ଛିନ୍ଦବାଡା, ୧୬।୭- ନ୍ୟାୟ ନ ପାଇବାରୁ ଜଣେ ମହିଳା ଗଛ ଉପରେ ଚଢ଼ିଗଲେ। ଏଭଳି ଏକ ଘଟଣା ମଧ୍ୟପ୍ରଦେଶ ଛିନ୍ଦାବାଡା ଜିଲା ପରାସିଆ ତହସିଲ ପରିସରରେ ଦେଖିବାକୁ ମିଳିଛି। ଶେଷରେ ପୋଲିସ ଘଟଣା ସ୍ଥଳରେ ପହଞ୍ଚତ୍ ବହୁକଷ୍ଟରେ ମହିଳାଙ୍କୁ ଗଛରୁ ଓହ୍ଲାଇବାରେ ସଫଳ ହୋଇଥିଲା। ଘଟଣାରୁ ଜଣାପଡ଼ିଛି, ପାରିବାରିକ କଳହ ଯୋଗୁ ମହିଳା ଜଣଙ୍କ ତାଙ୍କ ସ୍ବାମୀଙ୍କଠାରୁ ଅଲଗା ରହୁଥିଲେ। ପିଲାମାନେ ବାପାଙ୍କ ପାଖରେ ରହୁଥିଲେ। କିନ୍ତୁ ମହିଳାଜଣଙ୍କ ଯେତେବେଳେ ପିଲାମାନଙ୍କୁ ଭେଟିବାକୁ ଯାଉଥିଲେ ତାଙ୍କୁ ସାକ୍ଷାତ୍ କରିବାର ଅନୁମତି ମିଳୁ ନ ଥିଲା। ଫଳରେ ମହିଳା ଜଣଙ୍କ ନ୍ୟାୟ ନ ପାଇ ନିରାଶ ହୋଇଥିଲେ। ଶେଷରେ ସେ ପରାସିଆ ତହସିଲ ପରିସରରେ ଥିବା ଏକ ବଡ଼ ଗଛରେ ଚଢ଼ିଯାଇ ନ୍ୟାୟ ପାଇଁ ଦାବି କରିଥିଲେ। ଏହାଦେଖି ଘଟଣାସ୍ଥଳ ଲୋକାରଣ୍ୟ ହୋଇଯାଇଥିଲା। ସୂଚନା ପାଇ ପୋଲିସ ଓ ପରାସିଆ ଏସ୍ଡିଏମ୍, ତହସିଲଦାର ଓ ଅନ୍ୟାନ ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚତ୍ଥିଲେ। ସମସ୍ତେ ମହିଳାଙ୍କୁ ତଳକୁ ଓହ୍ଲାଇବାକୁ ଅନୁରୋଧ କରିଥିଲେ। କିନ୍ତୁ ମହିଳା ଜଣଙ୍କ ନ୍ୟାୟ ପାଇଁ ନିଜ ଜିଦିରେ ଅଟଳ ଥିଲେ। ତେଣୁ ସେ ଗଛରୁ ଓହ୍ଲାଇ ନ ଥିଲେ। ଏହାପରେ ପୋଲିସ ଓ ଉଦ୍ଧାରକାରୀ ଦଳର ଏକ ଘଣ୍ଟାର ପ୍ରଚେଷ୍ଟା ପରେ ମହିଳାଜଣଙ୍କୁ ତଳକୁ ଆଣିବା ସଫଳ ହୋଇଥିଲେ। ଶେଷରେ ପରାସିଆ ସବ୍-ଡିଭିଜନାଲ ମାଜିଷ୍ଟେଟ୍ (ଏସ୍ଡିଏମ୍) ମହିଳାଙ୍କ ସ୍ବାମୀ ଓ ପିଲାମାନଙ୍କୁ ଡକାଇ ତାଙ୍କୁ ନ୍ୟାୟ ପ୍ରଦାନ କରିଥିଲେ।
