ପଟ୍ଟାଙ୍ଗି,୬ା୧୧(ଶରତ କୁମାର ଧଳ):ଆନ୍ଧ୍ରରେ ଭୋଟ ଦେଇ ଫେରିଥିବା କୋରାପୁଟ ଜିଲା ପଟ୍ଟାଙ୍ଗି ବ୍ଲକ୍ କୋଟିଆ ପଞ୍ଚାୟତର ସୀମାନ୍ତ ଗଁାର କେତେଜଣ ଲୋକଙ୍କ ପ୍ରତି ଜୟପୁର ବିଧାୟକ ତାରାପ୍ରସାଦ ବାହିନୀପତି ଓ ବିଜେଡି ରାଜ୍ୟ ସାଙ୍ଗଠନିକ ସଦସ୍ୟ ଭୃଗୁ ବକ୍ସିପାତ୍ର ଅସନ୍ତୋଷ ପ୍ରକାଶ କରିଛନ୍ତି। ଆନ୍ଧ୍ରକୁ ଭୋଟ ଦେଇଥିବା ଭୋଟର ଓଡ଼ିଶାରେ ରୁହନାହିଁ ବୋଲି ସେମାନେ କହିଛନ୍ତି।
ସୂଚନାନୁଯାୟୀ, ନେରେଡ଼ିବାଲସା ଗ୍ରାମର କେତେଜଣ ଲୋକ ଆନ୍ଧ୍ରର ସାରିକା ପଞ୍ଚାୟତରୁ ଭୋଟ ଦେଇ ଫେରିଥିଲେ। ଏହି ସମୟରେ ବିଧାୟକ ବାହିନୀପତି ଓ ବିଜେଡି ନେତା ଭୃଗୁ ବକ୍ସିପାତ୍ର ଉକ୍ତ ଭୋଟରମାନଙ୍କୁ କୁଆଡ଼େ ଯାଇଥିଲ ବୋଲି ପଚାରିଥିଲେ। ଆମେ ଆନ୍ଧ୍ରକୁ ଭୋଟ ଦେଇ ଫେରୁଛୁ ବୋଲି ସେମାନେ କହିଥିଲେ। ଏହା ପରେ ତୁମେମାନେ ଓଡ଼ିଶାରେ ରହିବା ଦରକାର ନାହିଁ ଆନ୍ଧ୍ରରେ ଯାଇ ରୁହ ବୋଲି ବିଧାୟକ ବାହିନୀପତି ଓ ବକ୍ସିପାତ୍ର ସେମାନଙ୍କୁ କହିଥିଲେ। ଭୋଟରମାନେ ପ୍ରତି ଉତ୍ତରରେ କହିଥିଲେ, ଏହା ଆମ ଗଁା। ଏଠାରେ ଆମର ଘରଦ୍ୱାର ସହ ଜମିବାଡ଼ି ଅଛି, ତେଣୁ ଆମେ କାହିଁକି ଆନ୍ଧ୍ରରେ ରହିବୁ। ଭାରତୀୟ ନାଗରିକ ଭାବେ ଭୋଟ ଦେବାର ସମସ୍ତଙ୍କର ଅଧିକାର ରହିଛି। ଆମେ ଯେଉଁଠି ହେଲେ ବି ରହିପାରିବୁ ବୋଲି ଗ୍ରାମବାସୀ ଉତ୍ତର ଦେଇଥିଲେ। ଅନୁରୂପ ଭାବେ ବରିଷ୍ଠ ରାଜନେତା ତଥା ପୂର୍ବତନ ଏମ୍ପି ଜୟରାମ ପାଙ୍ଗୀ କୋଟିଆ ପଞ୍ଚାୟତ ଥୁରିଆ ଗ୍ରାମର ସ୍ଥାୟୀ ବାସିନ୍ଦା ହୋଇଥିବା ବେଳେ ମୋ ପଞ୍ଚାୟତରୁ ଯାଇ ଆନ୍ଧ୍ରକୁ ଭୋଟ ଦେଇଥିବା ଲୋକମାନେ ଓଡ଼ିଶାରେ ବା କୋଟିଆରେ ରହିବା ଅଧିକାର ନାହିଁ। ସେମାନେ ଆନ୍ଧ୍ରରେ ରୁହନ୍ତୁ ବୋଲି ଗଣମାଧ୍ୟମକୁ କହିଛନ୍ତି।
Dharitri – Odisha’s No.1 Odia Daily
