ନୂଆଦିଲ୍ଲୀ, ୧୩।୧୦: ବହୁଚର୍ଚ୍ଚିତ ‘ଶକ୍ତିମାନ’ ସିରିୟଲର ମୁଖ୍ୟ ଅଭିନେତା ମୁକେଶ ଖାନ୍ନା ଏବେ ଖବରର ଶିରୋନାମାରେ ରହୁଛନ୍ତି। ‘ଦି କପିଳ ଶର୍ମା ଶୋ’କୁ ନେଇ ଦେଇଥିବା ମନ୍ତବ୍ୟ ଲାଗି ମୁକେଶ ଚର୍ଚ୍ଚାରେ ରହିଥିଲେ। ଯେତେବେଳେ ବି ମୁକେଶ ଖାନ୍ନାଙ୍କୁ ନେଇ ଆଲୋଚନା ହୋଇଛି, ସେତେବେଳେ ନିଶ୍ଚୟ ତାଙ୍କ ବିବାହ ବିଷୟରେ କଥା ପଡ଼ିଛି। ତେବେ ଆଜି ପର୍ଯ୍ୟନ୍ତ କାହିଁକି ସେ ଅବିବାହିତ ରହିଛନ୍ତି। ଏହା ପଛରେ ଥିବା କାରଣ ଉପରୁ ନିଜେ ୬୨ ବର୍ଷୀୟ ମୁକେଶ ଉନ୍ମୋଚନ କରିଛନ୍ତି।
ଏକ ସାକ୍ଷାତ୍କାର ଅବସରରେ ମୁକେଶ କହିଥିଲେ, ‘ବିବାହ ସେହି ମାନଙ୍କର ହୋଇଥାଏ, ଯାହାର ଭାଗ୍ୟରେ ଏହା ଲେଖା ହୋଇଥାଏ। ବାସ୍ତବରେ ମୋର କହିବାର ଅଭ୍ୟାସ ହେତୁ ଅନେକ ବିବାଦୀୟ ଘଟଣା ମୋ ସହିତ ଜଡ଼ିତ। ମୋ ଜୀବନର ଏଭଳି ଏକ ବିବାଦୀୟ ଘଟଣାର ପରିସମାପ୍ତ ଘଟାଇବାକୁ ଚାହୁଁଛି, ଯାହା ବହୁବର୍ଷ ଧରି ଚାଲି ଆସୁଛି।’ ଶକ୍ତିମାନ ଭୂମିକାରେ ଅଭିନୟ କରି ଚର୍ଚ୍ଚାକୁ ଆସିଥିବା ମୁକେଶ ଆହୁରି ମଧ୍ୟ କହିଛନ୍ତି, ‘ମୁଁ କାହିଁକି ବିବାହ କରିନାହିଁ? ଗୋଟିଏ ସମୟରେ ଏହା ପ୍ରତ୍ୟେକ ଖବରଦାତାଙ୍କ ପାଇଁ ପ୍ରିୟ ପ୍ରଶ୍ନ ଥିଲା। ତେବେ ଆପଣଙ୍କୁ କହିବି ଯେ, ମୁଁ ବିବାହ ବିରୋଧୀ ନୁହେଁ।
ଲୋକମାନେ ବହୁଥର କହିଛନ୍ତି ମୁକେଶ ଖାନ୍ନା ଭିଷ୍ମପିତାମହ ଭୂମିକା ତୁଲାଇଥିଲେ। ଯାହାକୁ ସେ ନିଜ ବ୍ୟକ୍ତିଗତ ଜୀବନରେ ଆପଣାଇଛନ୍ତି। କିନ୍ତୁ ଆପଣଙ୍କୁ କହିବି ଯେ ମୁଁ ଏତେ ମହାନ ନୁହେଁ। କୌଣସି ବ୍ୟକ୍ତି ଭୀଷ୍ମ ପିତାମହ ହୋଇପାରିବେ ନାହିଁ। ମୁଁ ମୋର ବ୍ୟକ୍ତିଗତ ଜୀବନରେ କୌଣସି ଭୀଷ୍ମ ପ୍ରତିଜ୍ଞା କରିନି। ବିବାହରେ ୨ଟି ଆତ୍ମାର ମିଳନ ହୋଇଥାଏ। ବିବାହ ଉପରୁ ଲେଖା ହୋଇଆସିଥାଏ। ମୁଁ ବିଶ୍ୱାସ କରେ ଯେ କେହି ସତ୍ୟ ଜାଣନ୍ତି ନାହିଁ। ଯଦି ମୋର ବିବାହ ହେବାକୁ ଥିବା ତେବେ ନିଶ୍ଚୟ ହେବ। କିନ୍ତୁ ବର୍ତ୍ତମାନ କୌଣସି ଝିଅ ମୋ ପାଇଁ ଜନ୍ମ ହେବାକୁ ନାହିଁ। ବିବାହ ମୋର ବ୍ୟକ୍ତିଗତ ବିଷୟ। ମୋର କେହି ସ୍ତ୍ରୀ ନାହାନ୍ତି। ଏଠାରେ ମୋର ବିବାହ ବିବାଦକୁ ସମାପ୍ତ କରାଯାଉ’ ବୋଲି ମୁକେଶ ଖାନ୍ନା ଏହି ସାକ୍ଷାତ୍କାର ଅବସରରେ ପ୍ରକାଶ କରିଛନ୍ତି।
