ଜଳ ବିଶେଷଜ୍ଞ ତଥା ଓଡ଼ିଶାର ଜଳ ମାନବ ଭାବେ ପରିଚିତ ରଞ୍ଜନ ପଣ୍ଡା। ଜଳ, ପରିବେଶ ସଂରକ୍ଷଣ ଏବଂ ଜଳବାୟୁ ପରିବର୍ତ୍ତନକୁ ପ୍ରୋତ୍ସାହିତ କରିବା ପାଇଁ ସେ ତୃଣମୂଳ ସ୍ତରରୁ ଜାତୀୟ ସ୍ତର ପର୍ଯ୍ୟନ୍ତ ପ୍ରାୟ ତିନି ଦଶନ୍ଧି ହେଲା କାମ କରୁଛନ୍ତି। ସେ ଏବେ ‘ୱାଟର ଇନିସିଏଟିଭ୍ ଓଡ଼ିଶା’ ଏବଂ ‘କମ୍ବାଟ୍ କ୍ଲାଇମେଟ୍ ଚେଞ୍ଜ ନେଟ୍ଓ୍ବର୍କ’ ଭାରତର ଆବାହକ ଅଛନ୍ତି। ଏଥିସହ ସେ ‘ମହାନଦୀ ପିସ୍ ଇନିସିଏଟିଭ୍’, ‘ହେଲ୍ଦି ରିଭର୍ସ, ହାପି ସିଟିଜ୍’ ଏବଂ ‘ୟୁଥ୍ଫୋର୍ୱାଟର’ ଅଭିଯାନର ମଧ୍ୟ ନେତୃତ୍ୱ ନେଉଛନ୍ତି। ପ୍ରତିବର୍ଷ ଓଡ଼ିଶା ନଦୀ ସମ୍ମିଳନୀ ଆୟୋଜନ କରି ରଞ୍ଜନ ଜଳ ସଂରକ୍ଷଣ ଓ ଜଳବାୟୁ ପରିବର୍ତ୍ତନ କ୍ଷେତ୍ରରେ ନୂଆ ଆହ୍ବାନ ଦେଇଆସୁଛନ୍ତି। ତୃଣମୂଳ ସମ୍ପ୍ରଦାୟ ସହିତ ଜଳ ଏବଂ ଜଳବାୟୁ ପରିବର୍ତ୍ତନ ପ୍ରକଳ୍ପରେ କାର୍ଯ୍ୟ କରୁଛନ୍ତି। ଏଥିସହ ସେ ନିୟମିତ ଅଭିଯାନ, ଅନୁସନ୍ଧାନ, ଅଧ୍ୟୟନ ଉପରେ ତାଙ୍କ ସଂଗ୍ରାମ ଜାରି ରଖିଛନ୍ତି। ରଞ୍ଜନ ରାଷ୍ଟ୍ରପତିଙ୍କ ଦ୍ୱାରା ଭାରତର ପ୍ରଥମ ‘ଗ୍ରୀନ୍ ହିରୋ’ ସମ୍ମାନ ପାଇଥିବାବେଳେ ବିଭିନ୍ନ ଜାତୀୟ ଗଣମାଧ୍ୟମ ସଂସ୍ଥା ପକ୍ଷରୁ ମଧ୍ୟ ପୁରସ୍କୃତ ହୋଇଛନ୍ତି। ନ୍ୟୁୟର୍କ ଭିତ୍ତିକ ବିଶ୍ୱସ୍ତରୀୟ ସଂସ୍ଥା ‘ଓ୍ବାଟରକିପର ଆଲିଆନ୍ସ’ ପକ୍ଷରୁ ତାଙ୍କୁ ମହାନଦୀ ରିଭର ଓ୍ବାଟରକିପର ମାନ୍ୟତା ଦିଆଯାଇଛି। ଜାତୀୟ ତଥା ଅନ୍ତର୍ଜାତୀୟ ସେମିନାର ବା କର୍ମଶାଳା ସାଙ୍ଗକୁ ବିଶ୍ୱବିଦ୍ୟାଳୟଗୁଡ଼ିକରେ ଜଳ ଓ ଜଳବାୟୁ ପରିବର୍ତ୍ତନ ପ୍ରସଙ୍ଗ ଉପରେ ବକ୍ତବ୍ୟ ଦେବା ପାଇଁ ରଞ୍ଜନଙ୍କୁ ନିୟମିତ ନିମନ୍ତ୍ରଣ କରାଯାଉଛି। ସେ ଜେନେଭା ବିଶ୍ୱବିଦ୍ୟାଳୟରେ ଭିଜିଟିଂ ଫାକଲ୍ଟି ଭାବେ ଯୋଗଦେଇ ଜଳ ଓ ଜଳବାୟୁର ସୁରକ୍ଷା ପାଇଁ ଅନେକ ଯୋଦ୍ଧା ତିଆରି କରିଛନ୍ତି। ‘ଧରିତ୍ରୀ’ ପକ୍ଷରୁ ଆୟୋଜିତ ଯୁବ ସମ୍ମିଳନୀ ‘କ୍ଲାଇମେଟ୍ ଚେଞ୍ଜ: ଫୋକସ୍ ଓଡ଼ିଶା’ରେ ଏକ୍ସପର୍ଟ ପ୍ୟାନେଲିଷ୍ଟ ଭାବେ ଯୋଗଦେବେ।
