ନୂଆଦିଲ୍ଲୀ,୨୯ା୭: ପଶ୍ଚିମବଙ୍ଗର ହଜାର ହଜାର ସରକାରୀ କର୍ମଚାରୀଙ୍କ ପାଇଁ ଏକ ଖୁବ୍ ଭଲ ଖବର ସାମ୍ନାକୁ ଆସିଛି। ରାଜ୍ୟର ମୁଖ୍ୟମନ୍ତ୍ରୀ ମହଙ୍ଗା ଭତ୍ତା (DA) କୁ ନେଇ ଏକ ବଡ଼ ଅପଡେଟ୍ ଦେଇଛନ୍ତି। ବଙ୍ଗଳାର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ସୂଚନା ଦେଇ କହିଛନ୍ତି ଯେ, ସରକାରୀ କର୍ମଚାରୀମାନଙ୍କୁ ଦୁର୍ଗାପୂଜା ପୂର୍ବରୁ ମହଙ୍ଗା ଭତ୍ତା ପ୍ରଦାନ କରାଯିବ। ଏହା ସହିତ ସେ କହିଛନ୍ତି ଯେ କେନ୍ଦ୍ର ସରକାରଙ୍କ କର୍ମଚାରୀମାନଙ୍କୁ ଯେତିକି ମହଙ୍ଗା ଭତ୍ତା ଦିଆଯାଉଛି, ଜଲ୍ଦି ରାଜ୍ୟ ସରକାରୀ କର୍ମଚାରୀମାନଙ୍କୁ ମଧ୍ୟ ସେତିକି ମିଳିବ। ସେ କହିଛନ୍ତି ଯେ ଏହି ପାର୍ଥକ୍ୟକୁ ଦୂର କରିବା ପାଇଁ ଟିକିଏ ସମୟ ଲାଗିପାରେ। ଆସନ୍ତୁ ଜାଣିବା ମହଙ୍ଗା ଭତ୍ତାକୁ ନେଇ ସେ କି ପ୍ରକାର ସୂଚନା ଦେଇଛନ୍ତି…
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ରାଜ୍ୟ ସରକାରଙ୍କ କର୍ମଚାରୀମାନଙ୍କୁ ଦୁର୍ଗାପୂଜା ପୂର୍ବରୁ ୨୦ ପ୍ରତିଶତ ଅତିରିକ୍ତ ମହଙ୍ଗା ଭତ୍ତା (ଡିଏ) ଏବଂ ଅକ୍ଟୋବର ମାସର ଦରମା ପ୍ରଦାନ କରାଯିବ ବୋଲି କହିଛନ୍ତି। ଅଧିକାରୀ କହିଛନ୍ତି ଯେ, ସେ କେନ୍ଦ୍ର ଏବଂ ରାଜ୍ୟ ସରକାରୀ କର୍ମଚାରୀଙ୍କ ମଧ୍ୟରେ ଥିବା ମହଙ୍ଗା ଭତ୍ତା (ଡିଏ) ର ପାର୍ଥକ୍ୟକୁ କମ୍ କରିବା ପାଇଁ ପ୍ରତିଶ୍ରୁତିବଦ୍ଧ। ସେ ଆହୁରି ମଧ୍ୟ କହିଛନ୍ତି ଯେ କିଛି ଦିନ ପୂର୍ବରୁ ଗଠିତ ସପ୍ତମ ବେତନ କମିଶନଙ୍କ ସୁପାରିଶକୁ ଲାଗୁ କରାଯିବ। ପଶ୍ଚିମବଙ୍ଗ ପୋଲିସ ମୁଖ୍ୟାଳୟ ‘ଭବାନୀ ଭବନ’ରେ ଆୟୋଜିତ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଛନ୍ତି ଯେ, ମୁଁ ଅର୍ଥ ସଚିବ ଏବଂ ଅର୍ଥମନ୍ତ୍ରୀଙ୍କୁ ଅକ୍ଟୋବର ମାସର ଦରମା ଦୁର୍ଗାପୂଜା ପୂର୍ବରୁ ପ୍ରଦାନ କରିବାକୁ କହିଛି। ଏହା ସହିତ, ପୂଜା ମାସରେ ଅତିରିକ୍ତ ୨୦ ପ୍ରତିଶତ ମହଙ୍ଗା ଭତ୍ତା ପ୍ରଦାନ କରିବାକୁ ମୁଁ ସେମାନଙ୍କୁ ନିର୍ଦ୍ଦେଶ ଦେଇଛି।
ରାଜ୍ୟ ସରକାରଙ୍କ କର୍ମଚାରୀମାନଙ୍କୁ ସାଧାରଣତଃ ପ୍ରତ୍ୟେକ ମାସର ଶେଷ କାର୍ଯ୍ୟଦିବସରେ ଦରମା ମିଳିଥାଏ। ଯଦି ଏହି ନିଷ୍ପତ୍ତି ଲାଗୁ ହୁଏ, ତେବେ କର୍ମଚାରୀମାନଙ୍କୁ ଏହି ବର୍ଷ ଅକ୍ଟୋବର ମଝିରେ ହେବାକୁ ଥିବା ଦୁର୍ଗାପୂଜା ଉତ୍ସବର ଯଥେଷ୍ଟ ପୂର୍ବରୁ ଦରମା ମିଳିଯିବ। ମୁଖ୍ୟମନ୍ତ୍ରୀ କହିଛନ୍ତି ଯେ, ରାଜ୍ୟ ସରକାରଙ୍କ ବଜେଟ୍ରେ କରାଯାଇଥିବା ଘୋଷଣା ଅନୁଯାୟୀ ଅତିରିକ୍ତ ୨୦ ପ୍ରତିଶତ ମହଙ୍ଗା ଭତ୍ତା ଅକ୍ଟୋବରରୁ କାର୍ଯ୍ୟକାରୀ ହେବ। ସେ କହିଛନ୍ତି ଯେ କେନ୍ଦ୍ର ଏବଂ ରାଜ୍ୟ ମଧ୍ୟରେ ଡିଏ (DA) ରେ ୪୨ ପ୍ରତିଶତର ପାର୍ଥକ୍ୟ ରହିଛି। ଆମେ ଏହି ପାର୍ଥକ୍ୟକୁ ରାତାରାତି ଶେଷ କରିପାରିବୁ ନାହିଁ, ଏଥିପାଇଁ ସମୟ ଲାଗିବ। ପୂର୍ବରୁ ଆଇପିଏସ୍ (IPS) ରାଙ୍କରୁ ତଳ କର୍ମଚାରୀଙ୍କ ପ୍ରତି ଯଥେଷ୍ଟ ଧ୍ୟାନ ଦିଆଯାଇ ନଥିବା ଦର୍ଶାଇ ଅଧିକାରୀ କହିଛନ୍ତି ଯେ, ପୋଲିସ କର୍ମଚାରୀମାନଙ୍କୁ ମଧ୍ୟ ରାଜ୍ୟ ସରକାରଙ୍କ ଅନ୍ୟ କର୍ମଚାରୀଙ୍କ ଭଳି ବିଗତ କିଛି ବର୍ଷ ହେବ ଆର୍ଥିକ ସମସ୍ୟାର ସାମ୍ନା କରିବାକୁ ପଡ଼ିଛି।
