ନୂଆଦିଲ୍ଲୀ,୨୭।୬: ଭାରତୀୟ କ୍ରିକେଟର ‘ରନ ମେଶିନ’ ବିରାଟ କୋହଲି ଟେଷ୍ଟ କ୍ରିକେଟରୁ ଅବସର ନେବାକୁ ପ୍ରାୟ ବର୍ଷେରୁ ଅଧିକ ସମୟ ବିତିଗଲାଣି। ହେଲେ ଆଜି ବି ପ୍ରଶଂସକଙ୍କ ମନରେ ଗୋଟିଏ ପ୍ରଶ୍ନ ଉଠୁଛି ଯେ, କୋହଲି ହଠାତ ଟେଷ୍ଟ କ୍ରିକେଟକୁ କାହିଁକି ସନ୍ନ୍ୟାସ ନେଲେ? ଏବେ ଏହି ରହସ୍ୟ ଉପରୁ ପରଦା ହଟାଇଛନ୍ତି ପୂର୍ବତନ ଭାରତୀୟ କ୍ରିକେଟର ମହମ୍ମଦ କୈଫ୍। ବିରାଟ କାହିଁକି ଟେଷ୍ଟ କ୍ରିକେଟ ଛାଡ଼ିଲେ, ସେ ନେଇ ସେ ଏକ ବଡ଼ ଦାବି କରିଛନ୍ତି।
ମେ ୨୦୨୫ରେ ଭାରତୀୟ ଟେଷ୍ଟ ଇତିହାସର ଏକ ସୁବର୍ଣ୍ଣ ଅଧ୍ୟାୟର ଅନ୍ତ ଘଟିଥିଲା, ଯେତେବେଳେ ବିରାଟ ନିଜର ୧୪ ବର୍ଷର ଲମ୍ବା ଟେଷ୍ଟ କ୍ୟାରିୟରରୁ ଅବସର ଘୋଷଣା କରିଥିଲେ। ସୋସିଆଲ ମିଡିଆରେ ଏକ ଭାବୁକ ପୋଷ୍ଟ ଶେୟାର କରି ସେ ଟେଷ୍ଟ କ୍ରିକେଟକୁ ବାଏ-ବାଏ କହିଥିଲେ। ଏବେ ଏକ ଆଲୋଚନା ବେଳେ କୈଫ୍ ଏହା ପଛର ପ୍ରକୃତ କାରଣ ପ୍ରକାଶ କରିଛନ୍ତି।
କୈଫ୍ଙ୍କ କହିବା ଅନୁଯାୟୀ, ବିରାଟଙ୍କୁ ଦଳରେ ଯେଉଁ ସମ୍ମାନ ଓ ଗୁରୁତ୍ୱ ମିଳିବା କଥା, ତାହା ମିଳୁ ନ ଥିଲା। ଯଦିଓ ସେ ଟେଷ୍ଟ କ୍ରିକେଟକୁ ବହୁତ ଭଲ ପାଉଥିଲେ। ସେ ଆହୁରି ମଧ୍ୟ କହିଛନ୍ତି ଯେ, ବିରାଟ ଟେଷ୍ଟ ଖେଳିବାକୁ ଚାହୁଁଥିଲେ କିନ୍ତୁ ପରିସ୍ଥିତି ଏପରି ହେଲା ଯେ ତାଙ୍କୁ ଏହି ଫର୍ମାଟ୍ ଛାଡ଼ିବାକୁ ପଡ଼ିଲା।
କୈଫ୍ କହିଛନ୍ତି, “ବିରାଟ କୋହଲି ଟେଷ୍ଟ ମ୍ୟାଚ୍ ଛାଡ଼ିଛନ୍ତି। ନିକଟରେ ତାଙ୍କର ଏକ ବୟାନ ଆସିଥିଲା, ଯେଉଁଠି ସେ କହିଥିଲେ ଯେ ମୁଁ ଏଥିପାଇଁ ଟେଷ୍ଟ ଛାଡ଼ିଲି କାରଣ ମତେ ଟିମ୍ରେ ‘ୱେଲକମିଂ’ ଅନୁଭୂତ ହେଉ ନ ଥିଲା। ମତେ ଲାଗୁଥିଲା ଯେ ଲୋକମାନେ ଚାହୁଁନାହାନ୍ତି ମୁଁ ଦଳରେ ରୁହେ। ସେଥିପାଇଁ ସେ ଟେଷ୍ଟ ଛାଡ଼ି ଚାଲିଗଲେ।” କୈଫ୍ଙ୍କ ମତରେ, ବିରାଟ ସବୁବେଳେ ଟେଷ୍ଟ କ୍ରିକେଟକୁ ସବୁଠାରୁ କଠିନ ଫର୍ମାଟ ବୋଲି ଭାବୁଥିଲେ ଏବଂ ଯୁବ ପିଢ଼ିଙ୍କ ପାଇଁ ଏକ ଉଦାହରଣ ସାଜିବାକୁ ଚାହୁଁଥିଲେ।
ପୂର୍ବତନ ଭାରତୀୟ କ୍ରିକେଟର ତଥା କମେଣ୍ଟେଟର କୈଫ୍ ଆହୁରି କହିଛନ୍ତି ଯେ, ବିରାଟଙ୍କୁ ଏପରି ଅନୁଭବ କରାଯାଇଥିଲା ଯେ ଟେଷ୍ଟ ଦଳରେ ଏବେ ଆଉ ତାଙ୍କର ଆବଶ୍ୟକତା ନାହିଁ। ଫର୍ମ ତ ଆସେ ଆଉ ଯାଏ, ତାହା ଅଲଗା କଥା। କିନ୍ତୁ ଖରାପ ଫର୍ମ ସହିତ ଲୋକମାନେ ତାଙ୍କୁ ଅନୁଭବ କରାଇଲେ ଯେ ଆପଣଙ୍କ ସମୟ ଏବେ ଶେଷ ହୋଇଯାଇଛି, ଦଳକୁ ଆଉ ଆପଣଙ୍କ ଦରକାର ନାହିଁ। ପରିସ୍ଥିତି ଏପରି ଜଟିଳ ହେଲା ଯେ ସେ ବାଧ୍ୟ ହୋଇ ଟେଷ୍ଟ କ୍ରିକେଟକୁ ସନ୍ନ୍ୟାସ କହିଲେ।
ବିରାଟ କୋହଲି ୨୦୧୪ ରୁ ୨୦୨୨ ମଧ୍ୟରେ ରେକର୍ଡ ୬୮ଟି ଟେଷ୍ଟ ମ୍ୟାଚରେ ଭାରତୀୟ ଦଳର ଅଧିନାୟକତ୍ୱ କରିଥିଲେ। ତାଙ୍କ ନେତୃତ୍ୱରେ ଭାରତ ୪୦ଟି ମ୍ୟାଚ୍ ଜିତିଥିଲା, ଯାହାକି ଯେକୌଣସି ଭାରତୀୟ ଟେଷ୍ଟ ଅଧିନାୟକଙ୍କ ପାଇଁ ସବୁଠାରୁ ଶ୍ରେଷ୍ଠ ରେକର୍ଡ। ସୂଚନାଯୋଗ୍ୟ, ବିରାଟ ୨୦୨୪ରେ ଟି-୨୦ ଆନ୍ତର୍ଜାତୀୟରୁ ଅବସର ନେଇଥିବା ବେଳେ ବର୍ତ୍ତମାନ ସେ କେବଳ ଦିନିକିଆ (ODI) କ୍ରିକେଟ୍ ଖେଳୁଛନ୍ତି।
