ଜମନକିରା, ୮।୮ (ରବୀନ୍ଦ୍ର ପ୍ରସାଦ ଦାନୀ): ଚଳିତ ବର୍ଷ ଅତ୍ୟଧିକ ବର୍ଷା ଯୋଗୁଁ କୁଚିଣ୍ଡା-ଲାଡ-ଫାଶିମାଲ ଭାୟା ଧୁଡ଼ିପାଲି ପିଡବ୍ଲ୍ୟୁଡି ରାସ୍ତାରେ ଗମ୍ଭୀର ସମସ୍ୟା ସୃଷ୍ଟି ହୋଇଛି। ତିହାଡ଼ିପାଲି ଶିବ ମନ୍ଦିର ନିକଟରେ ଥିବା ନାଳ ଉପରେ ନିର୍ମିତ ପୋଲଟି ସୁରକ୍ଷିତ ଓ ଠିକ୍ଠାକ୍ ଥିଲେ ମଧ୍ୟ ପ୍ରବଳ ବର୍ଷା ଯୋଗୁ ନାଳର ଜଳସ୍ତର ହଠାତ୍ ବୃଦ୍ଧି ପାଇ ପୋଲ ଉପରେ ବନ୍ୟାଜଳ ପ୍ରବାହିତ ହେଉଛି। ଫଳରେ ଏହି ମୁଖ୍ୟ ମାର୍ଗରେ ଯାତାୟାତ ବାଧାପ୍ରାପ୍ତ ହୋଇଛି।
ଉପରମୁଣ୍ଡରେ ଅବିଶ୍ରାନ୍ତ ବର୍ଷା ହେତୁ ନାଳରେ ପ୍ରବଳ ଜଳସ୍ରୋତ ସୃଷ୍ଟି ହୋଇ ପୋଲ ଉପରେ ପାଣି ବହିବାରେ ଲାଗିଛି। ରାସ୍ତାର ଉଭୟ ପାର୍ଶ୍ୱରେ ଅନେକ ଯାନବାହନ ଅଟକି ରହିବା ସହ ସ୍ଥାନୀୟ ଅଞ୍ଚଳବାସୀ, ନିତିଦିନିଆ ଯାତ୍ରୀ, ସ୍କୁଲ-କଲେଜ ଛାତ୍ରଛାତ୍ରୀ ଏବଂ ଜରୁରୀକାଳୀନ ସେବା ପାଇଁ ଯାଉଥିବା ଲୋକେ ଘୋର ଅସୁବିଧାର ସମ୍ମୁଖୀନ ହୋଇଛନ୍ତି।
ଏଭଳି ବିପଜ୍ଜନକ ପରିସ୍ଥିତି ସତ୍ତ୍ୱେ କେତେକ ଦୁଃସାହସୀ ଚାଳକ ଓ ସ୍ଥାନୀୟ ଲୋକେ ପ୍ରବଳ ଜଳସ୍ରୋତ ମଧ୍ୟରେ ଜୀବନକୁ ବାଜି ଲଗାଇ ବାଇକ୍ ଓ ଅନ୍ୟାନ୍ୟ ଯାନବାହନ ଠେଲି ପାର୍ ହେଉଥିବା ଦୃଶ୍ୟ ଦେଖିବାକୁ ମିଳୁଛି। ଏଭଳି ବିପଜ୍ଜନକ ଭାବେ ଯାତାୟାତ କରିବା ଯେକୌଣସି ସମୟରେ ବଡ଼ଧରଣର ଦୁର୍ଘଟଣାକୁ ଆମନ୍ତ୍ରଣ କରିପାରେ।
ପ୍ରବଳ ବର୍ଷା ସମୟରେ ଏହି ସ୍ଥାନରେ ବାରମ୍ବାର ଜଳପ୍ଲାବନ ସମସ୍ୟା ସୃଷ୍ଟି ହେଉଥିବାରୁ ଭବିଷ୍ୟତରେ ଯାତାୟାତ ସୁଗମ କରିବା ଏବଂ ବିପଦ ଏଡ଼ାଇବା ପାଇଁ ଏଠାରେ ରାସ୍ତା ଓ ପୋଲର ଉଚ୍ଚତା ବୃଦ୍ଧି କରିବାକୁ ସ୍ଥାନୀୟ ଜନସାଧାରଣ ପ୍ରଶାସନ ନିକଟରେ ଦାବି କରିଛନ୍ତି।
