ନୂଆଦିଲ୍ଲୀ,୧୧ା୫(ପି.ଟି.): ଲୋକ ସଭା ନିର୍ବାଚନ ଚାଲିଥିବା ବେଳେ ପ୍ରତି ପର୍ଯ୍ୟାୟ ଭୋଟିଂ ଶେଷ ହେବାର ୪୮ ଘଣ୍ଟା ମଧ୍ୟରେ ବୁଥ୍ଓ୍ବାରି ମତଦାନ ହାର ସମ୍ପର୍କିତ ସମ୍ପୂର୍ଣ୍ଣ ତଥ୍ୟ ଭାରତର ନିର୍ବାଚନ କମିଶନ (ଇସିଆଇ)ଙ୍କ ଓ୍ବେବ୍ସାଇଟ୍ରେ ଅପ୍ଲୋଡ୍ କରାଯାଉ। ଏଥିପାଇଁ ଇସିଆଇଙ୍କୁ ନିର୍ଦ୍ଦେଶ ଦେବା ନିମନ୍ତେ ଆସୋସିଏଶନ ଫର୍ ଡେମୋକ୍ରାଟିକ୍ ରିଫମ୍ସ (ଏଡିଆର୍) ସୁପ୍ରିମକୋର୍ଟରେ ଆବେଦନ କରିଛି। ଏଡିଆର୍ ଏହାର ୨୦୧୯ର ଏକ ଜନସ୍ବାର୍ଥ ମାମଲା (ପିଆଇଏଲ୍) ଉପରେ ଅନ୍ତରୀଣ ଆବେଦନପତ୍ର ଦାଖଲ କରି ନିର୍ବାଚନ କମିଶନଙ୍କୁ ସବୁ ବୁଥ୍ର ଫର୍ମ ୧୭ସି ଭାଗ-୧(ଆକାଉଣ୍ଟ ଅଫ୍ ଭୋଟ୍ସ ରେକର୍ଡେଡ୍)ର ସ୍କାନ୍ ହୋଇଥିବା ବୈଧ କପିକୁ ଭୋଟିଂ ପରେ ତୁରନ୍ତ ଅପ୍ଲୋଡ୍ ନିମନ୍ତେ ନିର୍ଦ୍ଦେଶ ଦେବାକୁ ସର୍ବୋଚ୍ଚ ଅଦାଲତଙ୍କୁ ନିବେଦନ କରିଛି। ନିର୍ବାଚନରେ ଅନିୟମିତତା ଦ୍ୱାରା ଗଣତାନ୍ତ୍ରିକ ପ୍ରକ୍ରିୟା ଯେପରି ବିକୃତ ନ ହୁଏ, ତାହା ସୁନିଶ୍ଚିତ କରିବା ଲାଗି ଏଭଳି ପିଟିଶନ ଦାଏର ହୋଇଛି।
ସୂଚନାଯୋଗ୍ୟ, ଚଳିତ ଲୋକ ସଭାର ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ନିର୍ବାଚନ ଯଥାକ୍ରମେ ଏପ୍ରିଲ ୧୯ ଓ ୨୬ରେ ଅନୁଷ୍ଠିତ ହୋଇଥିଲା। ପ୍ରଥମ ପର୍ଯ୍ୟାୟ ଭୋଟିଂର ୧୧ ଦିନ ଏବଂ ଦ୍ୱିତୀୟ ପର୍ଯ୍ୟାୟର ୪ ଦିନ ପରେ ଅର୍ଥାତ୍ ଏପ୍ରିଲ ୩୦ରେ ନିର୍ବାଚନ କମିଶନ ମତଦାନ ହାର୍ ତଥ୍ୟ ପ୍ରକାଶ କରିଥିଲେ। ନିର୍ବାଚନ ଦିନ ରାତି ୭ଟାରେ ଇସିଆଇ ଯେଉଁ ମତଦାନ ହାର ଘୋଷଣା କରିଥିଲା, ଏପ୍ରିଲ ୩୦ରେ ପ୍ରକାଶ ପାଇଥିବା ଚୂଡ଼ାନ୍ତ ତଥ୍ୟରେ ତାହାର ବ୍ୟତିକ୍ରମ ଦେଖାଯାଇଥିଲା। ଏଥିରେ ମତଦାନ ହାର ୫ରୁ ୬ ପ୍ରତିଶତ ଅଧିକ ଦର୍ଶାଯାଇଥିବା ଆବେଦନରେ ଉଲ୍ଲେଖ କରାଯାଇଛି। ଚୂଡ଼ାନ୍ତ ତଥ୍ୟ ପ୍ରକାଶରେ ଅହେତୁକ ବିଳମ୍ବ ଏବଂ ମତଦାନ ହାର ବୃଦ୍ଧି ଦର୍ଶାଯିବା