ଥୁଆମୂଳ ରାମପୁର,୨୧।୭ (ଦୁର୍ଗା କୀର୍ତ୍ତି): ସରକାରୀ ସାମାଜିକ ସୁରକ୍ଷା ଯୋଜନାର ବ୍ୟାପକ ପ୍ରଚାର ଚାଲିଥିଲେ ହେଁ ପ୍ରଶାସନିକ ଅବହେଳା ଯୋଗୁ ପ୍ରକୃତ ହିତାଧିକାରୀମାନେ ଏହାରୁ ବଞ୍ଚିତ ହେଉଥିବା ଦେଖିବାକୁ ମିଳିଛି। କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ଗୁଣୁପୁର ଗ୍ରାମପଞ୍ଚାୟତ ପାନଭଟ୍ଟା ଗ୍ରାମର ଅସହାୟ ବିଧବା ମହିଳା ସୂର୍ଯ୍ୟ ଦେଇ (୫୫) ଦୀର୍ଘ ଦିନ ହେବ ବିଧବା ଭତ୍ତାଟିଏ ପାଇଁ ସରକାରୀ ଅଫିସ୍ ଦୌଡ଼ି ନିରାଶ ହୋଇଛନ୍ତି।
ଗତ ୨୦୨୪ ମସିହା ମେ’ ୩ ତାରିଖରେ ସ୍ୱାମୀ ସୁରେନ୍ଦ୍ର ବିଶିଙ୍କ ମୃତ୍ୟୁ ପରେ ଦୀର୍ଘ ୨ ବର୍ଷରୁ ଅଧିକ ସମୟ ବିତିଯାଇଥିଲେ ହେଁ ତାଙ୍କ ଭାଗ୍ୟରେ ବିଧବା ଭତ୍ତା ଜୁଟିପାରି ନାହିଁ। ତାଙ୍କର ତିନି ଜଣ ସନ୍ତାନ ଥିବାବେଳେ ବଡ଼ ଝିଅର ବିବାହ ହୋଇସାରିଛି। ଅନ୍ୟ ଜଣେ ଝିଅ ବାଙ୍ଗାଲୋରରେ ଦାଦନ ଖଟି ପଠାଉଥିବା କିଛି ଟଙ୍କାରେ ସୂର୍ଯ୍ୟ ଏବଂ ତାଙ୍କର ଛୋଟ ପୁଅ କଷ୍ଟମଷ୍ଟେ ନିଜର ଗୁଜରାଣ ମେଣ୍ଟାଉଛନ୍ତି।
ବିଶେଷକରି, ଏହି ଗ୍ରାମଟି ଗୁଣୁପୁର ପଞ୍ଚାୟତ ସଦର ମହକୁମାରୁ ମାତ୍ର ୧ କିଲୋମିଟର ଦୂରରେ ଅବସ୍ଥିତ। ଏହା ବ୍ଲକ୍ ଅଧ୍ୟକ୍ଷ ଦୟାନିଧି ମାଝୀ ଓ ଜିଲ୍ଲା ପରିଷଦ ସଭ୍ୟା ଟୁନି ଖୋସ୍ଲାଙ୍କ ନିଜ ପଞ୍ଚାୟତ ହୋଇଥିବା ଏବଂ ସୂର୍ଯ୍ୟଙ୍କ ଘର ମୁଖ୍ୟ ରାସ୍ତା କଡ଼ରେ ଥିବା ସତ୍ତ୍ବେ କୌଣସି ଜନପ୍ରତିନିଧି କିମ୍ବା ବ୍ଲକ ପ୍ରଶାସନ ତାଙ୍କର ଦୁଃଖ ବୁଝୁନାହାନ୍ତି। ସମସ୍ତ ବୈଧ କାଗଜପତ୍ର ଧରି ସେ ପଞ୍ଚାୟତରୁ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ବାରମ୍ବାର ଦୌଡ଼ି ନିରାଶ ହୋଇଛନ୍ତି।
ସରପଞ୍ଚ ସୁଜାତା ମାଝୀ ଏହି ଆବେଦନ କରାଯାଇଥିବା ଏବଂ ବ୍ଲକ ପ୍ରଶାସନର ଅବହେଳାରୁ ତାହା ‘ଖାରଜ’ ହୋଇଥିବା କହୁଥିବା ବେଳେ, ଅଫିସିଆଲ୍ ୱେବସାଇଟ୍ରେ କୌଣସି ଅନଲାଇନ୍ ଆବେଦନ ହୋଇନଥିବା ଦର୍ଶାଯାଉଛି। ଅନ୍ୟପଟେ, ବ୍ଲକ୍ ସାମାଜିକ ସୁରକ୍ଷା ଅଧିକାରୀ ସୁନାରାମ ସୋରେନ୍ ଘଟଣାର ତଦନ୍ତ କରାଯାଇ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିକ୍ରିୟା ଦେଇଛନ୍ତି। ଗଣମାଧ୍ୟମରେ ଖବର ପ୍ରସାରଣ ପରେ ପ୍ରଶାସନର ନିଦ୍ରା ଭାଙ୍ଗୁଛି କି ନାହିଁ ଏବଂ ଏହି ଅସହାୟ ମାଆଙ୍କୁ କେବେ ଭତ୍ତା ମିଳୁଛି, ତାହା ବର୍ତ୍ତମାନ ଦେଖିବାକୁ ବାକି ରହିଛି।
