ନୂଆଦିଲ୍ଲୀ,୨୫।୮: ଉତ୍ତର ପ୍ରଦେଶର ଯୋଗୀ ସରକାର ମଙ୍ଗଳବାର ଦିନ ‘ଲୋକମାତା ଅହଲ୍ୟାବାଈ ମାତୃଶକ୍ତି ଯୋଜନା’ ସମେତ ୨୪ଟି ପ୍ରସ୍ତାବକୁ ମଞ୍ଜୁରୀ ଦେଇଛନ୍ତି। ସିଏମ୍ ଯୋଗୀ ୬୦ ବର୍ଷରୁ ଅଧିକ ବୟସର ମହିଳାମାନଙ୍କୁ ଏକ ବଡ଼ ଉପହାର ଦେଇଛନ୍ତି। ଏବେ ଏହି ମହିଳାମାନେ ଉତ୍ତର ପ୍ରଦେଶ ରାଜ୍ୟ ସଡ଼କ ପରିବହନ ନିଗମର ସମସ୍ତ ବସ୍ରେ ଆଜୀବନ ମାଗଣାରେ ଯାତ୍ରା କରିପାରିବେ। ଏହି ସୁବିଧାର ଫାଇଦା ଉଠାଇବା ପାଇଁ ପରିଚୟ ପତ୍ର (ଯେପରିକି ଭୋଟର ଆଇଡି କିମ୍ବା ଅନ୍ୟାନ୍ୟ ପରିଚୟ ପତ୍ର) ଦେଖାଇବା ଜରୁରୀ ହେବ। ସିଏମ୍ ଯୋଗୀ ବୁଧବାର ଦିନ ଏହି ଯୋଜନାର ଶୁଭାରମ୍ଭ କରିବେ। ଆଶା କରାଯାଉଛି ଯେ ୟୁପି ସରକାରଙ୍କ ଏହି ଅନନ୍ୟ ପଦକ୍ଷେପ ଦ୍ୱାରା ୧ କୋଟିରୁ ଅଧିକ ମହିଳା ଲାଭବାନ୍ ହୋଇପାରିବେ।
ବିଜେପି ୨୦୨୨ ୟୁପି ବିଧାନସଭା ନିର୍ବାଚନ ସମୟରେ ପ୍ରତିଶ୍ରୁତି ଦେଇଥିଲା ଯେ ସେମାନେ ୬୦ ବର୍ଷରୁ ଅଧିକ ବୟସର ମହିଳାମାନଙ୍କୁ ମାଗଣା ବସ୍ ଯାତ୍ରା ସୁବିଧା ଯୋଗାଇଦେବେ। ଏବେ କ୍ୟାବିନେଟ୍ ବୈଠକରେ ଏହା ଉପରେ ମୋହର ଲାଗିଛି। ୟୁପି ସରକାରଙ୍କ ପରିବହନ ମନ୍ତ୍ରୀ ଦୟାଶଙ୍କର ସିଂହ ଗଣମାଧ୍ୟମ ସାମ୍ନାରେ ଏହି ବିଷୟରେ ସୂଚନା ଦେଇଛନ୍ତି। ସେ ଜଣାଇଛନ୍ତି ଯେ ଏବେ ୬୦ ବର୍ଷ କିମ୍ବା ତା’ଠାରୁ ଅଧିକ ବୟସର ମହିଳାମାନେ ଆଜୀବନ ମାଗଣାରେ ବସ୍ରେ ଯାତ୍ରା କରିପାରିବେ। ପରିବହନ ମନ୍ତ୍ରୀ କହିଛନ୍ତି ଯେ ପ୍ରାୟ ଏକ କୋଟି ମହିଳା ଭୋଟର ଆଇଡି କାର୍ଡ କିମ୍ବା ଅନ୍ୟାନ୍ୟ ସରକାରୀ ପରିଚୟ ପତ୍ର ଦେଖାଇ ଏହି ଯୋଜନାର ଲାଭ ଉଠାଇପାରିବେ। ତାଙ୍କ କହିବାନୁସାରେ, ରକ୍ଷାବନ୍ଧନ ପୂର୍ବରୁ ମହିଳାମାନଙ୍କୁ ସିଏମ୍ ଯୋଗୀ ଏକ ବଡ଼ ଉପହାର ଦେଇଛନ୍ତି।
ରକ୍ଷାବନ୍ଧନ ଦିନ ଯୋଗୀ ସରକାର ସମସ୍ତ ମହିଳାଙ୍କୁ ବଡ଼ ସୌଗାତ ଦେଇଛନ୍ତି, ଯାହା ଅଧୀନରେ ମହିଳାମାନେ ବସ୍ରେ ମାଗଣା ଯାତ୍ରା କରିପାରିବେ। ରକ୍ଷାବନ୍ଧନ ଦିନ ଅର୍ଥାତ୍ ୨୭ ଅଗଷ୍ଟ ରାତିରୁ ୨୮ ଅଗଷ୍ଟ ରାତି ପର୍ଯ୍ୟନ୍ତ ମହିଳାମାନେ ଉତ୍ତର ପ୍ରଦେଶ ଷ୍ଟେଟ୍ ରୋଡ୍ ଟ୍ରାନ୍ସପୋର୍ଟ କର୍ପୋରେସନ୍ (UPSRTC) ବସ୍ରେ ନିଜର କୌଣସି ଜଣେ ସାଥୀଙ୍କ ସହିତ ମାଗଣାରେ ଯାତ୍ରା କରିପାରିବେ। ଯୋଗୀ ସରକାର ପରିବହନ ବିଭାଗ, ପୋଲିସ୍ ଏବଂ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ଯେ ସେମାନେ ମହିଳାମାନଙ୍କ ସୁରକ୍ଷା ଏବଂ ଯାତ୍ରାକୁ ସହଜ କରିବା ପାଇଁ ସମସ୍ତ ପ୍ରକାରର ବ୍ୟବସ୍ଥା କରନ୍ତୁ।
