ଭୁବନେଶ୍ୱର,୧୫।୧୧(ବ୍ୟୁରୋ): ରାଜଧାନୀରେ ମାରଣାସ୍ତ୍ର ଧରି ଆତଙ୍କ ସୃଷ୍ଟି କରିଥିବା କେବିଏନ୍ ଗ୍ୟାଙ୍ଗ ସମ୍ପର୍କରେ ଅଧିକ ତଥ୍ୟ ହାସଲ କରୁଛି କମିଶନରେଟ ପୋଲିସ। ଶନିବାରଠାରୁ ଗ୍ୟାଙ୍ଗର ୫ ସଦସ୍ୟଙ୍କୁ ୨ ଦିନିଆ ରିମାଣ୍ଡରେ ଆଣି ପୋଲିସ ମାରଥନ୍ ଜେରା କରିଥିଲା। ଅଭିଯୁକ୍ତ ରାହୁଲ ଜେନା, ରାଜେଶ ବେହେରା ଓରଫ ଚେଙ୍ଗ, ସୁମନ କୁମାର ପରିଡ଼ା, ସନାତନ ବେହେରା ଓରଫ ସନିଆ ଓ ନରେନ୍ଦ୍ର କୁମାର ଜେନାଙ୍କୁ ପୃଥକ ଭାବେ ପଚରାଉଚରା କରାଇଥିଲା। ସେମାନଙ୍କ ବୟାନ ଆଧାରଣରେ ରବିବାର ପୁଣି ୨ଟି ଖେଳନା ବନ୍ଧୁକ, ଗୋଟିଏ ବାଇକ୍ କ୍ରାଙ୍କ୍, ୨ଟି ଖଣ୍ଡା, ଗୋଟିଏ ଭୁଜାଲି ଜବତ ହୋଇଛି। ପୂର୍ବରୁ କେବିଏନ୍ ଗ୍ୟାଙ୍ଗରେ ୨୯ଜଣ ସଦସ୍ୟ ଥିବା ପୋଲିସ କହିଥିଲା। ହେଲେ ଏବେ ଉକ୍ତ ଗ୍ୟାଙ୍ଗରେ ୩୦ଜଣ ସଦସ୍ୟ ଥିବା ପୋଲିସ ଜାଣିବାକୁ ପାଇଛି। ଗ୍ୟାଙ୍ଗ ସମ୍ପର୍କରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପୋଲିସ ହାସଲ କରିଥିଲେ ମଧ୍ୟ ମୁଖ୍ୟ ଅଭିଯୁକ୍ତ ତଥା ଗ୍ୟାଙ୍ଗର ମାଷ୍ଚରମାଇଣ୍ଡ ବୁବୁ ଜେନାଙ୍କ ସମ୍ପର୍କରେ ଏଯାବତ୍ ସାମାନ୍ୟତମ ସୂଚନା ମିଳିପାରୁ ନାହିଁ। ତେବେ ଏମାନେ ଯେଉଁ ବନ୍ଧୁକ ଧରି ଭିଡିଓ ଭାଇରାଲ କରିଥିଲେ ତାହା ଖେଳନା ବୋଲି ପୋଲିସ ସ୍ପଷ୍ଟ କରିଛି।
ଏନେଇ ଡିସିପି ଉମାଶଙ୍କର ଦାଶ କହିଛନ୍ତି, ସମସ୍ତ ଅଭିଯୁକ୍ତଙ୍କୁ ପଚରାଉଚରା କରାଯାଇ ବିଭିନ୍ନ ତଥ୍ୟ ହାସଲ କରାଯାଇଛି। ତାଙ୍କ ସାଙ୍ଗରେ କିଏ କିଏ ରହୁଥିଲେ, ସେମାନେ କେଉଁଠି ବସି ଖଟି କରୁଥିଲେ, ଭିଡିଓ ଶୁଟିଂ ଓ ଏଡିଟିଂ କେମିତି କରିଛନ୍ତି, ସୋସିଆଲ୍ ମିଡିଆରେ ଅପଲୋଡ୍ କିଏ କରିଛି, ସେମାନଙ୍କୁ ଜେରାବେଳେ ଏଭଳି ବିଭିନ୍ନ ତଥ୍ୟ ଆମେ ସଂଗ୍ରହ କରିଛୁ। ସେମାନେ ଦେଖେଇ ହୋଇ ଜନସାଧାରଣଙ୍କୁ ଭୟଭୀତ କରୁଥିଲେ। ତେବେ ଆଉ ଯେଉଁ ସଦସ୍ୟଙ୍କ ଘରେ ମାରଣାସ୍ତ୍ର ରହିଛି ସେସବୁକୁ ଜବତ କରାଯିବ। ଆବଶ୍ୟକ ପଡିଲେ ଏମାନଙ୍କୁ ପୁନର୍ବାର ରିମାଣ୍ଡରେ ଆଣାଯିବ। ଗ୍ୟାଙ୍ଗର ଫେରାର ସଦସ୍ୟଙ୍କୁ ଖୁବ୍ଶ୍ରୀଘ୍ର ଧରିବାକୁ ଚେଷ୍ଟା ଚାଲିଛି ବୋଲି ସେ କହିଛନ୍ତି।
ମାଷ୍ଟରମାଇଣ୍ଡ ବୁବୁଙ୍କ ନେତୃତ୍ୱରେ ୩୦ରୁ ଊର୍ଦ୍ଧ୍ୱ ସଦସ୍ୟଙ୍କୁ ନେଇ ରାଜଧାନୀରେ କେବିଏନ୍ ଗ୍ୟାଙ୍ଗ ମୁଣ୍ଡ ଟେକିଥିଲା। ସେମାନେ ଅପରାଧ ଘଟାଇବା ସହ ଲୋକଙ୍କ ମନରେ ଭୟ ସୃଷ୍ଟି କରିବାକୁ ଖଣ୍ଡା, ଭୁଜାଲି ବୁଲାଇ ଗୁଳି ଫୁଟାଇ ଭିଡ଼ିଓକୁ ଭାଇରାଲ କରି ପୋଲିସକୁ ଖୋଲା ଚ୍ୟାଲେଞ୍ଜ୍ ଦେଉଥିଲେ। ଲୁଟ୍ପାଟ କରିବା ସହ ଦାଦାବଟି ମଧ୍ୟ ମାଗିବା ଆରମ୍ଭ କରିଥିଲେ। ଏୟାରପୋର୍ଟ ଥାନା ପୋଖରୀପୁଟ ଅଞ୍ଚଳରେ ଅଭିଯୁକ୍ତ ଚେଙ୍ଗ ରହୁଥିବା ଘର ଭାଙ୍ଗି ପୋଲିସ ଏକ ଖଣ୍ଡା ଜବତ କରିଥିଲା। ତା’ପର ଦିନ ବୁବୁଙ୍କ ଘରେ ମଧ୍ୟ ପୋଲିସ ଚଢାଉ କରିଥିଲା। ଚେଙ୍ଗ ଓ ସନିଆ ଭୟଭୀତ ହୋଇ ମଙ୍ଗଳବାର କୋର୍ଟରେ ଆତ୍ମସମର୍ପଣ କରିଥିଲେ।
