ଗୁଡଭେଲା,୨ା୫(ଡି.ଏନ.ଏ.): ତୁଷୁରା ସହରଟି ନଦୀ କୂଳରେ ଥାଇ ମଧ୍ୟ ପିଇବା ପାଇଁ ସହରବାସୀ ହନ୍ତସନ୍ତ ହେଉଛନ୍ତି। ସହରକୁ ସ୍ଥାନୀୟ ସୋନଗଡ ନଦୀରୁ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପାଣି ପାଇପ ମାଧ୍ୟମରେ ଯୋଗାଣ ହୋଇଥାଏ। ଏବେ ଉକ୍ତ ନଦୀରେ ପାଣି ନ ଥିବାରୁ ସହରକୁ ମାତ୍ର ଅଧ୍ୟ ଘଣ୍ଟା ପାଣି ଯୋଗାଣ ହେଉଛି। ଯାହା ସମୁଦ୍ରକୁ ଶଙ୍ଖେ ସଦୃଶ୍ୟ। ଏହାର କୌଣସି ପ୍ରତିକାର ବ୍ୟବସ୍ଥା କରାଯାଇ ନ ଥିବା ବେଳେ ପାଣି ଦେୟ ଅସୁଲି ଜୋରସୋର ଚାଲିଛି। ଅନ୍ୟପକ୍ଷରେ ତେଲନଦୀରେ ସବୁ ସମୟରେ ପାଣି ଥିଲେ ମଧ୍ୟ ସେଠାରୁ ଜଳ ଯୋଗାଣ ପାଇଁ ବ୍ୟବସ୍ଥା କରାଯାଉ ନାହିଁ। ଏବେ ତୁଷୁରା ସହରବାସୀ ପାଣି ଟିକିଏ ପାଣି ହନ୍ତସନ୍ତ ହେଉଥିବା ବେଳେ ପାଣି ଟ୍ରାଙ୍କରର ବ୍ୟବସ୍ଥା ମଧ୍ୟ କରାଯାଉ ନାହିଁ। ଏସମ୍ପର୍କରେ ସ୍ଥାନୀୟ ଜନସ୍ବାସ୍ଥ୍ୟ ବିଭାଗ ଅଧିକାରୀ ଅଫିସ ରେ ନ ଥିବାରୁ ତାଙ୍କର ମତାମତ ନିଆଯାଇ ପାରି ନଥିବା ବେଳେ ଉକ୍ତ କାର୍ଯ୍ୟାଳୟର କର୍ମଚାରୀ ବନଛୋର ବାବୁ କହନ୍ତି ନଦୀରେ ପାଣି ନାହିଁ, ସମସ୍ତ ଅଧିକାରୀ ଜାଣିଛନ୍ତି। ଆମ୍ଭେ କଣ କରି ପାରିବୁ ବୋଲି ଓଲଟି ପ୍ରଶ୍ନ କରିଥିଲେ। ଏବେ ଦେଖିବାକୁ ବାକି ରହିଲା ନଦୀ କୂଳରେ ଥିବା ଏହି ସହରର ପାଣି ସମସ୍ୟା ଦୂର କେବେ ହେଉଛି।
