ଗତ କିଛି ସମୟ ଧରି ଚର୍ଚ୍ଚାରେ ଅଛନ୍ତି ନବଜୋତ ସିଂହ ସିଦ୍ଧୁ। ପଞ୍ଜାବ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂହଙ୍କ ସହ ତାଙ୍କର ମନୋମାଳିନ୍ୟ ଖବର ଅନେକଙ୍କୁ ଜଣା। ଏହା ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀଙ୍କ ସମେତ ପୁରା କଂଗ୍ରେସକୁ ଚିନ୍ତାରେ ପକାଇଛି। ସିଦ୍ଧୁ ଏବେ ରାହୁଲ ସମାଧାନର ବାଟ ବାହାର କରନ୍ତୁ ବୋଲି ଚାହୁଁଛନ୍ତି। ହେଲେ ଏକଦା ରାହୁଲଙ୍କୁ ସେ କଟାକ୍ଷ କରିବାର କୌଣସି ମଉକା ଛାଡ଼ୁନଥିଲେ।
୨୦୦୪ରେ ପ୍ରଥମ ଥର ପାଇଁ ସିଦ୍ଧୁ ନିର୍ବାଚନରେ ଲଢ଼ିଥିଲେ। ଭାଜପା ଟିକେଟରୁ ସେ ଅମୃତସରରୁ ନିର୍ବାଚନ ଜିତି ଲୋକ ସଭାରେ ପହଞ୍ଚିଥିଲେ। ୨୦୦୯ରେ ମଧ୍ୟ ସେ ପୁଣିଥରେ ଏମ୍ପି ହୋଇଥିଲେ। ହେଲେ ୨୦୧୪ରେ ଭାଜପା ତାଙ୍କ ସ୍ଥାନରେ ଅରୁଣ ଜେଟଲୀଙ୍କୁ ଅମୃତରସରର ଟିକେଟ ଦେଇଥିଲା। ଏହାକୁ ନେଇ ସିଦ୍ଧୁ ଖପ୍ପା ହୋଇଯାଇଥିଲେ। ଏଥିଯୋଗୁ ଦଳ ତାଙ୍କୁ ରାଜ୍ୟ ସଭାକୁ ପଠାଇ ଦେଇଥିଲା। ହେଲେ ସିଦ୍ଧୁ ୨୦୧୬ରେ ରାଜ୍ୟ ସଭାରୁ ଇସ୍ତଫା ଦେଇଥିଲେ। ଏହାପରେ ୨୦୧୭ରେ ସେ ପଦ୍ମ ଛାଡ଼ି ହାତ ଧରିଥିଲେ।
ଯେତେବେଳେ ସିଦ୍ଧୁ କଂଗ୍ରେସରେ ଯୋଗଦେଇଥିଲେ ସୋସିଆଲ ମିଡିଆରେ ତାଙ୍କୁ ଟ୍ରୋଲ କରାଯାଇଥିଲା। ଭାଜପାରେ ଥିବା ବେଳେ ସେ ରାହୁଲଙ୍କ ମଜା ଉଡ଼ାଉଥିଲେ। ସର୍ବଦା ତାଙ୍କୁ ରାହୁଲ ବାବା, ପପ୍ପୁ ଭଳି ଶବ୍ଦ ବ୍ୟବହାର କରି କଟାକ୍ଷ କରୁଥିଲେ। ଏଣୁ କଂଗ୍ରେସରେ ଯୋଗ ଦେବା ପରେ ରାହୁଲଙ୍କ ସହ ତାଙ୍କର ଫଟୋକୁ ଦେଖି ଲୋକେ ମେମେ ପ୍ରସ୍ତୁତ କରିଥିଲେ।
କଂଗ୍ରେସରେ ଯୋଗ ଦେବା ପରେ ସିଦ୍ଧୁଙ୍କ ଅନ୍ୟ ଏକ ଫଟୋ ଭାଇରାଲ ହୋଇଥିଲା। ଫଟୋରେ ସିଦ୍ଧୁ ସୋନିଆଙ୍କ ପାଦ ଛୁଉଁଥିବା ଦେଖାଯାଇଥିଲା। ଏହାକୁ ନେଇ ମଧ୍ୟ ତାଙ୍କୁ ଟ୍ରୋଲ କରାଯାଇଥିଲା। ତେବେ ଫଟୋଟି ୨୦୧୮ କଂଗ୍ରେସର ରାଷ୍ଟ୍ରୀୟ ଅଧିବେଶନ ସମୟର ଥିଲା। ନିଜ ଭାଷଣ ଦେଇ ଫେରୁଥିବା ବେଳେ ସିଦ୍ଧୁ ପ୍ରଥମେ ମନମୋହନ ସିଂହ ଏବଂ ପରେ ସୋନିଆଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ।
