ବାରିପଦା ଅଫିସ,୩୦ା୪: ମୟୂରଭଞ୍ଜ ଜିଲା ବେତନଟୀ ରେଞ୍ଜ ଅଧୀନ ଛଚିନାପଦାରେ ହାତୀ ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ଖବର ପାଇ ବନ କର୍ମଚାରୀ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି। ମୃତକ ହେଲେ ନୂଆଗାଁ ଗ୍ରାମର ସିଂଗରାୟ ମାଝୀ(୪୫)।
ମିଳିଥିବା ସୂଚନା ମୁତାବକ, ଦୁଇଦିନ ହେଲା ଝାଡ଼ଖଣ୍ଡରୁ ଆସିଥିବା ୭୧ ଟିକିଆ ହାତୀପଲ ମନତାପାଳ ଶାଳ ଜଙ୍ଗଲରେ ରହିଛନ୍ତି। ଶୁକ୍ରବାର ରାତିରେ ଖାଦ୍ୟ ଅନ୍ବେଷଣରେ ଛଚିନାପଦା ଗ୍ରାମକୁ ୧୧ଟି ହାତୀ ପଶି ଆସିଥିଲେ। ଶନିବାର ସକାଳେ ସିଂଗରାୟ କୌଣସି କାମରେ ବାହାରିଥିବା ବେଳେ ହାତୀ ହାବୁଡରେ ପଡ଼ି ଯାଇଥିଲେ। ହାତୀପଲ ତାଙ୍କୁ ଦଳି ଦେଇଥିଲେ। ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଏ ନେଇ ଅଞ୍ଚଳବାସୀ ଆତଙ୍କିତ ଅବସ୍ଥାରେ ଥିବା ବେଳେ ତୁରନ୍ତ ହାତୀ ଘଉଡାଇବାକୁ ଦାବି କରିଛନ୍ତି।
