ଦିଗପହଣ୍ଡି,୫।୮(ଅଶେଷ ନାଥ ମିଶ୍ର): ଦିଗପହଣ୍ଡି ଥାନା ମହୁଡ଼ା ଗ୍ରାମ ରଘୁନାଥ ମଠ ସାହିର ଜଣେ ମହିଳାଙ୍କୁ ଘରୁ ଟାଣି ନେଇ ଗାଁ ଦାଣ୍ଡରେ ଦୁଇଜଣ ବ୍ୟକ୍ତି ସଂଘବଦ୍ଧ ଆକ୍ରମଣ କରିବା ସହ ଅସଦାଚରଣ କରିଥିବା ଅଭିଯୋଗ ହୋଇଛି। ଏନେଇ ମହିଳାଜଣଙ୍କ ଦିଗପହଣ୍ଡି ଥାନାରେ ଏତଲା ଦେବାପରେ ଭାରପ୍ରାପ୍ତ ଆଇଆଇସି ତଥା ଡିଏସପି ପ୍ରଶାନ୍ତ କୁମାର ପାତ୍ର ଥାନା ମାମଲା ନଂ.୨୭୫/୨୫ ଅନୁଯାୟୀ ଅଭିଯୁକ୍ତଦ୍ବୟଙ୍କ ବିରୋଧରେ ମକଦ୍ଦମା ରୁଜୁ କରି ତଦନ୍ତ ଚଳାଇଛନ୍ତି। ଗତ ଶନିବାର ରାତି ପ୍ରାୟ ୮ ଟାରେ ଗ୍ରାମର କୃଷ୍ଣ ସାହୁ ଏବଂ ପ୍ରତାପ ନାହାକ ମହିଳାଙ୍କ ଘର ପାଖକୁ ଆସି ତାଙ୍କୁ ଆପତ୍ତିଜନକ ଭାଷାରେ ଗାଳି କରିଥିଲେ। ମହିଳାଜଣକ ପ୍ରତିବାଦ କରିବାରୁ ତାଙ୍କୁ ଉଭୟେ ଘରୁ ଟାଣି ନେଇ ରାସ୍ତା ଉପରେ ପ୍ଲାଷ୍ଟିକ ପାଇପ୍ରେ ତାଙ୍କୁ ଆକ୍ରମଣ କରିବା ସହ ତାଙ୍କୁ ଉଲଗ୍ନ କରି ଅସଦାଚରଣ କରିଥିଲେ। ପ୍ରତାପ ପୂର୍ବରୁ ଏକ ହତ୍ୟା ମାମଲାରେ ଜେଲରୁ ଜାମିନରେ ଆସିଥିବାରୁ ଗାଁ ଲୋକେ ମହିଳାଙ୍କୁ ମାଡ଼ ମାରୁଥିବା ଦେଖୁଥିଲେ ମଧ୍ୟ ତାଙ୍କୁ ଉଦ୍ଧାର କରିବାକୁ କେହି ଆସି ନ ଥିବା ମହିଳାଜଣଙ୍କ ତାଙ୍କ ଏତଲାରେ ଉଲ୍ଲେଖ କରିଛନ୍ତି।
