ଗୁଣପୁର/ରାମନାଗୁଡ଼ା,୨୭ା୩(ଡି.ଏନ୍.ଏ.): ସର୍ଭିସ ରିଭଲଭରରୁ ଗୁଳି ଫୁଟି ଗଞ୍ଜାମ ଜିଲା ଗାଙ୍ଗପୁର ଥାନା ଆଇଆଇସି ଦେବ୍ ଗମାଙ୍ଗଙ୍କ ମୃତ୍ୟୁ ଘଟଣାରେ ଶନିବାର ମୁହଁ ଖୋଲିଛନ୍ତି ସ୍ତ୍ରୀ କିରଣ ମହାନ୍ତି। ସ୍ବାମୀଙ୍କ ଉପରେ କାମର ଚାପ ରହିଥିଲା। ତେଣୁ ଠିକ୍ରେ ତଦନ୍ତ କରାଯାଇ ନ୍ୟାୟ ପ୍ରଦାନ କରାଯାଉ ବୋଲି ସେ ଦାବି କରିଛନ୍ତି। ପୈତୃକ ଗ୍ରାମ ରାୟଗଡ଼ା ଜିଲା ରାମନାଗୁଡ଼ା ବ୍ଲକ କୁଜେନ୍ଦ୍ରୀ ପଞ୍ଚାୟତ କଇଠପଦର କୁଡ଼ିଆ ଗ୍ରାମରେ ଶନିବାର ଦେବ୍ଙ୍କର ରାଷ୍ଟ୍ରୀୟ ମର୍ଯ୍ୟାଦା ସହ ଶେଷକୃତ୍ୟ ସମ୍ପନ୍ନ ହୋଇଥିଲା। ଏହି ସମୟରେ ଗଣମାଧ୍ୟମ ନିକଟରେ ସ୍ବାମୀଙ୍କ ମୃତ୍ୟୁ ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି କିରଣ।
କିରଣଙ୍କ କହିବା ଅନୁଯାୟୀ, ସ୍ବାମୀଙ୍କ ମୃତ୍ୟୁ ଘଟିବା ଦିନ ଉକ୍ତ ଘରକୁ ଦୁଇ ପୋଲିସ ଅଧିକାରୀ ଆସିଥିଲେ। ସମସ୍ତେ ମିଶି ଗୋଟିଏ ଟେବୁଲରେ ଖାଇଥିଲେ। ଦେବ୍ଙ୍କ ମା’ ଗାଧୋଇବାକୁ ଯାଇଥିବାବେଳେ କିଛି ସମୟ ମଧ୍ୟରେ ଗୁଳି ଫୁଟିବା ଶବ୍ଦ ଶୁଣିଥିଲେ। ବାଥରୁମ୍ରୁ ଆସି ଦେଖିବାବେଳେ ପୁଅ ତଳେ ପଡ଼ିଥିବା ବିଷୟରେ ମା’ ଜଣାଇଥିବା କିରଣ କହିଛନ୍ତି। ଅନ୍ୟପକ୍ଷରେ ଉଭୟ ସ୍ତ୍ରୀ ଏବଂ ସ୍ବାମୀ ପୋଲିସ ବିଭାଗରେ ଚାକିରି କରୁଥିଲେ। ଦମ୍ପତି ପରସ୍ପରଠାରୁ ଦୂରରେ ରହୁଥିଲେ। ଦେବ୍ ଛୁଟି ଆବେଦନ କଲେ ମଧ୍ୟ ମିଳୁ ନ ଥିଲା। ଦୂରରେ ଥିବାରୁ ସ୍ବାମୀଙ୍କ ମୃତ୍ୟୁର କାରଣ ଜାଣିପାରୁନି ବୋଲି କିରଣ କହିଛନ୍ତି। ସ୍ବାମୀଙ୍କ ଏଭଳି ମୃତ୍ୟୁକୁ ନେଇ ସେ ସନ୍ଦେହ ପ୍ରକାଶ କରିଛନ୍ତି। ପୋଲିସରେ ଥାଇ ପୋଲିସ ଅଧିକାରୀ ନ୍ୟାୟ ପାଇବେ ନାହିଁ କି ବୋଲି ସେ ପ୍ରଶ୍ନ ଉଠାଇଛନ୍ତି। ଗଞ୍ଜାମ ଏସ୍ପି ବ୍ରିଜେଶ କୁମାର ରୟ ରବିବାର ଗଣମାଧ୍ୟମକୁ ସୂଚନା ଦେଇ କହିଛନ୍ତି, ଏହା ଦୁଃଖଦାୟକ ଘଟଣା। ସାଇଣ୍ଟିଫିକ୍ ଟିମ୍ ଓ ମେଡିକାଲ ରିପୋର୍ଟ ଆଧାରରେ ତଦନ୍ତ ଚାଲିଛି। ଏଚ୍ଆର୍ପିସି ମଧ୍ୟ ଏହାର ତଦନ୍ତ କରୁଛନ୍ତି। ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରାଯାଇଛି।
