ବିଶ୍ୱକପ୍‌ରେ ଭାଗ ନେବେ ରେସ୍‌ଲର ନରସିଂହ
7:32 amDecember 5, 2020December 5, 2020 / 21

ନୂଆଦିଲ୍ଲୀ, ୫ା୧୨ (ପି.ଟି.)-କୋଭିଡ୍‌ ଟେଷ୍ଟରେ ନେଗେଟିଭ ଆସିବା ପରେ ସର୍ବିୟାରେ ହେବାକୁଥିବା ଆଗାମୀ ବିଶ୍ୱକପ୍‌ରେ ରେସ୍‌ଲର ନରସିଂହ ଯାଦବଙ୍କ ଅଂଶଗ୍ରହଣ ଶୁକ୍ରବାର ସ୍ପଷ୍ଟ ହୋଇଛି। ଡୋପିଂ ପାଇଁ ୪ ବର୍ଷ ବାସନ୍ଦ ଦଣ୍ଡ ଭୋଗି ସାରିବା ପରେ ପ୍ରତିଯୋଗିତମୂଳକ ରେସ୍‌ଲିଂକୁ ଫେରିବେ ଏହି ଭାରତୀୟ ରେସ୍‌ଲର। ୭୪କେଜି ଶ୍ରେଣୀରେ ଜିତେନ୍ଦର କିନ୍‌ହାଙ୍କ ସ୍ଥାନରେ ନରସିଂହଙ୍କୁ ଭାରତୀୟ ଦଳରେ ସ୍ଥାନ ମିଳିଥିଲା। ମାତ୍ର କୋଭିଡ୍‌ ଟେଷ୍ଟରେ ପଜିଟିଭ ପରେ ପ୍ରତିଯୋଗିତାରେ ଅଂଶଗ୍ରହଣ ନେଇ ସନ୍ଦେହ ସୃଷ୍ଟି ହୋଇଥିଲା। ଡିସେମ୍ବର ୧୪ରେ ସେ ପୁରୁଷ ଫ୍ରିଷ୍ଟାଇଲ ଦଳ ସହ ବେଲଗ୍ରେଡ୍‌ ଗସ୍ତ କରିବେ ବୋଲି ରେସ୍‌ଲିଂ ଫେଡେରେଶନ ଅଫ୍‌ ଇଣ୍ଡିଆ(ଡବ୍ଲ୍ୟୁଏଫ୍‌ଆଇ) ସୂଚନା ଦେଇଛି। ସର୍ବିୟାରେ ଭଲ ପ୍ରଦର୍ଶନ ନେଇ ନରସିଂହ ଆଶାବାଦୀ। ବଜରଙ୍ଗ ପୁନିଆ ଓ ଭିନେଶ ଫୋଗତଙ୍କ ସମେତ ବହୁ ଟପ୍‌ ରେସଲର ଇଭେଣ୍ଟରୁ ଓହରିଯାଇଛନ୍ତି। କିନ୍ତୁ ନରସିଂହଙ୍କ ଅଂଶଗ୍ରହଣ ଯୋଗୁ ଡିସେମ୍ବର ୧୨ରୁ ୧୮ପର୍ଯ୍ୟନ୍ତ ହେବାକୁଥିବା ବିଶ୍ୱକପ୍‌ରେ ଭାରତର ପଦକ ସମ୍ଭାବନା ଦେଖା ଦେଇଛି।