କୋଲକାତା, ୧୭।୪: ପଶ୍ଚିମବଙ୍ଗରେ ଶନିବାର ପଞ୍ଚମ ପର୍ଯ୍ୟାୟରେ ୪୫ ଆସନ ଲାଗି ମତଦାନ ଅନୁଷ୍ଠିତ ହୋଇଛି। ଅପରାହ୍ନ ୫ଟା ସୁଦ୍ଧା ୭୮.୩୬ ପ୍ରତିଶତ ମତଦାନ ହୋଇଥିବା ମୁଖ୍ୟ ନିର୍ବାଚନ ଅଧିକାରୀ ଆରିଜ୍ ଅଫତାବ ସୂଚନା ଦେଇଛନ୍ତି। ଜଲପାଇଗୁଡ଼ିରେ ସର୍ବାଧିକ ୮୧.୭୩ ପ୍ରତିଶତ ଭୋଟିଂ ହୋଇଥିବା ବେଳେ ପୂର୍ବ ବର୍ଦ୍ଧମାନରେ ୮୧.୭୨, ନଦିଆରେ ୮୧.୫୭, ଉତ୍ତର ୨୪ ପ୍ରଗଣାରେ ୭୪.୮୩, ଦର୍ଜିଲିଂରେ ୭୪.୩୧ ଏବଂ କଲିମପୋଙ୍ଗରେ ୬୯.୫୬ ପ୍ରତିଶତ ମତଦାନ ହୋଇଛି। ଗଣ୍ଡଗୋଳ ଅଭିଯୋଗରେ ୧୨୩ ଜଣଙ୍କୁ ଗିରଫ କରାଯାଇଛି। ଦେଶୀ ବନ୍ଧୁକ ଧରି ଏକ ବୁଥ୍ ବାହାରେ ବୁଲୁଥିବା ସ୍ବାଧୀନ ପ୍ରାର୍ଥୀ କୌଶିକ ଦଶପରାଙ୍କୁ ପୋଲିସ ଗିରଫ କରିଥିଲା। ଶାନ୍ତିପୂର୍ଣ୍ଣ ଭାବେ ନିର୍ବାଚନ ପରିଚାଳନା ଲାଗି ୮୫୩ କମ୍ପାନୀ କେନ୍ଦ୍ରୀୟ ସୁରକ୍ଷା ବଳ ନିୟୋଜିତ କରାଯାଇଥିଲା।
