ନୂଆଦିଲ୍ଲୀ,୮।୨: ମହାରାଷ୍ଟ୍ର ବିଧାନସଭା ନିର୍ବାଚନରେ ସଂଖ୍ୟାଗତ ଅନିୟମିତତା ହୋଇଥିବା କଂଗ୍ରେସ ନେତା ରାହୁଲ ଗାନ୍ଧୀ ଶୁକ୍ରବାର ଅଭିଯୋଗ କରିଛନ୍ତି। ରାଜ୍ୟରେ ସାବାଳକ ଓ ସାବାଳିକାଙ୍କ ମୋଟ ସଂଖ୍ୟା ଯେତେ, ତା’ଠାରୁ ଅଧିକ ଭୋଟର ପଞ୍ଜୀକୃତ ହୋଇଥିବା ଲୋକ ସଭାର ବିରୋଧୀ ଦଳ ନେତା ଦାବି କରିଛନ୍ତି।
ସଭା ଏବଂ ରାଜ୍ୟ ବିଧାନସଭା ନିର୍ବାଚନ ମଧ୍ୟବର୍ତ୍ତୀ ୫ ମାସ ମଧ୍ୟରେ ବହୁସଂଖ୍ୟାରେ ଭୋଟରଙ୍କୁ ପଞ୍ଜୀକୃତ କରାଯାଇଥିବା ସେ କହିଛନ୍ତି। ୨୦୨୪ ଲୋକ ସଭା ନିର୍ବାଚନ ଏବଂ ଏହା ପରବର୍ତ୍ତୀ ବିଧାନସଭା ନିର୍ବାଚନର ଭୋଟର ତାଲିକାର କେନ୍ଦ୍ରୀୟ ତଥ୍ୟ ପ୍ରଦାନ ନିମନ୍ତେ ମହାରାଷ୍ଟ୍ରର ବିରୋଧୀ ଦଳ କଂଗ୍ରେସ, ଶିବସେନା(ୟୁବିଟି) ଏବଂ ଏନ୍ସିପି-ଏସ୍ପି ପକ୍ଷରୁ ନିର୍ବାଚନ କମିଶନଙ୍କ ନିକଟରେ ଦାବି ହୋଇଛି। ଯଦି କମିଶନ ଏହି ତଥ୍ୟ ପ୍ରଦାନ ନ କରନ୍ତି, ତେବେ ପରବର୍ତ୍ତୀ ପଦକ୍ଷେପ ସ୍ବରୂପ ଅଦାଲତଙ୍କ ଦ୍ୱାରସ୍ଥ ହେବୁ ବୋଲି ରାହୁଲ କହିଛନ୍ତି। ବିଧାନସଭା ନିର୍ବାଚନ ପୂର୍ବରୁ ବହୁସଂଖ୍ୟାରେ ଭୋଟରଙ୍କ ନାଁ କାଟିଦିଆଯାଇଥିଲା କିମ୍ବା ଏହାକୁ ଅନ୍ୟତ୍ର ସ୍ଥାନ୍ତାନ୍ତର କରାଯାଇତତ୍ଲା। ସେମାନଙ୍କ ମଧ୍ୟରୁ ଅଧିକାଂଶ ଦଳିତ, ଆଦିବାସୀ ଏବଂ ସଂଖ୍ୟାଲଘୁ ସମ୍ପ୍ରଦାୟର ବୋଲି ଶିବସେନା(ୟୁବିଟି) ନେତା ସଞ୍ଜୟ ରାଉତ ଏବଂ ଏନ୍ସିପି(ଏସ୍ପି)ର ସୁପ୍ରିୟା ସୁଲେଙ୍କ ସହ ଏକ ମିଳିତ ଖବରଦାତା ସମ୍ମିଳନୀରେ ରାହୁଲ ଅଭିଯୋଗ ଆଣିଛନ୍ତି। ଯେତିକି ଭୋଟରଙ୍କ ନାଁ ସଂଯୋଗ ହୋଇଛି, ତା’ଠୁ ବହୁ ଅଧିକଙ୍କ ନାଁ କଟାଯାଇଥିବା ରାଜ୍ୟର ବିରୋଧୀ ଦଳଗୁଡ଼ିକ ସନ୍ଦେହ କରୁଛନ୍ତି। ଫଳରେ ନିର୍ବାଚନ କମିଶନଙ୍କ କାର୍ଯ୍ୟକୁ ନେଇ ଅନେକ ପ୍ରଶ୍ନ ଉଠିଛି। ୨୦୧୦ ବିଧାନସଭା ନିର୍ବାଚନ ଏବଂ ୨୦୨୪ ଲୋକ ସଭା ନିର୍ବାଚନ ମଧ୍ୟବର୍ତ୍ତୀ ୫ ବର୍ଷ ମଧ୍ୟରେ ମହାରାଷ୍ଟ୍ରର ଭୋଟର ତାଲିକାରେ ୩୨ ଲକ୍ଷ ଭୋଟରଙ୍କୁ ସାମିଲ କରାଯାଇଛି। ତେବେ ୨୦୨୪ ଲୋକ ସଭା ନିର୍ବାଚନ ଏବଂ ବିଧାନସଭା ନିର୍ବାଚନ ମଧ୍ୟବର୍ତ୍ତୀ ମାତ୍ର ୫ ମାସ ମଧ୍ୟରେ ୩୯ ଲକ୍ଷ ଭୋଟର ପଞ୍ଜୀକୃତ ହୋଇଛନ୍ତି। ଲୋକ ସଭା ନିର୍ବାଚନ ପରେ କାହିଁକି ଏତେ ସଂଖ୍ୟାରେ ଭୋଟର ସାମିଲ ହେଲେ? ସେହି ୩୯ ଲକ୍ଷ ଭୋଟର, ଯେଉଁମାନେ ହିମାଚଳପ୍ରଦେଶର ମୋଟର ଭୋଟର ସଂଖ୍ୟା ସହ ସମାନ, ସେମାନେ ପ୍ରକୃତରେ କିଏ ବୋଲି ରାହୁଲ ପ୍ରଶ୍ନ କରିଛନ୍ତିି।
ମୋଟ ବୟସ୍କ (ଭୋଟ ଦେବା ପାଇଁ ଯୋଗ୍ୟ ବୟସର ଲୋକ) ଜନସଂଖ୍ୟା ୯.୫୪ କୋଟି ହୋଇଥିବାବେଳେ ବିଧାନସଭା ନିର୍ବାଚନରେ ମୋଟ ଭୋଟର ସଂଖ୍ୟା ୯.୭ କୋଟି। ଏହା କିପରି ସମ୍ଭବ ହେଲା ବୋଲି ରାହୁଲ ଜାଣିବାକୁ ଚାହିଁଛନ୍ତି। ଅତିରିକ୍ତ ଭୋଟର ସୃଷ୍ଟି ହେଲେ କିପରି ବୋଲି ବିରୋଧୀ ଦଳ ନେତା ପ୍ରଶ୍ନ କରିଛନ୍ତି। ବିଧାନସଭାରେ ବିରୋଧୀ ଦଳଗୁଡ଼ିକର ଭୋଟ ଭାଗ ସମାନ ରହିଥିବାବେଳେ ନୂଆ ସଂଯୋଗ ହୋଇଥିବା ଭୋଟରଙ୍କ ମଧ୍ୟରୁ ଅଧିକାଂଶ ଭୋଟ ଭାଜପା ସପକ୍ଷରେ ଯାଇଥିଲା। କାମ୍ଥି ନିର୍ବାଚନ ମଣ୍ଡଳୀରେ ଭାଜପାର ବିଜୟ ବ୍ୟବଧାନ ନୂଆ ଭୋଟରଙ୍କ ସଂଖ୍ୟା ସହ ପାଖାପାଖି ସମାନ। ଇସିଙ୍କୁ ଏସବୁ ପ୍ରଶ୍ନର ଉତ୍ତର ଦେବାକୁ ହେବ। କମିଶନ ବିରୋଧୀ ଦଳଗୁଡ଼ିକର ଅନୁରୋଧକୁ ଗ୍ରହଣ କରି ସମ୍ପୂର୍ଣ୍ଣ ଭୋଟର ତାଲିକାର ତଥ୍ୟ ଦିଅନ୍ତୁ ବୋଲି କଂଗ୍ରେସ ନେତା ଦାବି କରିଛନ୍ତି। ନଚେତ୍ ବିରୋଧୀ ଦଳଗୁଡ଼ିକ ଆଇନର ଆଶ୍ରୟ ନେବେ ବୋଲି ରାହୁଲ କହିଛନ୍ତି।
