ଇସଲାମାବାଦ୍,୧୫।୯: ପାକିସ୍ତାନର ପୂର୍ବତନ କ୍ରିକେଟର ଶୋଏବ ଅଖତର ଏକ ବଡ଼ ଭବିଷ୍ୟବାଣୀ କରିଛନ୍ତି। ସେ କହିଛନ୍ତି, ବିରାଟ କୋହଲି ଟି-୨୦ ବିଶ୍ୱକପ ୨୦୨୨ ପରେ ଖେଳର ସବୁଠାରୁ ଛୋଟ ଫର୍ମାଟରୁ ଅବସର ନେବାକୁ ଚିନ୍ତା କରିପାରନ୍ତି। ଅନ୍ୟ ଫର୍ମାଟରେ ଭଲ ଖେଲିବା ପାଇଁ ସେ ଏହି ନିଷ୍ପତ୍ତି ନେଇପାରନ୍ତି। ଯଦି ମୁଁ ତାଙ୍କ ସ୍ଥାନରେ ଥା’ନ୍ତି, ମୁଁ ମଧ୍ୟ ସମାନ କାର୍ଯ୍ୟ କରିଥା’ନ୍ତି। ଶୋଏବ ଅଖତରଙ୍କ ପୂର୍ବରୁ ପାକିସ୍ତାନ କ୍ରିକେଟର୍ ଶହିଦ ଆଫ୍ରିଦି ବିରାଟ କୋହଲିଙ୍କୁ ଅବସର ବିଷୟରେ ପରାମର୍ଶ ଦେଇଥିଲେ।
ନିକଟରେ ଶେଷ ହୋଇଥିବା ୨୦୨୨ ଏସିଆ କପ ଟି-୨୦ ଟୁର୍ନାମେଣ୍ଟରେ ବିରାଟ କୋହଲି ଫର୍ମକୁ ଫେରିଛନ୍ତି। ଡାହାଣହାତୀ ବ୍ୟାଟ୍ସମ୍ୟାନ ଟୁର୍ନାମେଣ୍ଟର ଦ୍ୱିତୀୟ ସର୍ବାଧିକ ରନ ସ୍କୋରର୍ ହୋଇଛନ୍ତି। ସେ ୫ଟି ମ୍ୟାଚ ଖେଳି ମୋଟ ୨୭୬ ରନ ସ୍କୋର କରିଥିଲେ। ଅଷ୍ଟ୍ରେଲିଆରେ ଅନୁଷ୍ଠିତ ହେବାକୁ ଥିବା ଆଗାମୀ ଟି-୨୦ ବିଶ୍ୱକପ ୨୦୨୨ରେ ବିରାଟ କୋହଲି ଭାରତୀୟ ଦଳରେ ସାମିଲ ଅଛନ୍ତି।
ସୂଚନାଯୋଗ୍ୟ, ବିରାଟ କୋହଲି ଖେଳର ସମସ୍ତ ତିନୋଟି ଫର୍ମାଟରେ ଅତି କମରେ ୧୦୦ଟି ମ୍ୟାଚ ଖେଳିଥିବା ଏକମାତ୍ର କ୍ରିକେଟର ହୋଇପାରିଛନ୍ତି। ସେ ଏପର୍ଯ୍ୟନ୍ତ ନିଜ କ୍ୟାରିୟରରେ ୧୦୨ ଟେଷ୍ଟ, ୧୦୪ ଟି-୨୦ ଏବଂ ୨୬୨ଟି ଦିନିକିଆ ଖେଳିଛନ୍ତି।
