ଅକଲାଣ୍ଡ,୨୩।୫: ସନରାଇଜର୍ସ ହାଇଦ୍ରାବାଦ ଅଧିନାୟକ କେନ ୱିଲିୟମସନ ଦ୍ୱିତୀୟ ଥର ପାଇଁ ପିତା ହୋଇଛନ୍ତି। ତାଙ୍କ ପ୍ରେମିକା ସାରା ରହିମ୍ ଏକ ପୁତ୍ର ସନ୍ତାନ ଜନ୍ମ ଦେଇଛନ୍ତି। ୱିଲିୟମସନ ଇନଷ୍ଟାଗ୍ରାମରେ ପ୍ରେମିକା ଏବଂ ପୁଅର ଫଟୋ ଶେୟାର କରି ପ୍ରଶଂସକମାନଙ୍କୁ ଏହି ଖୁସି ଖବର ଦେଇଛନ୍ତି। ପୂର୍ବରୁ ତାଙ୍କର ମାଗି ନାମରେ ଏକ ଝିଅ ଅଛି। ମାଗି ୨୦୧୯ରେ ଜନ୍ମଗ୍ରହଣ କରିଥିଲେ।
ଶିଶୁ ଜନ୍ମ ପାଇଁ ଆଇପିଏଲ ୨୦୨୨ର ଶେଷ ଲିଗ ମ୍ୟାଚ ପୂର୍ବରୁ ୱିଲିୟମସନ ତାଙ୍କ ଦଳ ହାଇଦ୍ରାବାଦ ଛାଡି ଘରକୁ ଫେରିଥିଲେ। ସେ ତାଙ୍କ ପରିବାର ସହିତ ସମୟ ବିତାଇବାକୁ ଚାହୁଁଥିଲେ। ୱିଲିୟମସନଙ୍କ ନେତୃତ୍ୱାଧୀନ ଦଳ ଲିଗରେ ବେଶି କିଛି କରିପାରି ନ ଥିଲା। ଏପରିକି ଶେଷ ଲିଗ ମ୍ୟାଚ ଦଳ ପଞ୍ଜାବ କିଙ୍ଗ୍ସଠାରୁ ୫ ଉଇକେଟରେ ପରାସ୍ତ ହୋଇଥିଲା। ଏହି ପରାଜୟ ପରେ ହାଇଦ୍ରାବାଦ ଆଇପିଏଲ ୨୦୨୨କୁ ବିଦାୟ ଦେଇ ପଏଣ୍ଟ ଟେବୁଲରେ ୮ମ ସ୍ଥାନରେ ରହିଛି। ଏଥି ସହିତ ପଞ୍ଜାବ କିଙ୍ଗସ ଷଷ୍ଠ ସ୍ଥାନରେ ରହି ଲିଗ୍ରୁ ବିଦାୟ ନେଇଛି।
ଆଇପିଏଲର ୱିଲିୟମସନଙ୍କ ବ୍ୟାଟ ମଧ୍ୟ ଚାଲି ନ ଥିଲା। ସେ ୧୩ଟି ମ୍ୟାଚରେ ହାରାହାରି ୧୯.୬୪ରେ ମାତ୍ର ୨୧୬ ରନ ସଂଗ୍ରହ କରିଥିଲେ। ସେ ପୁରା ଲିଗରେ ମାତ୍ର ଗୋଟିଏ ଅର୍ଦ୍ଧଶତକ ହାସଲ କରିଥିଲେ। ୱିଲିୟମ୍ସନ କେବଳ ବ୍ୟାଟ ସହିତ ଫ୍ଲପ ହୋଇ ନ ଥିଲେ, ଅଧିନାୟକତ୍ୱ ଦୃଷ୍ଟିରୁ ମଧ୍ୟ ଫ୍ଲପ ହୋଇଥିଲେ। କ୍ରମାଗତ ଦୁଇଟି ମ୍ୟାଚ ହାରି ହାଇଦ୍ରାବାଦ ଟୁର୍ନାମେଣ୍ଟ ଆରମ୍ଭ କରିଥିଲା। ଅବଶ୍ୟ, ଏହା ପରେ ଦଳ ଏକ ଦୃଢ ପ୍ରତ୍ୟାବର୍ତ୍ତନ କରି କ୍ରମାଗତ ୫ଟି ମ୍ୟାଚ ଜିତିଥିଲା।
