ପଦ୍ମପୁର,୧୮।୨: ବରଗଡ଼ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟାକୁ ୩ମାସ ବିତିଯାଇଛି। ଅନ୍ୟପକ୍ଷେ ଧାନବିକ୍ରି ସରି ନ ଥିବାବେଳେ ଜିଲାର ଅନେକ ମଣ୍ଡିକୁ ବନ୍ଦ କରି ଦିଆଯାଇଛି। ସେହିପରି ଖୋଲାଥିବା ଅନ୍ୟ ସମସ୍ତ ମଣ୍ଡିକୁ ବନ୍ଦ କରିବା ପାଇଁ ମଧ୍ୟ ଯୋଗାଣ ବିଭାଗ ନିଷ୍ପତ୍ତି ନେଇ ବିଭାଗୀୟ ଅଧିକାରୀଙ୍କୁ ଚିଠି କରିଛି। ତେବେ ଧାନ ଉଠାଣ ଦାବିରେ ଦୀର୍ଘ ୮ ଦିନ ହେଲା ଚାଷୀମାନେ ପଦ୍ମପୁର ଉପଜିଲାପାଳ ଅଫିସ ଆଗରେ ଧାନ ରଖି ଦିନରାତି ଧାରଣାରେ ବସିଥିବା ବେଳେ ପ୍ରଶାସନ ଚାଷୀଙ୍କ ଧାନ ଉଠାଇବା ବଦଳରେ ଖୋଲାଥିବା ମଣ୍ଡିକୁ ବନ୍ଦ କରିବା ଯୋଜନା ଚାଷୀଙ୍କ ଆନ୍ଦୋଳନ ତାତି ଆହୁରି ବଢ଼ିଯାଇଛି। ଗୁରୁବାର ସନ୍ଧ୍ୟାରେ ମୁଖ୍ୟ ଜିଲା ଯୋଗାଣ ଅଧିକାରୀ(ଚିଫ୍ ସିଏସଓ) ରଜନୀକାନ୍ତ ଦାଶ ଏବଂ ସମବାୟ ଉପନିବନ୍ଧକ (ଡିଆରସିଏସ) ଭକ୍ତବନ୍ଧୁ ସାହୁ ଚାଷୀଙ୍କ ଧାରଣାସ୍ଥଳକୁ ପହଞ୍ଚିଥିଲେ। ମାତ୍ର ବିକ୍ରି ହୋଇପାରି ନ ଥିବା ଧାନ ଉଠାଣ ନେଇ କିଛି ଠୋସ୍ ପ୍ରତିଶ୍ରୁତି ଦେଇ ନ ଥିଲେ । ଫଳରେ ଚାଷୀମାନେ ଚିଫ୍ ସିଏସ୍ଓ ଦାଶ ଏବଂ ଡିଆର୍ସିଏ ସାହୁଙ୍କୁ ଘେରିଯାଇ ଧାରଣାସ୍ଥଳରେ ଅଟକ ରଖିଛନ୍ତି । ପଦ୍ମପୁର ଆର୍ଏମ୍ସିର ମଣ୍ଡି ତଥା ଉପଜିଲାପାଳ ଅଫିସ ଆଗରେ ଗଦା ହୋଇଥିବା ଧାନ ଉଠା ନ ଯିବା ପର୍ଯ୍ୟନ୍ତ ସେମାନେ ଧାରଣାରୁ ଉଠିବେ ନାହିଁ କିମ୍ବା ଅଫିସରଙ୍କୁ ଛାଡ଼ିବେ ନାହିଁ ବୋଲି ଧାରଣାରତ ଚାଷୀମାନେ ଅଟଳ ରହିଛନ୍ତି।
