ନୂଆଦିଲ୍ଲୀ,୧୯।୮: ପ୍ରଥମେ ବିଧାନସଭା ନିର୍ବାଚନରେ ପରାଜୟ, ପରେ ବିଧାୟକମାନଙ୍କ ବିଦ୍ରୋହ ଏବଂ ଶେଷରେ କିଛି ସାଂସଦ ମଧ୍ୟ ସାଥ୍ ଛାଡ଼ିବା ଏସବୁ ପରିସ୍ଥିତିର ସାମ୍ନା କରିଛି ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (TMC)। ମାତ୍ର ବର୍ତ୍ତମାନ TMC ପାଇଁ କିଛି ଆଶ୍ୱସ୍ତିଜନକ ଖବର ଆସିଛି। ପଶ୍ଚିମବଙ୍ଗ ବାର କାଉନସିଲ୍ ଉପରେ TMC ନିଜର ପ୍ରଭାବ ବଜାୟ ରଖିଛି ଏବଂ ଏଠାରେ ୨୩ଟି ସିଟ୍ ମଧ୍ୟରୁ ୧୫ଟିରେ ବିଜୟଲାଭ କରିଛି।
ପଶ୍ଚିମବଙ୍ଗରେ ବିଜୟ ହାସଲ କରିଥିବା ବିଜେପି ଏହି ନିର୍ବାଚନରେ ମାତ୍ର ୩ଟି ସିଟ୍ରେ ସନ୍ତୁଷ୍ଟ ରହିବାକୁ ପଡ଼ିଛି। ମୋଟ ୨୩ଟି ଆସନରୁ TMC ୧୫ଟି, ବିଜେପି ୩ଟି, ବାମମୋର୍ଚ୍ଚା (Left Front) ୩ଟି ଏବଂ କଂଗ୍ରେସ ୨ଟି ସିଟ୍ ଜିତିଛି। ଏଥିରେ ୫ଟି ଆସନ ମହିଳାମାନଙ୍କ ପାଇଁ ସଂରକ୍ଷିତ ଥିଲା, ଯେଉଁଥିରୁ ୪ଟିରେ TMC ଏବଂ ଗୋଟିଏରେ କଂଗ୍ରେସ ବିଜୟୀ ହୋଇଛି। କୁହାଯାଉଛି ଯେ ଯେଉଁ ପ୍ରାର୍ଥୀମାନେ ଜିତିଛନ୍ତି, ସେମାନଙ୍କୁ ମମତା ବାନାର୍ଜୀଙ୍କ ସୁପାରିଶ କ୍ରମେ ନିର୍ବାଚନରେ ଓହ୍ଲାଯାଇଥିଲା।
ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ବାର କାଉନସିଲ୍ ମହିଳା ପ୍ରାର୍ଥୀମାନଙ୍କ ମଧ୍ୟରୁ ଆଉ ଦୁଇଜଣ ମହିଳା ସଦସ୍ୟଙ୍କୁ ମନୋନୀତ କରିବ। ଏହି ମନୋନୟନ ପରେ ପଶ୍ଚିମବଙ୍ଗ ବାର କାଉନସିଲ୍ର ମୋଟ ସଦସ୍ୟ ସଂଖ୍ୟା ୨୫କୁ ବୃଦ୍ଧି ପାଇବ। ଏହି ନିର୍ବାଚନରେ ମୋଟ ୭୫ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱ କରିଥିଲେ। TMC ୨୩ ଜଣ, BJP ୨୨ ଜଣ ଏବଂ ବାମମୋର୍ଚ୍ଚା ୧୨ ଜଣ ପ୍ରାର୍ଥୀ ଓହ୍ଲାଇଥିଲା। ଏହା ବ୍ୟତୀତ ୧୮ ଜଣ ସ୍ୱାଧୀନ ପ୍ରାର୍ଥୀ ମଧ୍ୟ ମୈଦାନରେ ଥିଲେ।
ବିଜେପି ଗତ ନିର୍ବାଚନର ନିଜର ୩ଟି ଆସନର ସଂଖ୍ୟା ବଜାୟ ରଖିଥିବାବେଳେ କଂଗ୍ରେସ ମଧ୍ୟ ନିଜର ୨ଟି ଆସନ ବଞ୍ଚାଇ ରଖିବାରେ ସଫଳ ହୋଇଛି। ତେବେ ବାମମୋର୍ଚ୍ଚାର ଗତ ନିର୍ବାଚନର ୪ଟି ଆସନରୁ କମି ଏଥର ୩ଟିକୁ ଖସିଆସିଛି।
