ବମ୍ବେ: ନୂଆ ବର୍ଷ ଉପଲକ୍ଷେ ପତ୍ନୀଙ୍କୁ ଖାସ୍ ଉପହାର ଦେଇଛନ୍ତି ଅଭିନେତା ଶୋଏବ ଇବ୍ରାହିମ୍। ସେଇଟି ହେଲା ଏକ ନୂଆ ବିଏମ୍ଡବ୍ଲୁ ଏକ୍ସ୭। ସୋସିଆଲ ମିଡିଆରେ ଏକ ପୋଷ୍ଟ କରି ଅଭିନେତା ଏନେଇ ଜଣାଇଛନ୍ତି।
ଉଭୟଙ୍କ ଏକ ଫଟୋ ଶେୟାର କରି ଶୋଏବ କହିଛନ୍ତି, ୨୦୨୨ର ଯାତ୍ରା ସତରେ ବହୁତ ସୁନ୍ଦର ଥିଲା। ସମସ୍ତଙ୍କ ଆଶୀର୍ବାଦ ଆମ ସହ ଥିଲା। ଆଜି ଆମେ ଯେଉଁଠି ଛିଡ଼ା ହୋଇଛୁ, ପରିବାର ସହ ମିଶି ଏହି ନୂଆ ଉପଲବ୍ଧିର ସେଲିବ୍ରେଟ୍ କରୁଛୁ। ଆଜି ନିଜର ନୂଆ ଦାମୀ କାର୍ ବିଏମ୍ଡବ୍ଲୁ ଏକ୍ସ ୭କୁ ଘରକୁ ନେଇ ଯାଉଛୁ। ଏହି ମୁହୂର୍ତ୍ତ ଆମ ସମସ୍ତଙ୍କ ପାଇଁ ଆଶୀର୍ବାଦ, ଖୁସିରେ ପରିପୂର୍ଣ୍ଣ। ଦୀପିକା ଏହା ଖାସ୍ ତୁମ ପାଇଁ ବୋଲି ସେ ଲେଖିଛନ୍ତି।
ଉଭୟଙ୍କ ଲଭ୍ଷ୍ଟୋରୀ ବିଷୟରେ କଥା ହେଲେ, ‘ସସୁରାଲ ସିମର କା’ ଶୁଟିଂ ସେଟ୍ରେ ଦୀପିକାଙ୍କୁ ଭେଟିଥିଲେ ଶୋଏବ। ସେଠାରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ହେଲେ ଦୀପିକା ପୂର୍ବରୁ ବିବାହିତା ଥିଲେ। ଏଣୁ ଉଭୟଙ୍କ ଭବିଷ୍ୟତ ସେତେଟା ସହଜ ନ ଥିଲା। ପ୍ରଥମେ ଦୀପିକା ୨୦୧୫ରେ ପ୍ରଥମ ସ୍ବାମୀଙ୍କଠାରୁ ଅଲଗା ହୋଇଥିଲେ। ପରେ ତିନି ବର୍ଷ ଧରି ପରସ୍ପରକୁ ଡେଟ୍ କରିବା ପରେ ୨୦୧୮ରେ ଦୁହେଁ ବିବାହ କରିଥିଲେ।