ଚିନ୍ତାଜନକ। ତଥ୍ୟରେ ସଂଶୋଧନ ନେଇ ସାଧାରଣରେ ସନ୍ଦେହ ପ୍ରକାଶ ପାଇଛି। ଏଭଳି ଆଶଙ୍କାକୁ ଦୂର କରାଯିବା ଆବଶ୍ୟକ। ଭୋଟରମାନଙ୍କ ଆସ୍ଥା ବଜାୟ ରଖିବା ଜରୁରୀ ବୋଲି ଏଡିଆର୍ ଏହାର ପିଟିଶନରେ ଉଲ୍ଲେଖ କରିଛି। ସେଥିପାଇଁ ମତଦାନ ପରେ ଫର୍ମ ୧୭ସି ଭାଗ-୧ର ସ୍କାନ୍ ହୋଇଥିବା ବୈଧ କପିକୁ ଇସିଆଇଙ୍କ ଓ୍ବେବ୍ସାଇଟ୍ରେ ସ୍ଥାନିତ କରିବା ନିମନ୍ତେ ସୁପ୍ରିମକୋର୍ଟ ନିର୍ଦ୍ଦେଶ ଦେବାକୁ ଏଡିଆର୍ ନିବେଦନ କରିଛି।
ଇସିଙ୍କୁ ଭେଟିଲେ ଇଣ୍ଡିଆ ବ୍ଲକ୍ ନେତା
ଇଣ୍ଡିଆ ବ୍ଲକ୍ର ନେତାମାନଙ୍କର ଏକ ପ୍ରତିନିଧି ଦଳ ଶୁକ୍ରବାର ନିର୍ବାଚନ କମିଶନଙ୍କ ସର୍ବୋଚ୍ଚ ଅଧିକାରୀମାନଙ୍କୁ ଭେଟି ମତଦାନ ହାର ତଥ୍ୟ ପ୍ରକାଶରେ ବିଳମ୍ବକୁ ନେଇ ଚିନ୍ତା ପ୍ରକଟ କରିଛନ୍ତି। ନିର୍ବାଚନ ପ୍ରଚାର ବେଳେ ଶାସକ ଭାଜପା ନେତାମାନେ ଆଦର୍ଶ ଆଚରଣ ବିଧି ଉଲ୍ଲଂଘନ କରୁଥିବାରୁ ସେିମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସେମାନେ ଇସିଙ୍କୁ ନିବେଦନ କରିଛନ୍ତି। ଉତ୍ତରପ୍ରଦେଶ ପୋଲିସ ରାଜ୍ୟର କେତେଜଣ ଲୋକଙ୍କୁ ରେଡ୍ କାର୍ଡ ଇସ୍ୟୁ କରିଥିବା ପ୍ରସଙ୍ଗ ସମାଜବାଦୀ ପାର୍ଟି ନେତା ଜାଭେଦ ଅଲି ଉଠାଇଥିଲେ। ରେଡ୍ କାର୍ଡ ପାଇଥିବା ଅନେକେ ମତଦାନରୁ ବଞ୍ଚତ୍ତ ହୋଇଥିବା ସେ କହିଥିଲେ। ପ୍ରତିନିଧି ଦଳରେ କଂଗ୍ରେସ ନେତା ଅଭିଷେକ ମନୁ ସିଂଘଭି, ସଲମାନ ଖୁର୍ସିଦ, ଟିଏମ୍ସି ନେତା ଡେରେକ ଓ’ବ୍ରାଏନ୍, ଡିଏମ୍କେର ଟି.ଆର୍. ବାଲୁ, ଜେଏମ୍ଏମ୍ର ମହୁଆ ମାଝି, ସିପିଆଇର ବିନୟ ବିଶ୍ୱମ୍ ପ୍ରମୁଖ ରହିଥିଲେ। ପ୍ରଧାନମନ୍ତ୍ରୀ ଓ ସ୍ବରାଷ୍ଟ୍ର ମନ୍ତ୍ରୀଙ୍କ ବିରୋଧରେ କଂଗ୍ରେସ ସମେତ ବିଭିନ୍ନ ଦଳ ଅନେକ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଆସ୍ଥା ସଙ୍କଟ ସମେତ ବିଭିନ୍ନ ପ୍ରସଙ୍ଗରେ ଇଣ୍ଡିଆ ବ୍ଲକ୍ର ନେତାମାନେ ଇସିଙ୍କ ଦୃଷ୍ଟି ଆକର୍ଷଣ କରିଥିଲେ।
