ପାକିସ୍ତାନ କ୍ରିକେଟ ଦଳର ଭିଜାକୁ ଅପେକ୍ଷା
8:19 amSeptember 24, 2023September 24, 2023 / 02

ଇନ୍ଦୋର,୨୪ା୯: ଆଇସିସି ଦିନିକିଆ ବିଶ୍ୱକପ୍‌ ଖେଳିବାକୁ ଭାରତ ଗସ୍ତରେ ଆସିବା ଲାଗି ଭିଜା ପାଇଁ ଅପେକ୍ଷାରେ ଅଛନ୍ତି ପାକିସ୍ତାନୀ ଖେଳାଳି ଓ ଟିମ୍‌ ଅଫିସିଆଲ। ପାକିସ୍ତାନ ଏହାର ଓପ୍‌ନିଂ ଓ୍ବାର୍ମଅପ୍‌ ଖେଳିବାର ଦୁଇ ଦିନ ପୂର୍ବରୁ ଅର୍ଥାତ୍‌ ସେପ୍ଟେମ୍ବର ୨୭ରେ ଭାରତରେ ପହଞ୍ଚତ୍ବ। ଦଳ ଦୁବାଇ ବାଟ ଦେଇ ହାଇଦ୍ରାବାଦ ଆସିଥାନ୍ତା ଏବଂ ସେଠାରେ ଦୁଇ ଦିନ ଅଭ୍ୟାସ କରିଥାନ୍ତା। ମାତ୍ର ଏବେ ସୁଦ୍ଧା ଭିଜା ମିଳି ନ ଥିବାରୁ ଏହା ସମ୍ଭବପର ନୁହେଁ। ବାବର ଆଜାମଙ୍କ ନେତୃତ୍ୱାଧୀନ ଦଳ ଏହାର ପ୍ରଥମ ଓ୍ବାର୍ମଅପ୍‌ ସେପ୍ଟେମ୍ବର ୨୯ରେ ନ୍ୟୁଜିଲାଣ୍ଡ ବିପକ୍ଷରେ ଖେଳିବ। ପାକିସ୍ତାନ କ୍ରିକେଟ ବୋର୍ଡ (ପିସିବି)ରୁ ମିଳିଥିବା ସୂଚନା ଅନୁସାରେ, ଖେଳାଳିମାନେ ଇସ୍‌ଲାମାବାଦସ୍ଥିତ ଭାରତୀୟ ହାଇକମିଶନରୁ ଭିଜାକୁ ଅପେକ୍ଷା କରି ରହିଥିବାରୁ ଦଳର ଦୁବାଇ ଗସ୍ତକୁ ବାତିଲ କରିଦିଆଯାଇଛି। ଏହି ଅବ୍ୟବସ୍ଥା ସମ୍ପର୍କରେ ପିସିବି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ଦୃଷ୍ଟି ଆକର୍ଷଣ କରିଛି। ପାକିସ୍ତାନ ଗତଥର ୨୦୧୬ରେ ଟି୨୦ ବିଶ୍ୱକପ୍‌ ଖେଳିବା ଲାଗି ଭାରତ ଗସ୍ତରେ ଆସିଥିଲା। ଦୁଇ ପଡ଼ୋଶୀ ଦେଶ ମଧ୍ୟରେ ତିକ୍ତ ସମ୍ପର୍କ ଯୋଗୁ ଉଭୟେ କେବଳ ଏସିଆ କପ୍‌ ଓ ଆଇସିସି ଟୁର୍ନାମେଣ୍ଟରେ ପରସ୍ପର ସହ ଖେଳୁଛନ୍ତି। ପିସିବି ପାସ୍‌ପୋର୍ଟ ସଂଗ୍ରହ ପାଇଁ ଶୁକ୍ରବାର ଏହାର ଅଫିସିଆଲଙ୍କୁ ଇସ୍‌ଲାମାବାଦ ପଠାଇଥିଲା। ମାତ୍ର ଭିଜା ପ୍ରକ୍ରିୟା ଏପର୍ଯ୍ୟନ୍ତ ଚାଲିଛି। ଫଳତଃ ବୋର୍ଡ ଦୁବାଇରେ ଦୁଇଦିନିଆ ଅଭ୍ୟାସ କାର୍ଯ୍ୟକ୍ରମକୁ ବାତିଲ କରିଛି। ଭିଜା ମିଳିବା ମାତ୍ରେ ପାକିସ୍ତାନ ଦୁବାଇ ବାଟ ଦେଇ ସେପ୍ଟେମ୍ବର ୨୭ରେ ହାଇଦ୍ରାବାଦରେ ପହଞ୍ଚତ୍ବ।