ନୂଆପଡା,୨୦।୫ (ମକାରୁ ବେମାଲ): ନୂଆପଡ଼ା ସଦର ମହକୁମା ଏକତା ଛକଠାରେ ମଙ୍ଗଳବାର ଏକ ସଡ଼କ ଦୁର୍ଘଟଣା ଘଟିଛି। ଏକ ଟ୍ରକ ଧକ୍କାରେ ସ୍ବାମୀଙ୍କ ଆଗରେ ସ୍ତ୍ରୀଙ୍କ ଜୀବନ ଚାଲିଯାଇଛି। ଦୁର୍ଘଟଣାରେ ସ୍ବାମୀ ଗୁରୁତର ହୋଇଛନ୍ତି l ମୃତକ ମହିଳା କୋମନା ଥାନା ଦର୍ଲିପଡା ପଞ୍ଚାୟତ ରେଙ୍ଗାବାହଲ ଗାଁ ର ରୁକ୍ମଣୀ ସାହୁ (୪୫) l
ସୂଚନା ମୁତାବକ, ଛବିଲାଲ ସାହୁ (୫୦) ଓ ରୁକ୍ମଣୀ ଏକ ବାଇକରେ ରେଙ୍ଗାବାହାଲ ଗାଁରୁ ବୁଢ଼ୀପାଲି ପଞ୍ଚାୟତ ଜାମଲି ଗାଁ ଶ୍ୱଶୁର ଘରକୁ ଯାଉଥିଲେ l ସେହି ସମୟରେ ନୂଆପଡା ଏକତା ଛକଠାରେ ବାଇକକୁ ଟ୍ରକ ଧକ୍କା ଦେବାରୁ ଉଭୟ ଦମ୍ପତି ଛିଟିକି ପଡ଼ିଥିଲେ l ସ୍ଥାନୀୟ ଲୋକ ଓ ପୋଲିସ କର୍ମଚାରୀ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟକୁ ନେଇ ଭର୍ତ୍ତି କରିଥିଲେ l ସେଠାରେ ଡାକ୍ତର ରୁକ୍ମଣୀଙ୍କୁ ମୃତ ଘୋଷଣା କରିଥିଲେ l ଛବିଲାଲ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ସଦର ଥାନା ପୋଲିସ ଘଟଣାସ୍ଥଳରେ ତଦନ୍ତ ଆରମ୍ଭ କରିଛି। ପରିବାର ଲୋକେ ଆସିଲେ ବ୍ୟବଚ୍ଛେଦ ପରେ ହସ୍ତାନ୍ତର କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି l ଦୁର୍ଘଟଣା ଘଟାଇ ଥିବା ଟ୍ରକ ଓ ବାଇକକୁ ପୋଲିସ ଜବତ କରି ଅଟକ ରଖିଛି l
