ଆଜିକାଲି ଅନଲାଇନ୍ ଶପିଂର ଚାହିଦା ବଢିଛି। ଫୋନ୍ରେ ଅର୍ଡର କଲା ମାତ୍ରେ ଯେକୌଣସି ଜିନିଷ ଘରେ ଆସି ପହଞ୍ଚି ଯାଉଛି। କିନ୍ତୁ ବେଳେବେଳେ ଅନଲାଇନ୍ ଅର୍ଡର କରି ଠକାମିର ଶିକାର ହେବାକୁ ପଡେ। ନିକଟରେ ଅନଲାଇନରେ ଅର୍ଡର ଦେଇ ବ୍ରିଟେନର ଜଣେ ମହିଳା ଫସିଯାଇଛନ୍ତି। ସମ୍ପୃକ୍ତ ମହିଳା ଜଣଙ୍କ ଆପଲ କମ୍ପାନୀର ମହଙ୍ଗା ଫୋନ ଅନଲାଇନରେ ଅର୍ଡର କରିଥିଲେ। ହେଲେ ତାଙ୍କ ପାଖରୁ ଗୋଟିଏ ଡଲାରର ହାତଧୁଆ ସାବୁନ ଆସି ପହଞ୍ଚିଛି। ଏହାକୁ ଦେଖି ସେ ଆଶ୍ଚର୍ଯ୍ୟ ହୋଇଯାଇଛନ୍ତି।
ବ୍ରିଟେନରେ ରହୁଥିବା ଖାଓଉଲା ଲାଫହେଲୀ ଅନଲାଇନରେ ପ୍ରାୟ ୧.୫ ଲକ୍ଷ ଟଙ୍କା ମୂଲ୍ୟର ଆଇଫୋନ ୧୩ ପ୍ରୋ ମାକ୍ସ ପାଇଁ ଅର୍ଡର କରିଥିଲେ। ମହିଳା ଜଣଙ୍କ ସ୍କାଏ ମୋବାଇଲ ଜରିଆରେ ୩୬ ମାସର କଣ୍ଟ୍ରାକ୍ଟରେ ଏହି ଫୋନ ପାଇଁ ଅର୍ଡର ଦେଇଥିଲେ। ଅର୍ଡର ଦେବା ପରେ ଫୋନ ଆସିବ ବୋଲି ଲାଫହେଲୀ ଉତ୍କଣ୍ଠାର ସହ ଅପେକ୍ଷା କରିଥିଲେ। ହେଲେ ଫୋନ ବଦଳରେ ତାଙ୍କ ପାଖକୁ ଗୋଟିଏ ଡଲାରର ସାବୁନ ଆସି ପହଞ୍ଚିଥିଲା। ଘଟଣା ପରେ ସେ ସ୍କାଏ ମୋବାଇଲରେ ନିଜ ଅଭିଯୋଗ ଦାଖଲ କରିଛନ୍ତି। ତଦନ୍ତ ପରେ କମ୍ପାନୀ ଲାଫହେଲୀଙ୍କୁ ସବୁ କଥା କହିବ ବୋଲି କହିଥିଲା। ହେଲେ ସେ ଏଯାଏ କୌଣସି ଉତ୍ତର ପାଇ ନାହାନ୍ତି। ଘଟଣା ପଛରେ ଡେଲିଭରୀ ବୟଙ୍କ ହାତ ରହିଛି ଓ ସେ ଟଙ୍କା ପାଇଁ ମୋବାଇଲ ଫୋନ ଚୋରି କରିଥିବା ଆଶଙ୍କା କରାଯାଉଛି। ତେବେ ଏ ସମ୍ପର୍କରେ କମ୍ପାନୀ କିମ୍ବା ଡେଲିଭରୀ ସଂସ୍ଥା କୌଣସି ପ୍ରକାରର ପ୍ରତିକ୍ରିୟା ଦେଇନାହିଁ। ତେବେ ଭାରତରେ ଏହି ସ୍ମାର୍ଟଫୋନ ୧,୨୯,୯୦୦ ଟଙ୍କାରେ ବିକ୍ରି ହେଉଛି।
