ପୁଣେ,୧୧।୧୧: ମହାରାଷ୍ଟ୍ରର ପୁଣେସ୍ଥିତ ସାବିତ୍ରୀବାଈ ଫୁଲେ ବିଶ୍ୱବିଦ୍ୟାଳୟରେ ‘ଭୋଟର ପଞ୍ଜୀକରଣ-ଗଣତନ୍ତ୍ରର ପ୍ରଥମ ପାହାଚ’ ବିଷୟବସ୍ତୁ ଉପରେ ଏକ ମଲ୍ଟିମିଡିଆ ପ୍ରଦର୍ଶନୀ ଅନୁଷ୍ଠିତ ହେଉଛି। ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଏବଂ ନିର୍ବାଚନ କମିଶନର ଅନୁପ ଚନ୍ଦ୍ର ପାଣ୍ଡେ ଗୁରୁବାର ଏହାକୁ ଉଦ୍ଘାଟନ କରିଛନ୍ତି। ସୂଚନା ପ୍ରସାରଣ ମନ୍ତ୍ରଣାଳୟ ଅଧୀନରେ ଥିବା କେନ୍ଦ୍ରୀୟ ଯୋଗାଯୋଗ ବ୍ୟୁରୋ (ସିବିସି) ଏବଂ ପୁଣେର ଜିଲା ନିର୍ବାଚନ ଅଧିକାରୀ (ଡିଇଓ) ମିଳିତ ଭାବେ ଏହି ୩ ଦିନିଆ ଭୋଟର ସଚେତନତା କାର୍ଯ୍ୟକ୍ରମ ଆୟୋଜନ କରିଛନ୍ତି। ଯୁବ ଭୋଟରଙ୍କୁ ପଞ୍ଜୀକୃତ କରିବା ଲାଗି ପୁଣେ ଡିଇଓ ପକ୍ଷରୁ ପ୍ରଦର୍ଶନୀ ସ୍ଥଳରେ ସ୍ବତନ୍ତ୍ର ପଞ୍ଜୀକରଣ କ୍ୟାମ୍ପ ବ୍ୟବସ୍ଥା କରାଯାଇଛି। ସିବିସିର ଭର୍ଚୁଆଲ ରିଏଲିଟି କିଓସ୍କୋ ମାଧ୍ୟମରେ ‘ଭାରତୀୟ ନିର୍ବାଚନ ଓ ଭୋଟର ପଞ୍ଜୀକରଣ’ ଉପରେ ବିଶେଷ ପ୍ରାଧାନ୍ୟ ଦିଆଯାଇଛି। ଏହି ଅବସରରେ ସିବିସିର ନୃତ୍ୟସଙ୍ଗୀତ କଳାକାରମାନେ ‘କୌଣସି ଭୋଟର ବାଦ୍ ପଡ଼ିବେ ନାହିଁ’ ଶୀର୍ଷକ ଉପରେ ରଙ୍ଗାରଙ୍ଗ କାର୍ଯ୍ୟକ୍ରମ ପରିବେଷଣ କରିଥିଲେ। ସୋସିଆଲ ମିଡିଆ ଯୁଗରେ ସିବିସିର ସଚେତନତାଧର୍ମୀ ଲୋକସମ୍ପର୍କ କାର୍ଯ୍ୟକ୍ରମ ଯୋଗାଯୋଗର ସବୁଠୁ ବଳିଷ୍ଠ ମାଧ୍ୟମ ବୋଲି ଏହି ଅବସରରେ ସିଇସି ରାଜୀବ କୁମାର କହିଛନ୍ତି। ଭୋଟର ସଚେତନତା ଅଭିଯାନରେ ଏଭଳି ପ୍ରଦର୍ଶନୀ ସବୁବେଳେ ଉପଯୋଗୀ ହୋଇପାରିବ। ଭୋଟର ହେବା ଲାଗି ସେ ଯୁବପିଢ଼ିଙ୍କୁ ଆହ୍ବାନ ଦେଇଥିଲେ। ପୁଣେ ଭାରତର ଏକ ସାଂସ୍କୃତିକ କେନ୍ଦ୍ର ଓ ପୁଣେ ବିଶ୍ୱବିଦ୍ୟାଳୟର ଇତିହାସ ସହ ଗୋପାଳକୃଷ୍ଣ ଗୋଖଲେଙ୍କ ଭଳି ବିଶିଷ୍ଟ ବ୍ୟକ୍ତି ଜଡ଼ିତ। ତେଣୁ ୨୦୨୩ ଏସ୍ଏସ୍ଆର କାର୍ଯ୍ୟକ୍ରମ ଏଠାରୁ ଆରମ୍ଭ କରିବାକୁ ନିଷ୍ପତ୍ତି ନିଆଯାଇଛି। ସବୁ ଯୋଗ୍ୟ ଭୋଟର ନିଜକୁ ପଞ୍ଜୀକରଣ କରାଇ ମତାଧିକାର ସାବ୍ୟସ୍ତ କଲେ ଗଣତନ୍ତ୍ର ସୁଦୃଢ଼ ହେବ ବୋଲି ନର୍ବାଚନ କମିଶନର ଅନୁପ ଚନ୍ଦ୍ର ପାଣ୍ଡେ କହିଥିଲେ।
