ଭୁବନେଶ୍ୱର,୧୧ା୫(ବ୍ୟୁରୋ): ଓଡ଼ିଶା କଂଗ୍ରେସର ନେତାମାନେ ରାହୁଲ ଗାନ୍ଧୀଙ୍କୁ ଭେଟି ଆଲୋଚନା କରିବା ପରେ ଓଡ଼ିଶା ଫେରି ଆସିଛନ୍ତି। ତେବେ ରାହୁଲଙ୍କୁ ଭେଟିବା ପରେ ସମସ୍ତେ ଉତ୍ସାହିତ ଥିବା ଦେଖିବାକୁ ମିଳିଛି। ରାହୁଲଙ୍କ ସହ ଆଲୋଚନା ସଫଳ ହୋଇଥିବା ବେଳେ ଖୁବ୍ଶୀଘ୍ର ନୂଆ ପିସିସି(ପ୍ରଦେଶ କଂଗ୍ରେସ କମିଟି) ସଭାପତିଙ୍କ ନାଁ ଘୋଷଣା ହୋଇପାରେ ବୋଲି ଜଣାପଡ଼ିଛି। ବିଜୁ ପଟ୍ଟନାୟକ ବିମାନବନ୍ଦରରେ ମଙ୍ଗଳବାର ପହଞ୍ଚିବା ପରେ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି, ସେ ବିଶେଷ ଭାବେ ଖୁସି ଅଛନ୍ତି। ସ୍ବାସ୍ଥ୍ୟଗତ କାରଣରୁ ଦାୟିତ୍ୱରୁ ଯିବା ପାଇଁ ଯାହା ଚାହୁଁଥିଲି ଏବେ ତାହା ପୂରଣ ହେବାକୁ ଯାଉଛି। ଏବେ ସଭାପତି ପରିବର୍ତ୍ତନ ନେଇ କାର୍ଯ୍ୟକ୍ରମ ଆରମ୍ଭ ହୋଇସାରିଛି। କେତେଦିନ ଲାଗିବ ସେକଥା କହି ହେବ ନାହିଁ ବୋଲି ନିରଞ୍ଜନ କହିଛନ୍ତି। ବରିଷ୍ଠ ନେତା ତଥା ବିଧାୟକ ନରସିଂହ ମିଶ୍ର କହିଛନ୍ତି, ସମସ୍ତେ କିଭଳି ଦଳରେ ଏକତା ରକ୍ଷା କରି ଶୃଙ୍ଖଳିତ ସୈନିକ ଭାବେ କାର୍ଯ୍ୟକରି କଂଗ୍ରେସକୁ ସୁଦୃଢ଼ କରିହେବ ସେନେଇ ଆଲୋଚନା ହୋଇଥିଲା। ତେବେ ଆଲୋଚନା ସଫଳ ହୋଇଥିବା ନରସିଂହ କହିଛନ୍ତି। ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି, ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଛି। ବିଧାନସଭା ଏବଂ ଲୋକ ସଭାରେ କଂଗ୍ରେସ କିପରି ଅଧିକ ଆସନ ଦଖଲ କରିବ ସେନେଇ ରୋଡ୍ମ୍ୟାପ୍ ପ୍ରସ୍ତୁତ କରାଯିବ। ସବୁ ବିଷୟରେ ପୁଙ୍ଖାନୁପୁଙ୍ଖ ଭାବେ ଆଲୋଚନା ହୋଇଛି। ରାଜ୍ୟର ସମସ୍ତ କଂଗ୍ରେସ ବିଧାୟକ, ଏମ୍ପି ଏବଂ ବରିଷ୍ଠ ନେତା ଯାଇଥିଲେ। ରାହୁଲ ସମସ୍ତଙ୍କ ସହ ଓ୍ବାନ୍ ଟୁ ଓ୍ବାନ୍ ଆଲୋଚନା କରିଛନ୍ତି। ଅତିଶୀଘ୍ର ନୂଆ ସଭାପତିଙ୍କ ନାଁ ଘୋଷଣା ହେବ। ବ୍ରଜରାଜନଗର ଉପନିର୍ବାଚନ କିପରି ଭଲରେ ଲଢ଼ିହେବ ସେନେଇ ମଧ୍ୟ ଆଲୋଚନା ହୋଇଛି। ତେବେ ଅଧିକାଂଶ ବିଧାୟକ ଏବଂ ବରିଷ୍ଠ ନେତା ଫେରି ଆସିଥିବା ବେଳେ ଆଉ କେତେଜଣ ନେତା ଏବେ ଦିଲ୍ଲୀରେ ରହି ଆଉ କେତେଜଣ ଏଆଇସିସି ନେତାଙ୍କୁ ଭେଟୁଥିବା ଜଣାପ଼ଡିଛି।
