ଲଣ୍ଡନ, ୧୦।୭-
ଇଟାଲିର ମାଟେଓ ବେରେଟିନି ଚଳିତ ଓ୍ବିମ୍ବେଲଡନ ଗ୍ରାଣ୍ଡସ୍ଲାମ ଟେନିସ ପୁରୁଷ ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। ଶୁକ୍ରବାର ଅନୁଷ୍ଠିତ ପ୍ରଥମ ସେମିଫାଇନାଲରେ ସେ ପୋଲାଣ୍ଡର ହୁବର୍ଟ ହୁର୍କାଜଙ୍କୁ ୬-୩, ୬-୦, ୬-୭(୩/୭), ୬-୪ ସେଟ୍ରେ ପରାସ୍ତ କରିଛନ୍ତି। କ୍ୱାର୍ଟର ଫାଇନାଲରେ ତାରକା ଖେଳାଳି ସୁଇଜରଲାଣ୍ଡର ରୋଜର ଫେଡରରଙ୍କ ଅଭିଯାନ ଶେଷ କରିଥିବା ହୁକାର୍ଜ ସେମିଫାଇନାଲରେ କିନ୍ତୁ ସେହି ପ୍ରଦର୍ଶନ ଦୋହରାଇ ପାରି ନ ଥିଲେ। ବେରେଟିନି ପ୍ରଥମ ଦୁଇ ସେଟ୍ରେ ସହଜ ବିଜୟ ହାସଲ କରିଥିଲେ ହେଁ ତୃତୀୟ ସେଟ୍ରେ କଡ଼ା ଚ୍ୟାଲେଞ୍ଜ ଦେଇ ସଫଳ ପ୍ରତ୍ୟାବର୍ତ୍ତନ କରିଥିଲେ ହୁକାର୍ଜ। ମାତ୍ର ୪ର୍ଥ ସେଟ୍ରେ ବେରେଟିନି ପ୍ରଭାବୀ ପ୍ରଦର୍ଶନ କରି ବାଜି ମାରିନେଇଥିଲେ। କୌଣସି ଗ୍ରାଣ୍ଡସ୍ଲାମ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିବା ବେରେଟିନିଙ୍କ ପାଇଁ ଏହା ପ୍ରଥମ। ୨୦୧୯ରେ ସେ ୟୁଏସ୍ ଓପନ ସେମିଫାଇନାଲ, ଚଳିତ ବର୍ଷ ଫ୍ରେଞ୍ଚ୍ କ୍ୱାର୍ଟର ଫାଇନାଲ ଏବଂ ଅଷ୍ଟ୍ରେଲିଆନ ଓପନରେ ସର୍ବାଧିକ ୪ର୍ଥ ରାଉଣ୍ଡ ପର୍ଯ୍ୟନ୍ତ ପ୍ରବେଶ କରିଥିଲେ। ସର୍ବିୟାର ନୋଭାକ ଜୋକୋଭିଚ୍ ଏବଂ କାନାଡ଼ାର ଡେନିସ ଶାପୋଭାଲେଭଙ୍କ ଦ୍ୱିତୀୟ ସେମିଫାଇନାଲର ବିଜେତାଙ୍କୁ ବେରେଟିନି ଫାଇନାଲରେ ଭେଟିବେ।
ମହିଳା ଡବଲ୍ସରେ ୨ଟି ଯାକ ସେମିଫାଇନାଲ ଶୁକ୍ରବାର ଅନୁଷ୍ଠିତ ହୋଇ ଯାଇଛି। ପ୍ରଥମ ସେମିଫାଇନାଲରେ ଏଲିସ ମେର୍ଟେନ୍ସ-ହସି ସୁ ଓ୍ବେଇ ଯୋଡ଼ି ବିଜୟୀ ହୋଇ ଫାଇନାଲରେ ପ୍ରବେଶ କରିଛନ୍ତି। ଏହି ଯୋଡ଼ି ୬-୪, ୧-୬, ୬-୩ ସେଟ୍ରେ ଇନା ଶିବାହାରା ଓ ଶୁକୋ ଆୟୋୟାମା ଯୋଡ଼ିଙ୍କୁ ହରାଇ ଟାଇଟଲ ମୁକାବିଲାରେ ଅବତୀର୍ଣ୍ଣ ହୋଇଛନ୍ତି। କ୍ୱାଡ ହୁଇଲ ଚେୟାର ଡବଲ୍ସ ଫାଇନାଲରେ ଆଣ୍ଡି ଲ୍ୟାପଥ୍ରୋନ ଓ ଡେଭିଡ ଓ୍ବାଗନର ଯୋଡ଼ି ଡେଲାନ ଆଲକଟ ଓ ସାମ୍ ସ୍କ୍ରୋଡର ଯୋଡ଼ିଙ୍କୁ ହରାଇ ଚାମ୍ପିୟନ ହୋଇଛନ୍ତି।
