚଏସ୍ ଆଣ୍ଡ୍ ଏଜିଂ ପର୍ସେପ୍ଶନ୍ ଅଫ୍ ଅର୍ବାନ ଇଣ୍ଡିଆନ୍ସ’ ଶୀର୍ଷକ ଅଧ୍ୟୟନ ରିପୋର୍ଟରେ ଏହା ପ୍ରକାଶ ପାଇଛି।
ଇଣ୍ଡିଆର କ୍ୱାକର୍ ଫୁଡ୍ ବ୍ରାଣ୍ଡ୍ ଏବଂ ଲଣ୍ଡନସ୍ଥିତ ମାର୍କେଟ ରିସର୍ଚ୍ଚ ମେଜର ୟୁରୋମନିଟର ଇଣ୍ଟରନ୍ୟାଶନାଲ ପକ୍ଷରୁ ଏହି ଅଧ୍ୟୟନ କରାଯାଇଥିଲା। ଏଥିରେ ଦିଲ୍ଲୀ, ମୁମ୍ବାଇ, ବେଙ୍ଗାଲୁରୁ ଏବଂ କୋଲକାତାର ୧୮ ବର୍ଷରୁ ଊର୍ଦ୍ଧ୍ୱ ବୟସର ୧ ହଜାର ଜଣଙ୍କୁ ଗବେଷଣାରେ ସାମିଲ କରାଯାଇଥିଲା। ରିପୋର୍ଟ ଅନୁସାରେ, ଜେନ୍ ଏକ୍ସ ବର୍ଗର ଲୋକେ ସେମାନଙ୍କ ଶରୀର, ଜୀବନଶୈଳୀ ଏବଂ ନିଜ ଆବଶ୍ୟକତାକୁ ବୁଝିପାରୁଛନ୍ତି। ସେମାନଙ୍କ ମଧ୍ୟରୁ ୮୨% ସମବୟସର ଅନ୍ୟ ଲୋକଙ୍କ ତୁଳନାରେ ନିଜକୁ ଅଧିକ ଯୁବ ଏବଂ ସ୍ବାସ୍ଥ୍ୟବାନ୍ ଭାବୁଛନ୍ତି। କିନ୍ତୁ ଜେନ୍ ଜେଡ୍ ବର୍ଗର ୪୦% ଏବଂ ୪୬% ମିଲେନିଆଲ୍ସ ଏବେର ବୟସରେ ନିଜକୁ ଅଧିକ ବୟସ୍କ ଏବଂ ଶକ୍ତିହୀନ ତଥା ଦୁର୍ବଳ ମନେ କରୁଛନ୍ତି। ପୁରୁଷଙ୍କ ତୁଳନାରେ ମହିଳାମାନେ ଅଧିକ ବୟସ୍କ ଅନୁଭବ କରୁଥିବା ଅଧ୍ୟୟନରେ ଭାଗ ନେଇଥିବା ବ୍ୟକ୍ତିମାନେ କହିଛନ୍ତି। ଜେନ୍ ଏକ୍ସର ୪୦%ରୁ ଊର୍ଦ୍ଧ୍ୱ କେବେ ନିଜ ସକାଳ ଜଳଖିଆ ବା ବ୍ରେକ୍ଫାଷ୍ଟ ମିସ୍ କରୁନାହାନ୍ତି। ସକାଳର ବ୍ୟସ୍ତତା ଏବଂ କାର୍ଯ୍ୟଦିବସର ପ୍ରଭାବରେ ଜେନ୍ ଜେଡ୍ର ୫୦% ଏବଂ ମିଲେନିଆଲ୍ସ ବର୍ଗର ୬୧%ରୁ ଊର୍ଦ୍ଧ୍ୱ ସକାଳ ଖାଦ୍ୟ ଖାଉ ନ ଥିବା ସ୍ବୀକାର କରିଛନ୍ତି।
ମହାମାରୀ ପରେ ଖାଦ୍ୟପାନୀୟ ଶୈଳୀରେ ବ୍ୟାପକ ପରିବର୍ତ୍ତନ ଆସିଥିବା ଏବଂ ଲୋକେ ସ୍ବାସ୍ଥ୍ୟ ପ୍ରତି ଅଧିକ ଯତ୍ନବାନ ହୋଇଥିବା ମୋଟ ଅଂଶଗ୍ରହଣକାରୀଙ୍କ ମଧ୍ୟରୁ ୮୨% କହିଛନ୍ତି। ପୂର୍ବାପେକ୍ଷା ଅଧିକ ଲୋକ ଶୀଘ୍ର ବୟସ୍କ ନ ହେବା ପାଇଁ ଉତ୍ତମ ଖାଦ୍ୟ ନିଜ ଭୋଜନରେ ସାମିଲ କରିଛନ୍ତି। ଅଧ୍ୟୟନରେ ସାମିଲ ହୋଇଥିବା ଲୋକଙ୍କ ମଧ୍ୟରୁ ୭୦% ଅଧିକ ପୋଷକ ତତ୍ତ୍ୱ ଥିବା ଖାଦ୍ୟ ଖାଉଛନ୍ତି। ସେହିପରି ୪୪% ପ୍ରତ୍ୟେକ ଭୋଜନରେ ଭିଟାମିନ୍ ତଥା ଭିଟାମିନ୍ ସପ୍ଲିମେଣ୍ଟ ସାମିଲ କରିଥିବା ରିପୋର୍ଟରେ କୁହାଯାଇଛି।
