ଭଞ୍ଜନଗର, ୬ ଜୁନ୍ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ସହରର ଏକ ସାହିରେ କୂଅ ସଫା କରିବା ସମୟରେ ଜଣେ ଶ୍ରମିକ ବିଷାକ୍ତ ଗ୍ୟାସ ସଂସ୍ପର୍ଶରେ ଆସି ଗୁରୁତର ହୋଇପଡ଼ିଛନ୍ତି। ବ୍ଲିଚିଂ ପାଉଡରରୁ ନିର୍ଗତ ତୀବ୍ର ଗ୍ୟାସ ଯୋଗୁଁ ସେ କୂଅ ଭିତରେ ହିଁ ଅଣନିଶ୍ୱାସୀ ହୋଇଯାଇଥିଲେ। ତେବେ ଅଗ୍ନିଶମ ବାହିନୀର ସଠିକ୍ ସମୟରେ ପହଞ୍ଚି ତାଙ୍କୁ ଉଦ୍ଧାର କରିବା ଯୋଗୁଁ ଏକ ବଡ଼ ବିପତ୍ତି ଟଳିଯାଇଛି।
ଘଟଣାରୁ ପ୍ରକାଶ ଯେ, ବେଲଗୁଣ୍ଠା ବ୍ଲକ ଧୂମୁଛାଇ ଗ୍ରାମର ସୀମାଞ୍ଚଳ ସ୍ବାଇଁ (୨୫) ଏବଂ ଅନ୍ୟ ଜଣେ ଶ୍ରମିକ ମିଶି ଆଜି ଭଞ୍ଜନଗର ସ୍ଥିତ ଏକ ସାହିକୁ କୂଅ ସଫା କରିବା ପାଇଁ ଆସିଥିଲେ। କୂଅ ସଫା କରିବା ପ୍ରକ୍ରିୟା ଚାଲିଥିବା ବେଳେ ପାଣିକୁ ବିଶୋଧନ କରିବା ପାଇଁ ସେଥିରେ ବ୍ଲିଚିଂ ପାଉଡର ପକାଯାଇଥିଲା। ତେବେ ବ୍ଲିଚିଂ ପାଉଡର ପଡ଼ିବା ମାତ୍ରେ ସେଥିରୁ ଏକ ପ୍ରତିକ୍ରିୟାଶୀଳ ଏବଂ ତୀବ୍ର ଗ୍ୟାସ ବାହାରିଥିଲା, ଯାହା ଫଳରେ କୂଅ ଭିତରେ ଥିବା ସୀମାଞ୍ଚଳ ହଠାତ୍ ଅଣନିଶ୍ୱାସୀ ହୋଇ ଗୁରୁତର ଭାବେ ଅସୁସ୍ଥ ହୋଇପଡ଼ିଥିଲେ।
ସୀମାଞ୍ଚଳ କୂଅ ଭିତରେ ଅଚେତ ପ୍ରାୟ ହୋଇଯିବା ଦେଖି ସ୍ଥାନୀୟ ଲୋକେ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ। ଖବର ପାଇ ଭଞ୍ଜନଗର ଦମକଳ ବାହିନୀର କର୍ମଚାରୀମାନେ ବିନା ସମୟ ନଷ୍ଟ କରି ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ସ୍ୱେଶାଲ ଉପକରଣ ସାହାଯ୍ୟରେ କୂଅ ଭିତରୁ ଶ୍ରମିକଙ୍କୁ ଗୁରୁତର ଅବସ୍ଥାରେ ସୁରକ୍ଷିତ ଭାବେ ବାହାରକୁ ଉଦ୍ଧାର କରିଥିଲେ।
ଉଦ୍ଧାର କରାଯିବା ପରେ ତୁରନ୍ତ ତାଙ୍କୁ ଚିକିତ୍ସା ପାଇଁ ଭଞ୍ଜନଗର ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତରଙ୍କ ଜରୁରୀକାଳୀନ ଚିକିତ୍ସା ପରେ ବର୍ତ୍ତମାନ ସୀମାଞ୍ଚଳଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିଥିବା ଜଣାପଡ଼ିଛି।
ବର୍ତ୍ତମାନ ସମଗ୍ର ଅଞ୍ଚଳରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି। ଏଭଳି ପରିସ୍ଥିତିରେ କୂଅ ବା ଗଭୀର ସ୍ଥାନ ସଫା କରିବା ସମୟରେ ଭିତରେ ଅକ୍ସିଜେନ୍ର ଅଭାବ ଏବଂ ଗ୍ୟାସ ଜମି ରହିବାର ସମ୍ଭାବନା ଅଧିକ ଥାଏ। ତେଣୁ କୂଅ ସଫା କରିବା ସମୟରେ ଲୋକେ ସମ୍ପୂର୍ଣ୍ଣ ସତର୍କତା ଅବଲମ୍ବନ କରିବା ସହ ସୁରକ୍ଷା ନିୟମ ପାଳନ କରିବାକୁ ଅଗ୍ନିଶମ କର୍ମଚାରୀ ସନାତନ ମହାପାତ୍ର ଜନସାଧାରଣଙ୍କୁ ନିବେଦନ କରିଛନ୍ତି।
