ନୂଆଦିଲ୍ଲୀ,୧୩।୧୧ : ଭାରତର ଅବସରପ୍ରାପ୍ତ ପ୍ରଧାନ ବିଚାରପତି ଉଦୟ ଉମେଶ ଲଲିତ ଏକ ସାକ୍ଷାତକାରରେ କହିଛନ୍ତି ଯେ ଅବସର ପରେ ସରକାରୀ ନିଯୁକ୍ତିକୁ ସେ ବିରୋଧ କରନ୍ତି ନାହିଁ। କିନ୍ତୁ ରାଜ୍ୟସଭା ଏମ୍ପି କିମ୍ବା ରାଜ୍ୟପାଳ ହେବା ପ୍ରସ୍ତାବକୁ ସେ ନିଜେ ଗ୍ରହଣ କରିବେ ନାହିଁ। ସେ କହିଛନ୍ତି ଯେ ମୁଁ ଏହି ପଦବୀଗୁଡିକୁ ଛୋଟ ଭାବରେ ଦେଖୁ ନାହିଁ କିନ୍ତୁ ପ୍ରଧାନ ବିଚାରପତି ପଦରୁ ଅବସର ନେଉଥିବା ବ୍ୟକ୍ତିଙ୍କ ପାଇଁ ଏହା ଉପଯୁକ୍ତ ନୁହେଁ।
ରାଜ୍ୟସଭାର ସଦସ୍ୟ କିମ୍ବା ରାଜ୍ୟପାଳ ହେବା ଅବସରପ୍ରାପ୍ତ ପ୍ରଧାନ ବିଚାରପତିଙ୍କ ପାଇଁ ଉଚିତ ନୁହେଁ।
ପୂର୍ବତନ ସିଜେଆଇ ରଞ୍ଜନ ଗୋଗୋଇଙ୍କ ପରି ବିଚାରପତି ଅବସର ପରେ ସରକାରୀ ପଦବୀ ଗ୍ରହଣ କରିଛନ୍ତି ପ୍ରଶ୍ନର ଉତ୍ତରରେ ଉଦୟ ଉମେଶ ଲଲିତ ଏପରି କହିଛନ୍ତି। ଉଦୟ ଉମେଶ ଲଲିତ କହିଛନ୍ତି, ଏହା ମୋର ବ୍ୟକ୍ତିଗତ ଦୃଷ୍ଟିକୋଣ। ମୁଁ ଏହା କହୁ ନାହିଁ ଯେ ସେମାନେ ଭୁଲ କରିଛନ୍ତି। ଜଷ୍ଟିସ ଲଲିତ ଜାତୀୟ ମାନବ ଅଧିକାର ଆୟୋଗର ମୁଖ୍ୟ ଲୋକପାଳ ଏବଂ ଆଇନ ଆୟୋଗର ମୁଖ୍ୟ ଭାବେ ନିଯୁକ୍ତି ନେଇ କୌଣସି ଆପତ୍ତି ନ ଥିବା କହିଛନ୍ତି।
ଉଦୟ ଉମେଶ ଲଲିତ ତାଙ୍କ ମତକୁ ଆହୁରି ସ୍ପଷ୍ଟ କରି କହିଛନ୍ତି, ରାଜ୍ୟସଭା ସମ୍ପୂର୍ଣ୍ଣ ଭିନ୍ନ କଥା। ମୁଁ କହିବାକୁ ଚାହୁଁଛି ଯେ ଏନଏଚଆରସିର ଚେୟାରମ୍ୟାନଙ୍କ ପରି ପୋଷ୍ଟଗୁଡିକ ଆଇନ ଅନୁଯାୟୀ ସୁପ୍ରିମକୋର୍ଟର ବିଚାରପତି, ପୂର୍ବତନ ପ୍ରଧାନ ବିଚାରପତିଙ୍କ ନିଯୁକ୍ତ ହେବାର ଅଧିକାର ରହିଛି। ସଂସଦ ଦ୍ୱାରା ଏହା ପାରିତ ହୋଇଛି ଯେ, ସୁପ୍ରିମକୋର୍ଟର ବିଚାରପତି, ପୂର୍ବତନ ପ୍ରଧାନ ବିଚାରପତି ଏହି ପଦବୀରେ ରହିପାରିବେ। ଆମେ ସଂସଦ ଅନୁଯାୟୀ ପରିଚାଳିତ ହେଉଛୁ।
ପୂର୍ବତନ ପ୍ରଧାନ ବିଚାରପତି କହିଛନ୍ତି ଯେ ସେ ଶିକ୍ଷାନୁଷ୍ଠାନରେ ଆଇନ ଶିକ୍ଷା ଦେବାକୁ ଚାହୁଁଛନ୍ତି। ନ୍ୟାଶନାଲ ଜୁଡିସିଆଲ ଏକାଡେମୀରେ କିମ୍ବା କିଛି ଆଇନ ବିଦ୍ୟାଳୟରେ ଅତିଥି ପ୍ରଫେସର ଭାବରେ କାର୍ଯ୍ୟ କରିବେ ବୋଲି ସେ କହିଛନ୍ତି।
