ନୂଆଦିଲ୍ଲୀ,୧୪।୧ : ଦିଲ୍ଲୀ ସଚିବାଳୟରେ ଅବସ୍ଥିତ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ କାର୍ଯ୍ୟାଳୟରେ ସିବିଆଇ ଚଢ଼ାଉ କରିଛି। ଏହି ସମୟରେ ସେ ଦାବି କରିଛନ୍ତି ଯେ ସିବିଆଇ ପୂର୍ବରୁ କିଛି ପାଇନାହିଁ ଏବଂ ବର୍ତ୍ତମାନ ବି କିଛି ପାଇବ ନାହିଁ।
ସିସୋଡିଆ ଟୁଇଟ କରି କହିଛନ୍ତି ଶନିବାର ପୁଣି ସିବିଆଇ ମୋ କାର୍ଯ୍ୟାଳୟରେ ପହଞ୍ଚିଛି। ଏହା ସ୍ବାଗତଯୋଗ୍ୟ। ସେମାନେ ମୋ ଘର ଉପରେ ଚଢ଼ାଉ କରିଥିଲେ, ମୋ ଅଫିସରେ ଚଢ଼଼ାଉ କରିଥିଲେ, ମୋ ଲକରକୁ ଖୋଜିଥିଲେ, ମୋ ଗାଁର ଯାଞ୍ଚ କରିଥିଲେ। ମୋ ବିରୁଦ୍ଧରେ କିଛି ମିଳିଲା ନାହିଁ ଏବଂ ମିଳିବ ନାହିଁ କାରଣ ମୁଁ କିଛି ଭୁଲ କରି ନାହିଁ। ମୁଁ ଦିଲ୍ଲୀର ପିଲାମାନଙ୍କ ଶିକ୍ଷା ପାଇଁ ଆନ୍ତରିକତାର ସହିତ କାର୍ଯ୍ୟ କରିଥିଲି। ଏଥି ସହ ସିବିଆଇ ସୂତ୍ରରୁ ପ୍ରକାଶ ଯେ ଆମେ ସିସୋଡିଆଙ୍କ କାର୍ଯ୍ୟାଳୟରେ ଚଢ଼ାଉ କରିନାହୁଁ। ବର୍ତ୍ତମାନ ସୁଦ୍ଧା ସିବିଆଇ ପକ୍ଷରୁ କୌଣସି ସରକାରୀ ସୂଚନା ଆସିନାହିଁ।
ସୂଚନାଯୋଗ୍ୟ, ମଦ ଦୁର୍ନୀତିକୁ ନେଇ ସିବିଆଇ ସିସୋଡିଆଙ୍କ କାର୍ଯ୍ୟାଳୟ ଏବଂ ବାସଭବନରେ ପୂର୍ବରୁ ଚଢ଼ାଉ କରିସାରିଛି। ଏହି ସମୟରେ ତାଙ୍କ ଲକରଗୁଡ଼ିକୁ ମଧ୍ୟ ଖୋଜା ଯାଇଥିଲା। ନିକଟରେ ସିବିଆଇ ଏକ୍ସାଇଜ ପଲିସି ସ୍କାମ ସମ୍ପର୍କରେ କୋର୍ଟରେ ଏକ ଚାର୍ଜଶିଟ ଦାଖଲ କରିଥିଲା। ସିବିଆଇ କୋର୍ଟରେ କହିଛି ଯେ ଏହି ମାମଲାରେ ୭ ଜଣଙ୍କ ବିରୋଧରେ ଚାର୍ଜଶିଟ ଦାଖଲ କରାଯାଇଛି। ସେଥିମଧ୍ୟରୁ ୩ ଜଣ ସରକାରୀ କର୍ମଚାରୀ। ଏହା ମଧ୍ୟ କୁହାଯାଇଥିଲା ଯେ ସିସୋଡିଆଙ୍କ ବିରୋଧରେ ତଦନ୍ତ ଚାଲିଛି।
