ଭୁବନେଶ୍ୱର,୨।୪ (ବ୍ୟୁରୋ): ପ୍ରଥମେ ପଞ୍ଚାୟତ ଓ ପରେ ପୌର ନିର୍ବାଚନରେ କଂଗ୍ରେସର ନୈରାଶ୍ୟ ଜନକ ପ୍ରଦର୍ଶନ ବର୍ତ୍ତମାନ ପ୍ରଦେଶ କଂଗ୍ରେସ କମିଟିରେ କନ୍ଦଳର ରୂପନେଇଛି। ଜୟପୁର ବିଧାୟକ ତାରାପ୍ରସାଦ ବାହିନୀପତି ପିସିସି ସଭାପତି ନିରଞ୍ଜନ ପଟ୍ଟନାୟକ ନିର୍ବାଚନର ସମୟରେ ନିଜ ଭୁଲ ଲୁଚାଇବାକୁ ଯାଇ ସ୍ବାସ୍ଥ୍ୟର ଆଳ ଦେଖାଉଥିବା ସେ ପ୍ରକାଶ କରିଛନ୍ତି। ଏହି କନ୍ଦଳ ପୁରୁଣା ହୋଇଥିଲେ ମଧ୍ୟ ଏବେ ଖୋଲା ଖୋଲି ଭାବେ ବାହିନୀପତି ପିସିସି ସଭାପତିଙ୍କୁ ଟାର୍ଗେଟ କରିଛନ୍ତି। ବାହିନୀପତି କହିଛନ୍ତି, ନିରଞ୍ଜନ ବାବୁ କୁଆଡ଼େ ଯାଇପାରୁ ନଥିବାରୁ ନେତୃତ୍ୱ ନିଶ୍ଟିତ ଭାବରେ ପ୍ରଭାବିତ ହେଉଛି। ନିର୍ବାଚନ ବେଳ ଆସିଲେ ତାଙ୍କ ଦେହ ଅସୁସ୍ଥ ହୋଇ ଯାଉଛି। ସେହି ହିସାବରେ ଦେଖିବାକୁ ଗଲେ ସେ କୌଣସି ପ୍ରଚାରରେ ଭାଗ ନେଇ ପାରୁନାହାନ୍ତି। ଏହି କାରଣରୁ ଇତି ମଧ୍ୟରେ ନିରଞ୍ଜନ ଦୁଇ ତିନି ଥର ଇସ୍ତଫା ମଧ୍ୟ ଦେଇ ସାରିଥିବା ବାହିନୀପତି କହିଛନ୍ତି। ବାହିନୀପତିଙ୍କ କଥାରେ କଥା ମିଶାଇ ଜଟଣୀ ବିଧାୟକ ସୁରେଶ କୁମାର ରାଉତରାୟ କହିଛନ୍ତି, ନିର୍ବାଚନରେ ଦୁର୍ବଳ ପ୍ରଦର୍ଶନ କରୁଥିବା ରାଜ୍ୟଗୁଡିକରେ କଂଗ୍ରେସ ହାଇକମାଣ୍ଡ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। ଅଦ୍ୟାବଧି ୬ଟି ପ୍ରଦେଶର ସଭାପତିଙ୍କୁ ପରିବର୍ତ୍ତନ କରାଯାଇଛି। ସେଠାରେ ନୂତନ ଭାବେ ୮୦ ଭାଗ ଯୁବତୀ ଯୁବକଙ୍କୁ ଦାୟିତ୍ୱ ଦେଉଛନ୍ତି। ସମସ୍ତ ରାଜ୍ୟର ମୋଡ଼ିଫିକେଶନ ହେଉଛି ଆମର ମଧ୍ୟ ମୋଡ଼ିଫିକେଶନ ହେବ। ପ୍ରଦେଶ କଂଗ୍ରେସ ପାଇଁ ଯୁବ ମାନେ ମଙ୍ଗ ଧରିବା ଶୁଭଙ୍କର ହେବ ବୋଲି ରାଉତରାୟ ମତ ରଖିଛନ୍ତି। ଅପରପକ୍ଷରେ ଆଗାମୀ ଦିନରେ ଦଳୀୟ ନିର୍ବାଚନ ହେବାକୁ ଯାଉଛି। ମେ’ରୁ ସେପ୍ଟେମ୍ବର ମାସ ପର୍ଯ୍ୟନ୍ତ ଦଳୀୟ ନିର୍ବାଚନ ଅନୁଷ୍ଠିତ ହେବ। ଏଥିରେ ବ୍ଲକସ୍ତରୀୟ କମିଟି ଠାରୁ ଆରମ୍ଭ କରି ସର୍ବଭାରତୀୟ କଂଗ୍ରେସ ଦଳର ସଭାପତି ଏବଂ ଅନ୍ୟାନ୍ୟ ପଦ ପଦବୀ ପାଇଁ ନିର୍ବାଚନ ହେବ। ଏହି ନିର୍ବାଚନ ପ୍ରକ୍ରିୟାରେ ପିସିସି ପଦରେ ନିରଞ୍ଜନଙ୍କ ବଦଳରେ ଆଉ ଜଣେ ନୂଆଁ ମୁହଁକୁ ଦଳ ଦେଖିବାକୁ ଚାହୁଁଥିବା ଏହି କନ୍ଦଳ ସ୍ପଷ୍ଟ କରୁଛି।
