ସାରା ଦେଶରେ କରୋନା ଭାଇରସ୍ ସଂକ୍ରମଣର ପ୍ରକୋପ ଜାରି ରହିଛି। ଏହି ସମୟରେ ଲୋକମାନେ ଯାତ୍ରା କରିବା ତ ଦୂରର କଥା ବାହାରେ ବୁଲିବା ବି ଭୁଲିଗଲେଣି। ହେଲେ ବିଳାସପୂର୍ଣ୍ଣ ଥିବା ଏକ ଟ୍ରେନ୍ ବିଷୟରେ ଜାଣିଲେ ଯାତ୍ରା କରିବାକୁ ମନବଳିଯିବ। ମହାରାଜା ଏକ୍ସପ୍ରେସର ଯାତ୍ରା ବିଶ୍ୱର ସବୁଠାରୁ ବିଳାସପୂର୍ଣ୍ଣ ଓ ମହଙ୍ଗା ଟ୍ରେନ୍ ଯାତ୍ରା ଭାବେ ବେଶ୍ ଜଣାଶୁଣା। ଏହାକୁ ଦେଖିଲେ କୌଣସି ୫ଷ୍ଟାର ହୋଟେଲ ମଧ୍ୟ ଫିକା ପଡ଼ିଯିବ। ଏହି ଟ୍ରେନରେ ଯାତ୍ରୀମାନଙ୍କୁ ରାଜା ମହାରାଜାଙ୍କ ଭଳି ସୁବିଧା ମିଳୁଥିବା ବେଳେ ଯାତ୍ରୀମାନେ ରାଜକୀୟ ଅନୁଭୂତି ଅନୁଭବ କରିଥାନ୍ତି। ମହାରାଜା ଏକ୍ସପ୍ରେସ ଟ୍ରେନ୍କୁ କେତେଥର ଓ୍ବାଲର୍ଡ ଟ୍ରାଭେଲ ଆଓ୍ବାର୍ଡରେ ମଧ୍ୟ ସମ୍ମାନିତ କରାଯାଇସାରିଛି। ହେଲେ ଏହି ଟ୍ରେନ୍ରେ ଯାତ୍ରା କରିବାକୁ ହେଲେ ଟିକେଟର ଦାମ୍ କେତେ ଜାଣିଛନ୍ତି। ଏହାର ଟିକେଟର ଦାମ୍ ୧୮ଲକ୍ଷ ଟଙ୍କା ପର୍ଯ୍ୟନ୍ତ ରହିଛି। ଶୁଣିଲେ ଆଶ୍ଚର୍ଯ୍ୟ ଲାଗୁଥିବା ହେଲେ କଥାଟି ସତ।
ଯାତ୍ରୀମାନଙ୍କୁ ବିଳାସପୂର୍ଣ୍ଣ ଅନୁଭୂତି ସହ ଭାରତ ଦର୍ଶନ କରାଇବା ଉଦ୍ଦେଶ୍ୟରେ ୨୦୧୦ରେ ମହାରାଜା ଏକ୍ସପ୍ରେସ୍ ଆରମ୍ଭ ହୋଇଥିଲା। ୧ କିଲୋମିଟର ଲମ୍ବ ଏହି ଟ୍ରେନ୍ରେ ମୋଟ ୨୩ଟି ବଗି ରହିଛି। ଏହି ୨୩ଟି ବଗିରେ କେବଳ ୮୮ଜଣ ଯାତ୍ରା କରିପାରିବେ। କାରଣ ଯାତ୍ରୀଙ୍କ ସଂଖ୍ୟା କମ୍ ରହିେଲେ ସେମାନଙ୍କୁ ଭଲରେ ରାଜକୀୟ ସେବା ପ୍ରଦାନ କରାଯାଇପାରିବ ବୋଲି କୁହାଯାଏ। ମହାରାଜା ଏକ୍ସପ୍ରେସ୍ ଟ୍ରେନ୍ରେ ମୌର ମହଲ ଓ ରଙ୍ଗ ମହଲ ନାମରେ ୨ଟି ରେଷ୍ଟୁରାଣ୍ଟ ରହିଛି। ଏହି ଭବ୍ୟ ରେଷ୍ଟୁରାଣ୍ଟର ସାଜସଜ୍ଜାକୁ ଦେଖିଲେ ଯାକାହାରି ବି ଆଖି ଲାଖିଯିବ।
ରେଷ୍ଟୁରାଣ୍ଟର ସବୁଠାରୁ ବିଶେଷତଃ କଥା ହେଲା ଏଥିରେ ୨୪ କ୍ୟାରେଟ ସୁନାରେ ଆବୃତ ହୋଇଥିବା ବାସନରେ ଖାଦ୍ୟ ପରଷାଯାଇଥାଏ। ୨ଟି ଯାକ ରେଷ୍ଟୁରାଣ୍ଟରେ ଇଣ୍ଡିଆନ, ଚାଇନିଜ୍, କଣ୍ଟିନେଣ୍ଟାଲ ଓ ମଓ୍ବୋଡ଼ି ଖାଦ୍ୟର ଲାଭ ଉଠାଇପାରିବେ। ଏହି ରାଜକୀୟ ଟ୍ରେନ୍ ଦିଲ୍ଲୀ, ଆଗ୍ରା, ବିକାନେର, ଫତେହପୁର ସିକରି, ଓରଛା, ଖଜୁରାହୋ, ଜୟପୁର, ଯୋଧପୁର, ଉଦୟପୁର, ବାରଣାସୀ ଓ ମୁମ୍ବାଇ ମାର୍ଗ ଦେଇ ଯାତ୍ରା କରିଥାଏ। ଏହି ଯାତ୍ରା ସମୟରେ ଯାତ୍ରୀମାନଙ୍କୁ ୫ଷ୍ଟାର ହୋଟେଲର ସମସ୍ତ ସୁବିଧା ଯୋଗାଇ ଦିଆଯାଇଥାଏ।
ଏହି ଟ୍ରେନ୍ରେ ୮୮ଜଣ ଯାତ୍ରୀଙ୍କ ପାଇଁ ମୋଟ ୪୩ଟି ଅତିଥି କ୍ୟାବିନ ରହିଛି। ସେଥିମଧ୍ୟରୁ ୨୦ଟି ଡିଲକ୍ସ କ୍ୟାବିନ, ୧୮ଟି ଜୁନିୟର ସୁଇଟ, ୪ସୁଇଟ ଓ ଗୋଟିଏ ଗ୍ରାଣ୍ଡ ପ୍ରେସିଡେନ୍ସିଆଲ ସୁଇଟ୍ ରହିଛି। ପ୍ରତ୍ୟେକ କ୍ୟାବିନରେ ୨ଜଣ ବ୍ୟକ୍ତି ରହିବାର ସୁବିଧା ଥିବା ବେଳେ କେବଳ ପ୍ରେସିଡେନ୍ସିଆଲ ସୁଇଟରେ ୪ଜଣ ଯାତ୍ରୀ ଯାତ୍ରା କରିପାରିବେ। ଏହି କ୍ୟାବିନ ସବୁଠାରୁ ମହଙ୍ଗା ଥିବା ବେଳେ ଏହା ନବରତ୍ନ ନାମରେ ମଧ୍ୟ ନାମିତ କରାଯାଇଛି।
