ନୂଆଦିଲ୍ଲୀ,୧୬।୧୦: ନ୍ୟାଶନାଲ କନଫରେନ୍ସର ନେତା ଓମାର ଅବଦୁଲ୍ଲା ଆଜି ଜମ୍ମୁ କଶ୍ମୀରର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ। ୫୪ ବର୍ଷୀୟ ଅବଦୁଲ୍ଲା ଦ୍ୱିତୀୟ ଥର ପାଇଁ ରାଜ୍ୟ ଦାୟିତ୍ୱ ଗ୍ରହଣ କରିବେ। ନିକଟରେ ଅନୁଷ୍ଠିତ ବିଧାନସଭା ନିର୍ବାଚନରେ ଓମାରଙ୍କ ଦଳ ନ୍ୟାଶନାଲ କନଫରେନ୍ସ ୯୫ଟି ଆସନ ମଧ୍ୟରୁ ୪୨ଟି ଜିତିଛି। ଯେଉଁଠାରେ ଏହାର ସହଯୋଗୀ କଂଗ୍ରେସ ୬ ଟି ଆସନ ପାଇଛି। ଏପରି ଭାବରେ , ସଂଖ୍ୟାଗରିଷ୍ଠତା ପାଇ ଓମାର ଅବଦୁଲ୍ଲା ମୁଖ୍ୟମନ୍ତ୍ରୀ ହୋଇଛନ୍ତି।
ଓମାର ଅବଦୁଲ୍ଲା ୧୦ ମାର୍ଚ୍ଚ ୧୯୭୦ରେ ବ୍ରିଟେନର ରୋଚଫୋର୍ଡରେ ଜନ୍ମଗ୍ରହଣ କରିଥିଲେ। ତାଙ୍କର ପ୍ରାଥମିକ ଶିକ୍ଷା ଶ୍ରୀନଗରର ବର୍ଣ୍ଟ ହଲ ସ୍କୁଲରୁ ହୋଇଥିଲା। ମୁମ୍ବାଇର ସାଇଡେନହମ କଲେଜରୁ ସ୍ନାତକ ହାସଲ କରିଥିଲେ। ସ୍ନାତକୋତ୍ତର ଦିନରେ ଓମାର ଶରଦ ପାୱାରଙ୍କ ଘରେ ରହୁଥିଲେ। ସ୍ନାତକ ପରେ ସେ ସ୍କଟଲ୍ୟାଣ୍ଡର ଷ୍ଟ୍ରାଟକ୍ଲିଟ ୟୁନିଭରସିଟିରୁ ସ୍ନାତକୋତ୍ତର ଡିଗ୍ରୀ ହାସଲ କରିଥିଲେ। ଅଧ୍ୟୟନ ପରେ, ସେ କିଛି ସମୟ କାମ କରିଥିଲେ। ତା’ପରେ ତାଙ୍କ ପରିବାରର ଉତ୍ତରାଧିକାରୀ ଭାବେ ସେ ରାଜନୀତି କ୍ଷେତ୍ରରେ ଏଣ୍ଟ୍ରି ମାରିଥିଲେ।
୧୯୯୮ରେ ଓମାର ସକ୍ରିୟ ରାଜନୀତିରେ ପ୍ରବେଶ କରିଥିଲେ ଏବଂ ଲୋକ ସଭା ନିର୍ବାଚନରେ ଜିତିଥିଲେ। ଏହା ପରେ ସେ ୧୯୯୯ରେ ପୁନର୍ବାର ଏମପି ହୋଇଥିଲେ ଏବଂ ଅଟଳ ବିହାରୀ ବାଜପେୟୀ ସରକାରରେ କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ପଦ ପାଇଥିଲେ। ୨୦୦୧ରେ ତାଙ୍କୁ କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ମଧ୍ୟ କରାଯାଇଥିଲା। ୨୦୦୫ସୁଦ୍ଧା ଓମାର ଅବଦୁଲ୍ଲା ଜମ୍ମୁ କାଶ୍ମୀରର ରାଜନୀତିରେ ମନ ବଳାଇଥିଲେ ଏବଂ ପରେ ୨୦୦୯ରେ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ। ସେତେବେଳେ ସେ CM ହେବାରେ ସବୁଠାରୁ କନିଷ୍ଠ ବ୍ୟକ୍ତି ଥିଲେ।
