ଜଳେଶ୍ୱର, ୧୮ା୭(ରବିନାରାୟଣ ପାତ୍ର): ଜଳେଶ୍ୱର ବ୍ଲକ ସଦରମହକୁମା ଠାରୁ ୮ କି.ମି. ଦୂର ସୁଗୋ ପଞ୍ଚାୟତ ଅଧୀନ ବାଣିଦା ଗାଁର ଲୋକମାନେ ବିଭିନ୍ନ ସମସ୍ୟା ମଧ୍ୟରେ କାଳାତିପାତ କରୁଛନ୍ତି । ବର୍ଷା ଦିନ ଆସିଲେ ୫ହଜାର ଲୋକସଂଖ୍ୟା ବିଶିଷ୍ଟ ଏହି ଗାଁର ଚିତ୍ର ବଦଳିଯାଏ। ଲୋକମାନେ ଜଳବନ୍ଦୀରେ ରହୁଥିବା ବେଳେ ରାସ୍ତା ନ ଥିବାରୁ ପିଲାମାନେ ସ୍କୁଲକୁ ଯିବା ସମ୍ଭବ ହୋଇପାରେନାହିଁ। ପଶ୍ଚିମବଙ୍ଗର ଉଦ୍ବୃତ୍ତ ବର୍ଷାପାଣି ଓ ଜଳେଶ୍ୱର ସହରପଟୁ ବର୍ଷାପାଣି ଗଡିଆସି ଗାଁକୁ ଘେରି ରଖିଥାଏ । ପୂର୍ବରୁ ଏହି ପାଣି ନାମ୍ପୋ ଖାଳ ଦେଇ ନିଷ୍କାସିତ ହେଉଥିବା ବେଳେ ଏବେ ଏକପ୍ରକାର ବନ୍ଦ ହୋଇଛି ା ଫଳରେ ହଜାର ହଜାର ଏକର ଚାଷଜମି ପଡିଆ ପଡୁଛି । ନିକଟରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏକ ରାସ୍ତା ନିର୍ମାଣ ହେଉଥିଲେ ମଧ୍ୟ ତାର କଚ୍ଛପ ଅଗ୍ରଗତି ଏବଂ ମାନକୁ ଦେଖି ଯେ କେହି ବି ଅଙ୍ଗୁଳି ନିର୍ଦ୍ଦେଶ କରିବ । ସବୁ ସାହିକୁ ରାସ୍ତା ନ ଥିବାରୁ ବର୍ଷାଦିନେ ଲୋକମାନେ ଜଳବନ୍ଦୀ ଅବସ୍ଥାରେ ରୁହନ୍ତି । ରୋଗୀ ସେବା କିମ୍ବା ଆମ୍ବୁଲାନ୍ସ ଯିବା ସମ୍ଭବ ହୋଇପାରେନାହିଁ । ଏହି ଗାଁର ବହୁ ଗରିବ ଲୋକମାନେ ଆବାସ ଯୋଜନାରୁ ବଞ୍ଚିତ ରହିଛନ୍ତି । ଏ ସମ୍ପର୍କରେ କଂଗ୍ରେସ ରାଜ୍ୟ ପ୍ରବକ୍ତା ସୁଦର୍ଶନ ଦାସଙ୍କ ସହିତ ପ୍ରତିନିଧି ଦଳ ବାଣିଦା ଗାଁକୁ ଯାଇ ସ୍ଥିତି ଅନୁଧ୍ୟାନ କରିଥିଲେ । ବିଭିନ୍ନ ଉନ୍ନୟନ କାର୍ଯ୍ୟ ସମ୍ପର୍କରେ ଅବଗତ ହେବା ସହିତ ଗ୍ରାମ୍ୟ ଉନ୍ନୟନ ବିଭାଗର ଏସ୍ଡିଓ ଅବନୀ ରାଉତ ଓ ଠିକାଦାର ସୁବ୍ରତ ପଣ୍ଡାଙ୍କ ସହିତ ଆଲୋଚନା କରି କାର୍ଯ୍ୟର ମାନ ଠିକ ରଖିବା ଓ ଯଥାଶୀଘ୍ର ଲୋକଙ୍କୁ ସେବା ଯୋଗାଇବାକୁ କହିଥିଲେ । ଏହି ପ୍ରତିନିଧି ଦଳରେ ଦାସଙ୍କ ସହିତ କିଶାନ କଂଗ୍ରେସ ସଭାପତି ସୁଦାମ ପାତ୍ର, କଂଗ୍ରେସ ନେତା ତ୍ରିଲୋଚନ ନାୟକ, ଅକ୍ଷୟ ନାୟକ, ଉମାଶଙ୍କର ମହାପାତ୍ର, ଗୌତମ ଦାସ, ପ୍ରଦୀପ ଦାସ, ସତ୍ୟରଞ୍ଜନ ଆଚାର୍ଯ୍ୟ, ଉମାକାନ୍ତ ଦଳାଇ, ଦିଲୀପ ଦାସ, ବସନ୍ତ ମହାନ୍ତି, ନିର୍ମଳ ଦାସ, ୱାର୍ଡସଭ୍ୟ ସଞ୍ଜୀବ ଦାସ ପ୍ରମୁଖ ଉପସ୍ଥିତ ଥିଲେ ।
