କୁହାଯାଏ ପ୍ରେମ ଅନ୍ଧ। ପ୍ରେମ ପାଇଁ ଯେକୌଣସି ସ୍ତରକୁ ଯିବାପାଇଁ ପଛାନ୍ତି ନାହିଁ। ବେଙ୍ଗାଲୁରୁରେ ଏପରି ଏକ ମାମଲା ସାମ୍ନାକୁ ଆସିଛି। ଏଠାରେ ଜଣେ ଯୁବତୀ ନିଜର ପୁରୁଣା ପ୍ରେମିକକୁ ଫେରାଇ ଆଣିବାକୁ ଚେଷ୍ଟା କରୁଥିବାବେଳେ ଲକ୍ଷ ଲକ୍ଷ ଟଙ୍କା ଠକାମିର ଶିକାର ହୋଇଛନ୍ତି। ବେଙ୍ଗାଲୁରୁରେ ରହୁଥିବା ଯୁବତୀ ଜଣଙ୍କ କୌଣସି ଧାରଣା ନ ଥିଲା ଯେ ପ୍ରେମ ରାସ୍ତାରେ ଗଲାବେଳେ ସେ ଠକାମିର ଶିକାର ହେବେ।
ବେଙ୍ଗାଲୁରୁରେ ରହୁଥିବା ଏହି ଯୁବତୀ ଜଣଙ୍କୁ ତାଙ୍କ ବୟଫ୍ରେଣ୍ଡ ବ୍ରେକ୍ଅପ୍ କରି ପଳାଇଥିଲେ। ଏଥିପାଇଁ ସେ ହତାଶ ହୋଇପଡ଼ିଥିଲେ। ତାଙ୍କୁ ପୁଣି ଥରେ ଫେରାଇ ଆଣିବା ପାଇଁ ସେ ଜ୍ୟୋତିଷଙ୍କ ସାହାରା ନେଇଥିଲେ। ୯ ଡିସେମ୍ବର ୨୦୨୩ରେ, ସେ ସୋସିଆଲ ମିଡିଆରେ ଅହମ୍ମଦ ନାମକ ଜଣେ ଜ୍ୟୋତିଷଙ୍କୁ ଭେଟିଥିଲେ। ସେ ତାଙ୍କ ସହଯୋଗୀ ଅବଦୁଲ ଏବଂ ଲିଆକୁତୁଲ୍ଲାଙ୍କ ସହ କାମ କରିଥିଲେ। ଅହମ୍ମଦ ଯୁବତୀଙ୍କୁ କହିଥିଲେ, କଳା ଯାଦୁ ସାହାଯ୍ୟରେ ସେ ତାଙ୍କ ବୟଫ୍ରେଣ୍ଡକୁ ଫେରି ପାଇବେ।
କଳା ଯାଦୁ କରିବା ପାଇଁ ଅହମ୍ମଦ ପ୍ରଥମେ ୫୦୧ ଟଙ୍କା ମାଗିଥିଲେ, ତେଣୁ ଯୁବତୀ ମଧ୍ୟ ତାଙ୍କ ଜାଲରେ ପଡ଼ିଯାଇଥିଲେ। ଏହା ପରେ ଜ୍ୟୋତିଷ ଯୁବତୀଙ୍କୁ ନିଜ, ସାଙ୍ଗ, ପରିବାର ଏବଂ ଅନ୍ୟାନ୍ୟ ଲୋକଙ୍କ ଫଟୋ ମାଗିଥିଲେ। ଏହା ପରେ ଅହମ୍ମଦ ଝିଅର ପୂର୍ବତନ ବୟଫ୍ରେଣ୍ଡ ଉପରେ କଳା ଯାଦୁ କରିବା ପାଇଁ ୨.୪ ଲକ୍ଷ ଟଙ୍କା ମାଗିଥିଲେ। ପ୍ରେମରେ ଭାବପ୍ରବଣ ହୋଇ ପୀଡିତା ଡିସେମ୍ବର ୨୨ରେ ଅହମ୍ମଦଙ୍କୁ ଟଙ୍କା ଦେଇଥିଲେ।
କିଛି ସମୟ ପରେ ଅଭିଯୁକ୍ତ ଜ୍ୟୋତିଷ ପୁନର୍ବାର ଝିଅଠାରୁ ଟଙ୍କା ମାଗିଥିଲେ। ସେ ୧.୭ ଲକ୍ଷ ଟଙ୍କା ମାଗିଥିଲେ, ଯୁବତୀ ଦେବାକୁ ମନା କରିଦେଇଥିଲେ। ଏଭଳି ପରିସ୍ଥିତିରେ ଅହମ୍ମଦ ତାଙ୍କୁ ଦୁର୍ବ୍ୟବହାର କରି ତାଙ୍କ ଅଶ୍ଳୀଳ ଫଟୋ ଭାଇରାଲ କରିବାକୁ ଧମକ ଦେଇଥିଲେ। ବଦନାମକୁ ଏଡାଇବା ପାଇଁ ପୀଡିତା ଜାନୁଆରୀ ୧୦ରେ ଅହମ୍ମଦଙ୍କୁ ୪.୧ ଲକ୍ଷ ଟଙ୍କା ଦେଇଥିଲେ।
ଏହା ପରେ ମଧ୍ୟ ଅହମ୍ମଦଙ୍କ ଧମକ ବନ୍ଦ ହୋଇ ନ ଥିଲା ଏବଂ ସେ ବାରମ୍ବାର ଟଙ୍କା ମାଗିବା ଆରମ୍ଭ କରିଥିଲେ। ଏଥିରେ ହତାଶ ହୋଇ ପୀଡିତା ଜଣକ ତାଙ୍କ ମାତାପିତାଙ୍କୁ ଏ ବିଷୟରେ ଜଣାଇଥିଲେ ଏବଂ ପରେ ସେମାନେ ପୋଲିସ ନିକଟରେ ଅଭିଯୋଗ କରିଥିଲେ। ଅନୁସନ୍ଧାନ ବେଳେ ପୋଲିସ ଜାଣିବାକୁ ପାଇଛି ଯେ, ସମସ୍ତ ଟଙ୍କା ଅହମ୍ମଦଙ୍କ ସହଯୋଗୀ ଲିଆକୁତୁଲ୍ଲାଙ୍କ ବ୍ୟାଙ୍କ ଆକାଉଣ୍ଟକୁ ହସ୍ତାନ୍ତର କରାଯାଇଛି। ଅଭିଯୁକ୍ତଙ୍କ ଫୋନ ବନ୍ଦ ଅଛି। ବର୍ତ୍ତମାନ ଘଟଣାର ତଦନ୍ତ ଚାଲିଛି।