ଓମାର ଅବଦୁଲ୍ଲାଙ୍କ ରାଜନୈତିକ କ୍ୟାରିୟର ଠାରୁ ତାଙ୍କ ଲଭ୍ ଷ୍ଟୋରୀ ମଧ୍ୟ ସେତିକି ଆକର୍ଷଣୀୟ। ସେ ସେପ୍ଟେମ୍ବର ୧୯୯୪ରେ ପାୟଲ ନାଥଙ୍କୁ ବିବାହ କରିଥିଲେ। ପାୟଲ ଶିଖ୍ ପରିବାରରୁ ଅଟନ୍ତି। ତାଙ୍କ ବାପା ଭାରତୀୟ ସେନାର ଜଣେ ମେଜର ଜେନେରାଲ ଥିଲେ। ଏକ ସାକ୍ଷାତକାରରେ ଓମାର ଅବଦୁଲ୍ଲା କହିଛନ୍ତି ଯେ ରାଜନୀତିରେ ଆସିବା ପୂର୍ବରୁ ସେ ୯୦ଦଶକରେ ଦିଲ୍ଲୀର ଓବରୋଇ ହୋଟେଲରେ କାମ କରୁଥିଲେ। ଏଠାରେ ସେ ପ୍ରଥମ ଥର ପାଇଁ ପାୟଲଙ୍କୁ ଭେଟିଥିଲେ। ପାୟଲ ମଧ୍ୟ ଏଠାରେ କାମ କରୁଥିଲେ। କିଛି ସମୟ ପରେ, ଦୁହେଁ ପରସ୍ପରର ନିକଟତର ହେଲେ ଏବଂ ପରେ ୧୯୯୪ରେ ବିବାହ କଲେ। ଓମାର ଅବଦୁଲ୍ଲା ଏବଂ ପାୟଲଙ୍କ ବିବାହକୁ ନେଇ ଅନେକ ବିବାଦ ଦେଖା ଦେଇଥିଲା।
ଏକ ସାକ୍ଷାତକାରରେ ଓମାର କହିଛନ୍ତି ଯେ, ଉଭୟ ପରିବାର ବିବାହର ବିରୋଧୀ ନ ଥିଲେ, କିନ୍ତୁ କଶ୍ମୀରୀ ପଣ୍ଡିତଙ୍କ ଏକ ବିଭାଗ ଏହି ବିବାହ ଉପରେ ଅତ୍ୟଧିକ କ୍ରୋଧିତ ଥିଲେ ଏବଂ ସେମାନେ ଏହାକୁ ବିରୋଧ କରିଥିଲେ କିନ୍ତୁ ଉଭୟ ପଛକୁ ଫେରି ନଥିଲେ। ଓମାର ଅବଦୁଲ୍ଲା ଏବଂ ପାୟଲଙ୍କର ଜହିର ଏବଂ ଜାମିର ନାମକ ଦୁଇ ପୁଅ ଅଛନ୍ତି।
ତେବେ ପର ମୂହୁର୍ତ୍ତରେ ଓମାର ଅବଦୁଲ୍ଲା ଏବଂ ପାୟଲଙ୍କ ଛାଡପତ୍ର ହୋଇଥିଲା। ପାୟଲ ଏହାକୁ କୋର୍ଟ ଯାଏ ନେଇଥିଲେ। ମିଡିଆ ରିପୋର୍ଟ ଅନୁଯାୟୀ, ୨୦୧୧ରୁ ଉଭୟ ଅଲଗା ରହୁଛନ୍ତି। କୁହାଯାଏ ଯେ ୨୦୦୫ ପରେ ଯେତେବେଳେ ଓମାର ଅବଦୁଲ୍ଲା ଜମ୍ମୁ କଶ୍ମୀରର ରାଜନୀତିରେ ସକ୍ରିୟ ହୋଇଥିଲେ, ସେତେବେଳେ ପାୟଲଙ୍କଠାରୁ ତାଙ୍କର ଦୂରତା ବଢିଥିଲା। ତା’ପରେ କିଛି ସମୟ ପରେ ଦୁହେଁ ଅଲଗା ରହିବାକୁ ସ୍ଥିର କରିଥିଲେ।
