ଘଟଗାଁ,୧।୧ (ଡି.ଏନ.ଏ.): କେନ୍ଦୁଝର ଜିଲା ଘଟଗାଁ ତାରିଣୀ ପୀଠରେ ଇଂରାଜୀ ନବବର୍ଷ ୨୦୨୨ର ପ୍ରଥମ ଦିନ ଶନିବାର ବିନା ଭକ୍ତରେ ମା’ଙ୍କ ସମସ୍ତ ନୀତିକାନ୍ତି, ମଙ୍ଗଳ ଆଳତି ସହ ସୁନାବେଶ ସମ୍ପନ୍ନ ହୋଇଛି।
କୋଭିଡ୍ କଟକଣା ଯୋଗୁ ମନ୍ଦିର ୩ ଦିନ ବନ୍ଦ ଥିବାରୁ ଭକ୍ତମାନଙ୍କୁ ନିରାଶ ହେବାକୁ ପଡ଼ିଛି। କେବଳ ସ୍ବଳ୍ପ ସଂଖ୍ୟକ ସେବାୟତ ଓ ମନ୍ଦିର କର୍ମଚାରୀ ଉପସ୍ଥିତ ରହି ମା’ଙ୍କ ପୂଜାନୀତି ସମ୍ପନ୍ନ କରିଥିଲେ। ସକାଳ ୫ଟାରୁ ମା’ଙ୍କର ମାଦର୍ଶା, ବଡ଼ସିଂହାର ବେଶ, ଷୋଡ଼ଶ ଉପଚାର ଓ ମଙ୍ଗଳ ଆଳତି ଆରମ୍ଭ ହୋଇ ସୁନାବେଶ କରାଯାଇଥିଲା।
ବରିଷ୍ଠ ପୂଜକ ଶ୍ୟାମସୁନ୍ଦର ଦେହୁରୀ, ସଦାନନ୍ଦ ଦେହୁରୀ, ପ୍ରଭାତ ଦେହୁରୀ ପ୍ରମୁଖ ସକାଳ ୭ଟାରେ ପୂଜାନୀତି ଶେଷ କରିଥିଲେ। ମନ୍ଦିର ପ୍ରଶାସନ ପକ୍ଷରୁ ସମସ୍ତ ଫାଟକ ବନ୍ଦ କରାଯାଇଥିବାରୁ ଭକ୍ତ ଓ ପର୍ଯ୍ୟଟକ ରାସ୍ତାରେ ରହି ମା’ଙ୍କୁ ମୁଣ୍ଡିଆ ମାରି ଫେରିଥିଲେ। ମନ୍ଦିର ପରିସର ଓ ବାହାରେ ପୋଲିସ, ସିକ୍ୟୁରିଟି ଗାର୍ଡ ମୁତୟନ ହୋଇଥିଲେ। ମନ୍ଦିର ଟ୍ରଷ୍ଟବୋର୍ଡ ସଭାପତି ରାଜେନ୍ଦ୍ର ପଟ୍ଟନାୟକ, ସଦସ୍ୟ ଆନନ୍ଦ ଚନ୍ଦ୍ର ସିଂହ, ନିର୍ମଳ ମହାନ୍ତି, ଦୟାନିଧି ମହାନ୍ତ, କ୍ଷୀରୋଦ ପ୍ରସାଦ ଦାସ, କାର୍ଯ୍ୟନିର୍ବାହୀ ଅଧିକାରୀ ସଞ୍ଜୀବ ମହାପାତ୍ର, ଏସ୍ଡିପିଓ ଅସିଦ ମହାନ୍ତି, ଥାନାଧିକାରୀ ପ୍ରତିଭା ସାହୁ, ତହସିଲଦାର ଜନକ ନାୟକ, ବିଡିଓ ନାରାୟଣ ସାହୁ ପ୍ରମୁଖ ତଦାରଖ କରିଥିଲେ।
